Divin troupeau, qui sur les rives molles

Du fleuve Eurote, ou sur le mont natal,

Ou sur le bord du chevalin crystal,

Assis, tenez vos plus sainctes escolles:

Si quelque foys aux saultz de vos carolles

M'avez receu par ung astre fatal,

Plus dur qu'en fer, qu'en cuyvre ou qu'en metal,

Dans vostre temple engravez ces paroles:

Ronsard, affin que le siecle a venir,

De pere en filz se puisse souvenir,

D'une beauté qui sagement affolé,

De la main dextre append a nostre autel,

L'humble discours de son livre immortel,

Son cuoeur de l'autre, aux piedz de ceste idole.

I

Qui voudra voyr comme un Dieu me surmonte,

Comme il m'assault, comme il se fait vainqueur,

Comme il r'enflamme, et r'englace mon cuoeur,

Comme il reçoit un honneur de ma honte,

Qui voudra voir une jeunesse prompte

A suyvre en vain l'object de son malheur,

Me vienne voir: il voirra ma douleur,

Et la rigueur de l'Archer qui me donte.

Il cognoistra combien la raison peult

Contre son arc, quand une foys il veult

Que nostre cuoeur son esclave demeure:

Et si voirra que je suis trop heureux,

D'avoir au flanc l'aiguillon amoureux,

Plein du venin dont il fault que je meure.

II

Nature ornant la dame qui devoyt

De sa douceur forcer les plus rebelles,

Luy fit present des beautez les plus belles,

Que des mille ans en espargne elle avoyt

Tout ce qu'Amour avarement couvoyt,

De beau, de chaste, et d'honneur soubz ses ailles,

Emmiella les graces immortelles

De son bel oeil qui les dieux emouvoyt.

Du ciel à peine elle estoyt descendue,

Quand je la vi, quand mon ame ésperdue

En devint folle: et d'un si poignant trait,

Le fier destin l'engrava dans mon ame,

Que vif ne mort, jamais d'une aultre dame

Empraint au cuoeur je n'auray le portraict.

III

Dans le serain de sa jumelle flamme

Je vis Amour, qui son arc desbandoit,

Et sus mon cuoeur le brandon éspandoit,

Qui des plus froids les moëlles enflamme.

Puis çà puis là pres les yeulx de ma dame

Entre cent fleurs un retz d'or me tendoit,

Qui tout crespu blondement descendoit

A flotz ondez pour enlasser mon ame.

Qu'eussay-je faict l'Archer estoit si doulx,

Si doulx son feu, si doulx l'or de ses noudz,

Qu'en leurs filetz encore je m'oublie:

Mais cest oubli ne me tourmente point,

Tant doulcement le doulx Archer me poingt,

Le feu me brusle, et l'or crespe me lie.

IV

Je ne suis point, ma guerriere Cassandre,

Ne Myrmidon, ne Dolope souldart,

Ne cest Archer, dont l'homicide dart

Occit ton frere, et mit ta ville en cendre.

En ma faveur pour esclave te rendre

Un camp armé d'Aulide ne depart,

Et tu ne voys au pied de ton rempart

Pour t'emmener mille barques descendre.

Mais bien je suis ce Chorébe insensé,

Qui pour t'amour ay le cuoeur offensé,

Non de la main du Gregeois Penelée:

Mais de cent traitz qu'un Archerot vainqueur,

Par une voye en mes yeulx recelée,

Sans y penser me ficha dans le cuoeur.

V

Pareil j'egalle au soleil que j'adore

L'autre soleil. Cestuy là de ses yeulx

Enlustre, enflamme, enlumine les cieulx

Et cestuy ci toute la terre honore.

L'art, la Nature et les Astres encore

Les Elements, les Graces et les Dieux

Ont prodigué le parfaict de leur mieux,

Dans son beau jour qui le nostre décore.

Heureux, cent foys heureux, si le destin

N'eust emmuré d'un fort diamantin

Si chaste cuoeur dessoubz si belle face:

Et plus heureux si je n'eusse arraché

Mon cuoeur de moy, pour l'avoyr attaché

De cloudz de feu sur le froid de sa glace.

VI

Ces liens d'or, ceste bouche vermeille,

Pleine de lis, de roses, et d'oeuilletz,

Et ces couraulx chastement vermeilletz,

Et ceste joue à l'Aurore pareille:

Ces mains, ce col, ce front, et ceste oreille,

Et de ce sein les boutons verdeletz,

Et de ces yeulx les astres jumeletz,

Qui font trembler les ames de merveille:

Feirent nicher Amour dedans mon sein,

Qui gros de germe avoit le ventre plein,

D'oeufz non formez et de glaires nouvelles.

Et luy couvant (qui de mon cuoeur jouit

Neuf mois entiers) en un jour m'eclouit

Mille amoureaux chargez de traits et d'aisles.

VII

Bien qu'à grand tort il te plaist d'allumer

Dedans mon cuoeur, siege à ta seigneurie,

Non d'une amour, ainçois d'une furie

Le feu cruel pour mes os consumer,

L'aspre torment ne m'est point si amer,

Qu'il ne me plaise, et si n'ay pas envie

De me douloir: car je n'ayme ma vie

Si non d'autant qu'il te plaist de l'aimer.

Mais si les cieulx m'ont fait naistre, Ma dame.

Pour estre tien, ne genne plus mon ame,

Mais pren en gré ma ferme loyaulté.

Vault il pas mieulx en tirer du service,

Que par l'horreur d'un cruel sacrifice,

L'occire aux piedz de ta fiere beauté?

VIII

Lors que mon oeil pour t'oeillader s'amuse,

Le tien habile à ses traits decocher,

Estrangement m'empierre en un rocher,

Comme au regard d'une horrible Meduse.

Moy donc rocher, si dextrement je n'use

L'outil des Seurs pour ta gloire esbaucher,

Qu'un seul Tuscan est digne de toucher,

Non le changé, mais le changeur accuse.

Las, qu'ay je dit? Dans un roc emmuré,

En te blamant je ne suis asseuré,

Tant j'ay grand peur des flammes de ton ire,

Et que mon chef par le feu de tes yeux

Soit diffamé, comme les monts d'Epire

Sont diffamez par les flammes des cieulx.

IX

Le plus toffu d'un solitaire boys,

Le plus aigu d'une roche sauvage,

Le plus desert d'un separé rivage,

Et la frayeur des antres les plus coys:

Soulagent tant les soupirs de ma voix,

Qu'au seul escart de leur secret ombrage,

Je sens garir une amoureuse rage,

Qui me raffolle au plus verd de mes moys.

Là, renversé dessus leur face dure,

Hors de mon sein je tire une peinture,

De touts mes maulx le seul allegement,

Dont les beaultez par Denisot encloses,

Me font sentir mille metamorphoses

Tout en un coup, d'un regard seulement.

X

Je pais mon cuoeur d'une telle ambrosie,

Que je ne suis à bon droit envieux

De ceste là qui le pere des dieux

Chez l'Ocean friande resasie.

Celle qui tient ma liberté saisie,

Voire mon cuoeur dans le jour de ses yeux,

Nourrist ma faim d'un fruict si precieux,

Qu'autre appareil ne paist ma fantaisie.

De l'avaller je ne me puis lasser,

Tant le plaisir d'un variant penser

Mon appetit nuict et jour faict renaistre.

Et si le fiel n'amoderoit un peu

Le doux du miel duquel je suis repeu,

Entre les dieux, dieu je ne voudroys estre.

XI

Amour, amour, donne moy paix ou trefve,

Ou bien retire, et d'un garrot plus fort

Tranche ma vie, et m'avance la mort,

Me bienheurant d'une langueur plus bréve.

Soit que le jour ou se couche, ou se leve,

Je sens tousjours un penser qui me mord,

Et contumax au cours de son effort,

De pis en pis mes angoisses r'engreve.

Que dois je faire? Amour me faict errer,

Si haultement que je n'ose esperer

De mon salut que la desesperance.

Puis qu'Amour donc ne me veult secourir

Pour me deffendre il me plaist de mourir,

Et par la mort trouver ma delivrance?

XII

J'espere et crains, je me tais et supplie,

Or je suis glace et ores un feu chault,

J'admire tout, et de rien ne me chault,

Je me delace, et puis je me relie.

Rien ne me plaist si non ce qui m'ennuye,

Je suis vaillant, et le cuoeur me default,

J'ay l'espoir bas, j'ay le courage hault,

Je doubte Amour, et si je le deffie.

Plus je me picque, et plus je suis restif,

J'ayme estre libre, et veulx estre captif,

Cent foys je meur, cent foys je prens naissance.

Un Promethée en passions je suis,

Et pour aymer perdant toute puissance,

Ne pouvant rien je fay ce que je puis.

XIII

Pour estre en vain tes beaulx soleilz aymant,

Non pour ravir leur divine estincelle,

Contre le roc de ta rigueur cruelle

Amour m'atache à mille cloux d'aymant.

En lieu d'un Aigle, un soing horriblement

Claquant du bec, et siflant de son aille,

Ronge goulu ma poictrine immortelle,

Par un desir qui naist journellement.

Mais de cent maulx, et de cent que j'endure,

Fiché, cloué, dessus ta rigueur dure,

Le plus cruel me seroit le plus doulx,

Si j'esperoys, apres un long espace,

Venir vers moy l'Hercule de ta grace

Pour delacer le moindre de mes nouds.

XIV

Je vy tes yeulx desoubz telle planette,

Qu'autre plaisir ne me peult contenter,

Si non le jour, si non la nuict, chanter,

Allege moy doulce plaisant' brunette.

O liberté combien je te regrette!

Combien le jour que je vy t'absenter,

Pour me laisser sans espoir tourmenter.

En ceste genne, où si mal on me traicte!

L'an est passé, le vingtuniesme jour

Du mois d'Avril, que je vins au sejour,

De la prison, où les amours me pleurent:

Et si ne voy (tant les liens sont fors)

Un seul moyen pour me tirer dehors,

Si par la mort toutes mes mors ne meurent.

XV

Hé qu'à bon droit les Charites d'Homere

Un faict soudain comparent au penser,

Qui parmy l'air scauroit bien devancer

Le Chevalier qui tua la Chimaire.

Si tost que luy une nef passagere

De mer en mer ne pourroit s'élancer,

Ny par les champs ne le sçauroit lasser

Du faux et vray la prompte messagere.

Le vent Borée ignorant le repos,

Conceut le mien, qui viste et qui dispos,

Et dans le ciel, et par la mer encore,

Et sur les champs, fait aillé belliqueur,

Comme un Zethés, s'envolle apres mon cueur,

Qu'une Harpye humainement devore.

XVI

Je veulx darder par l'univers ma peine,

Plus tost qu'un trait ne volle au descocher:

Je veulx de miel mes oreilles boucher

Pour n'ouir plus la voix de ma Sereine.

Je veulx muer mes deux yeulx en fontaine,

Mon cuoeur en feu, ma teste en un rocher,

Mes piedz en tronc, pour jamais n'aprocher

De sa beaulté si fierement humaine.

Je veulx changer mes pensers en oyseaux,

Mes doux souspirs en zephyres nouveaux,

Qui par le monde evanteront ma pleinte.

Et veulx encor de ma palle couleur,

Dessus le Loyr enfanter une fleur,

Qui de mon nom et de mon mal soit peinte.

XVII

Par un destin dedans mon cuoeur demeure,

L'oeil, et la main, et le crin delié,

Qui m'ont si fort, bruslé, serré, lié

Qu' ars, prins, lassé, par eulx fault que je meure.

Le feu, la serre, et le ret à toute heure,

Ardant, pressant, nouant mon amitié,

Occise aux piedz de ma fiere moitié

Font par sa mort ma vie estre meilleure.

Oeil, main et crin, qui flammez et gennez,

Et r'enlassez mon cuoeur que vous tenez:

Au labyrint de vostre crespe voye.

Hé que ne suis je Ovide bien disant!

Oeil tu seroys un bel Astre luisant,

Main un beau lis, crin un beau ret de soye.

XVIII

Un chaste feu qui les cuoeurs illumine,

Un or frisé de meint crespe annelet,

Un front de rose, un teint damoiselet,

Un ris qui l'ame aux astres achemine:

Une vertu de telles beaultez digne,

Un col de neige, une gorge de laict,

Un cuoeur ja meur dans un sein verdelet,

En dame humaine une beaulté divine

Un oeil puissant de faire jours les nuictz,

Une main forte à piller les ennuiz,

Qui tient ma vie en ses doitz enfermée,

Avecque un chant offensé doulcement

Ore d'un ris, or d'un gémissement:

De telz sorciers ma raison fut charmée.

XIX

Avant le temps tes temples fleuriront,

De peu de jours ta fin sera bornée,

Avant ton soir, se clorra ta journée,

Trahis d'espoir tes pensers periront.

Sans me fleschir tes escriptz flétriront,

En ton desastre ira ma destinée,

Ta mort sera pour m'amour terminée,

De tes souspirs tes nepveux se riront.

Tu seras faict d'un vulgaire la fable,

Tu bastiras sur l'incertain du sable,

Et vainement tu peindras dans les cieulx:

Ainsi disoit la Nymphe qui m'afolle,

Lors que le ciel pour séeller sa parolle

D'un dextre ésclair fut presage à mes yeulx.

XX

Je vouldroy bien richement jaunissant

En pluye d'or goute à goute descendre

Dans le beau sein de ma belle Cassandre,

Lors qu'en ses yeulx le somme va glissant.

Je vouldroy bien en toreau blandissant

Me transformer pour finement la prendre,

Quand elle va par l'herbe la plus tendre

Seule à l'escart mille fleurs ravissant.

Je vouldroy bien afin d' aiser ma peine

Estre un Narcisse, et elle une fontaine

Pour m'y plonger une nuict à sejour:

Et vouldroy bien que ceste nuict encore

Durast tousjours sans que jamais l'Aurore

D'un front nouveau nous r'allumast le jour.

XXI

Qu'Amour mon cuoeur, qu'Amour mon ame sonde,

Lui qui congnoist ma seulle intention,

Il trouvera que toute passion

Veuve d'espoir, par mes veines abonde.

Mon Dieu que j'ayme! est il possible au monde

De voyr un cuoeur si plein d'affection,

Pour le parfaict d'une perfection,

Qui m'est dans l'ame en playe si profonde?

Le cheval noir qui ma Royne conduit

Par le sentier où ma Chair la seduit,

A tant erré d'une vaine traverse,

Que j'ay grand peur, (si le blanc ne contraint

Sa course vague, et ses pas ne refraint

Dessoubz le joug) que ma raison ne verse.

XXII

Cent et cent foys penser un penser mesme,

A deux beaulx yeulx montrer à nud son cuoeur,

Se desoyfver d'une amere liqueur,

S'aviander d'une amertume estresme:

Avoyr la face amoureusement blesme,

Plus souspirer, moins fleschir la rigueur,

Mourir d'ennuy, receler sa langueur,

Du vueil d'aultruy des loix faire à soy mesme:

Un court despit, une aimantine foy,

Aymer trop mieulx son ennemi que soy,

Peindre en ses yeulx mille vaines figures:

Vouloir parler et n'oser respirer,

Esperer tout et se desesperer,

Sont de ma mort les plus certains augures.

XXIII

Ce beau coral, ce marbre qui souspire,

Et cest ébénne ornement d'un sourci,

Et cest albastre en vouste racourci,

Et ces zaphirs, ce jaspe, et ce porphyre,

Ces diaments, ces rubis qu'un zephyre

Tient animez d'un souspir adouci,

Et ces oeilletz, et ces roses aussi,

Et ce fin or, où l'or mesme se mire,

Me sont au cuoeur en si profond esmoy,

Qu'un autre object ne se présente à moy,

Si non le beau de leur beau que j'adore,

Et le plaisir qui ne se peult passer

De les songer, penser, et repenser,

Songer, penser, et repenser encore.

XXIV

Tes yeulx divins me promettent le don

Qui d'un espoir me r'enflamme et r'englace,

Las, mais j'ay peur qu'ilz tiennent de la race

De ton ayeul le roy Laomedon.

Au flamboyer de leur double brandon

De peu à peu l'esperance m'embrasse,

Ja prevoyant par le ris de leur grace

Que mon service aura quelque guerdon.

Tant seulement ta bouche m'espouvante,

Bouche vrayment qui prophéte me chante

Tout le rebours de tes yeulx amoureux.

Ainsi je vis, ainsi je meurs en doubte

L'un me r'appelle, et l'autre me reboute,

D'un seul object heureux et malheureux.

XXV

Ces deux yeulx bruns, deux flambeaulx de ma vie,

Dessus les miens fouldroyans leur clarté,

Ont esclavé ma jeune liberté,

Pour la damner en prison asservie.

De voz doulx feux ma raison fut ravie,

Si qu'esblouy de vostre grand' beaulté,

Opiniastre à garder loyaulté

Aultres yeulx voyr depuis je n'euz envie.

D'autre esperon mon Tyran ne me poingt,

Aultres pensers en moy ne couvent point,

Ny aultre idole en mon cuoeur je n'adore.

Ma main ne sçait cultiver aultre nom,

Et mon papier n'est esmaillé, si non

De voz beaultez que ma plume colore.

XXVI

Plus tost le bal de tant d'astres divers

Sera lassé, plus tost la terre et l'onde,

Et du grand Tout l'ame en tout vagabonde

Animera les abysmes ouverts:

Plus tost les cieulx des mers seront couverts,

Plus tost sans forme ira confus le monde:

Que je soys serf d'une maistresse blonde,

Ou que j'adore une femme aux yeulx verds.

Car cest oeil brun qui vint premier esteindre

Le jour des miens, les sceut si bien attaindre,

Qu'autre oeil jamais n'en sera le vainqueur.

Et quant la mort m'aura la vie ostée,

Encor là bas je veulx aymer l'Idée

De ces beaulx yeulx que j'ay fichez au cuoeur.

XXVII

Bien mille fois et mille j'ay tenté

De fredonner sus les nerfz de ma lyre,

Et sus le blanc de cent papiers escrire,

Le nom, qu'Amour dans le cuoeur m'a planté.

Mais tout soubdain je suis espovanté,

Car sa grandeur qui l'esprit me martyre

Sans la chanter arriere me retire

De cent fureurs pantoyment tourmenté.

Je suis semblable à la prestresse folle,

Qui bégue perd la voix et la parolle,

Dessoubz le Dieu qu'elle fuit pour neant.

Ainsi picqué de l'Amour qui me touche

Si fort au cuoeur, la voix fraude ma bouche,

Et voulant dire en vain je suis béant.

XXVIII

Injuste amour, fuzil de toute rage,

Que peult un cuoeur soubmis à ton pouvoyr,

Quand il te plaist par les sens esmouvoyr

Nostre raison qui preside au courage?

Je ne voy pré, fleur, antre, ny rivage,

Champ, roc, ny boys, ny flotz dedans le Loyr,

Que, peinte en eulx, il ne me semble voyr

Ceste beaulté qui me tient en servage.

Ores en forme, ou d'un foudre enflammé,

Ou d'une nef ou d'un Tigre affamé,

Amour la nuict devant mes yeulx la guide:

Mais quand mon bras en songe les poursuit,

Le feu, la nef, et le Tigre s'enfuit,

Et pour le vray je ne pren que le vuide.

XXIX

Si mille oeilletz, si mille liz j'embrasse,

Entortillant mes bras tout alentour,

Plus fort qu'un cep, qui d'un amoureux tour,

La branche aymée impatient enlasse:

Si le souci ne jaunist plus ma face,

Si le plaisir fonde en moy son sejour,

Si j'ayme mieulx les ombres que le jour,

Songe divin, cela vient de ta grace.

Avecque toy je volleroys aux cieulx,

Mais ce portraict qui nage dans mes yeulx,

Fraude tousjours ma joye entrerompuë.

Et tu me fuis au meillieu de mon bien,

Comme l'esclair qui se finist en rien,

Ou comme au vent s'esvanouit la nuë.

XXX

Ange divin, qui mes playes embasme,

Le truchement et le herault des Dieux,

De quelle porte es tu coullé des cieulx

Pour soulager les peines de mon ame?

Toy, quand la nuict comme un fourneau m'enflamme,

Ayant pitié de mon mal soulcieux,

Or dans mes bras, ore dedans mes yeulx,

Tu fais nouer l'idole de ma Dame.

Las, où fuis tu? Atten encor un peu,

Que vainement je me soye repeu

De ce beau sein, dont l'appetit me ronge,

Et de ces flancz qui me font trespasser:

Sinon d'effect, seuffre au moins que par songe

Toute une nuict je les puisse embrasser.

XXXI

Aillez Démons, qui tenez de la terre,

Et du hault ciel justement le meillieu:

Postes divins, divins postes de Dieu,

Qui ses segretz nous apportez grand erre.

Dictes Courriers (ainsi ne vous enserre

Quelque sorcier dans un cerne de feu)

Rasant noz champz, dictes, avous point veu

Ceste beaulté qui tant me fait de guerre?

Si l'un de vous la contemple çà bas,

Libre par l'air il ne refuira pas,

Tant doulcement sa doulce force abuse.

Ou, comme moy, esclave le fera

Ou bien en pierre ell'le transformera

D'un seul regard ainsi qu'une Meduse.

XXXII

Quand au premier la Dame que j'adore

Vint embellir le sejour de noz cieulx,

Le filz de Rhée appella tous les Dieux,

Pour faire encor d'elle une aultre Pandore.

Lors Apollin richement la decore,

Or, de ses raiz luy façonnant les yeulx,

Or, luy donnant son chant melodieux,

Or, son oracle et ses beaulx vers encore.

Mars luy donna sa fiere cruaulté,

Peithon sa voix, Ceres son abondance.

L'Aube ses doigtz et ses crins deliez,

Amour son arc, Thetis donna ses piedz,

Cleion sa gloyre, et Pallas sa prudence.

XXXIII

D'un abusé je ne seroy la fable,

Fable future au peuple survivant,

Si ma raison alloyt bien ensuyvant

L'arrest fatal de ta voix veritable.

Chaste prophete, et vrayment pitoyable,

Pour m'avertir tu me prediz souvent,

Que je mourray, Cassandre, en te servant:

Mais le malheur ne te rend point croyable.

Car ton destin, qui cele mon trespas,

Et qui me force à ne te croyre pas,

D'un faulx espoir tes oracles me cache.

Et si voy bien, veu l'estat où je suis,

Que tu dis vray: toutesfoys je ne puis

D'autour du col me desnouer l'attache.

XXXIV

Las, je me plain de mille et mille et mille

Souspirs, qu'en vain des flancz je vois tirant,

Heureusement mon plaisir martirant

Au fond d'une eau qui de mes pleurs distille.

Puis je me plain d'un portraict inutile,

Ombre du vray que je suis adorant,

Et de ces yeulx qui me vont devorant,

Le cuoeur bruslé d'une flamme gentille.

Mais parsus tout je me plain d'un penser,

Qui trop souvent dans mon cuoeur faict passer

Le souvenir d'une beaulté cruelle,

Et d'un regret qui me pallist si blanc,

Que je n'ay plus en mes veines de sang,

Aux nerfz de force, en mes oz de moëlle.

XXXV

Puisse avenir, qu'une fois je me vange

De ce penser qui devore mon cuoeur,

Et qui tousjours, comme un lion vainqueur,

Soubz soy l'estrangle, et sans pitié le mange.

Avec le temps, le temps mesme se change,

Mais ce cruel qui suçe ma vigueur,

Opiniatre au cours de sa rigueur,

En aultre lieu qu'en mon cuoeur ne se range.

Bien est il vray, qu'il contraint un petit

Durant le jour son segret appetit,

Et dans mes flancz ses griffes il n'allonge:

Mais quand la nuict tient le jour enfermé,

Il sort en queste, et Lion affamé,

De mille dentz toute nuict il me ronge.

XXXVI

Pour la douleur, qu'amour veult que je sente,

Ainsi que moy, Phebus, tu lamentoys,

Quand amoureux, loing du ciel tu chantoys

Pres d'Ilion sus les rives de Xanthe.

Pinçant en vain ta lyre blandissante,

Et fleurs, et flots, mal sain, tu echantoys,

Non la beaulté qu'en l'ame tu sentoys

Dans le plus doulx d'une playe esgrissante.

Là de ton teint se pallissoyent les fleurs,

Et l'eau croissant' du dégout de tes pleurs,

Parloit tes criz, dont elle roulloyt pleine:

Pour mesme nom, les fleuréttes du Loyr,

Pres de Vandosme, et daignent me douloyr,

Et l'eau se plaindre aux souspirs de ma peine.

XXXVII

Les petitz corps, culbutans de travers,

Parmi leur cheute en byaiz vagabonde

Hurtez ensemble, ont composé le monde,

S'entracrochans d'acrochementz divers.

L'ennuy, le soing, et les pensers ouvers,

Chocquans le vain de mon amour profonde,

Ont façonné d'une attache féconde,

Dedans mon cuoeur l'amoureux univers.

Mais s'il avient, que ces tresses orines,

Ces doigtz rosins, et ces mains ivoyrines

Froyssent ma vie, en quoy retournera

Ce petit tout? En eau, air, terre, ou flamme?

Non, mais en voix qui tousjours de ma dame

Par le grand Tout les honneurs sonnera.

XXXVIII

Doulx fut le traict, qu'Amour hors de sa trousse,

Pour me tuer me tira doulcement,

Quand je fuz pris au doulx commencement

D'une doulceur si doulcettement doulce.

Doulx est son ris, et sa voix qui me poulse

L'ame du corps, pour errer lentement,

Devant son chant marié gentement

Avec mes vers animez de son poulce.

Telle doulceur de sa voix coulle à bas,

Que sans l'ouir vrayment on ne scayt pas,

Comme en ses retz Amour nous encordelle:

Sans l'ouir, di-je, Amour mesme enchanter,

Doulcement rire, et doulcement chanter,

Et moy mourir doulcement aupres d'elle.

XXXIX

Pleut il à Dieu n'avoir jamais tâté

Si follement le tetin de m'amie!

Sans lui vraiment l'autre plus grande envie,

Helas! ne m'eut, ne m'eut jamais tanté.

Comme un poisson, pour s'estre trop hâté,

Par un apât, suit la fin de sa vie,

Ainsi je vois où la mort me convie,

D'un beau tetin doucement apâté.

Qui eut pensé, que le cruel destin

Eut enfermé sous un si beau tetin

Un si grand feu, pour m'en faire la proïe?

Avisés donc, quel seroit le coucher

Entre ses bras, puis qu'un simple toucher

De mille mors, innocent, me foudroïe.

XL

Contre mon gré l'atrait de tes beaus yeus

Donte mon coeur, mais quand je te veus dire

Quell'est ma mort, tu ne t'en fais que rire,

Et de mon mal tu as le coeur joïeus.

Puis qu'en t'aimant je ne puis avoir mieus,

Soufre du moins que pour toi je soupire:

Assés et trop ton bel oeil me martire,

Sans te moquer de mon mal soucieus.

Moquer mon mal, rire de ma douleur,

Par un dedain redoubler mon malheur,

Haïr qui t'aime, et vivre de ses pleintes,

Rompre ta foi, manquer de ton devoir,

Cela, cruelle, et n'est-ce pas avoir

Tes mains de sang, et d'homicide teintes?

XLI

Ha, seigneur dieu, que de graces écloses

Dans le jardin de ce sein verdelet,

Enflent le rond de deus gazons de lait,

Où des Amours les fléches sont encloses!

Je me transforme en cent metamorfoses,

Quand je te voi, petit mont jumelet,

Ains du printans un rosier nouvelet,

Qui le matin bienveigne de ses roses.

S'Europe avoit l'estomac aussi beau,

De t'estre fait, Jupiter, un toreau,

Je te pardonne. Hé, que ne sui-je puce!

La baisotant, tous les jours je mordroi

Ses beaus tetins, mais la nuit je voudroi

Que rechanger en homme je me pusse.

XLII

Quand au matin ma Deesse s'abille

D'un riche or crespe ombrageant ses talons,

Et que les retz de ses beaulx cheveux blondz

En cent façons ennonde et entortille:

Je l'accompare à l'escumiere fille,

Qui or peignant les siens jaunement longz,

Or les ridant en mille crespillons

Nageoyt abord dedans une coquille.

De femme humaine encore ne sont pas

Son ris, son front, ses gestes, ny ses pas,

Ny de ses yeulx l'une et l'autre chandelle:

Rocz, eaux, ny boys, ne celent point en eulx

Nymphe, qui ait si follastres cheveux,

Ny l'oeil si beau, ny la bouche si belle.

XLIII

Avec les liz, les oeilletz mesliez,

N'egallent point le pourpre de sa face:

Ny l'or filé ses cheveux ne surpasse,

Ore tressez et ore deliez.

De ses couraux en vouste repliez

Naist le doulx ris qui mes soulciz efface:

Et çà et là par tout où elle passe,

Un pré de fleurs s'esmaille soubz ses piedz.

D'ambre et de musq sa bouche est toute pleine.

Que diray plus? J'ay veu dedans la plaine,

Lors que plus fort le ciel vouloyt tançer,

Cent fois son oeil, qui des Dieux s'est faict maistre,

De Juppiter rasserener la dextre

Ja ja courbé pour sa fouldre eslancer.

XLIV

Ores l'effroy et ores l'esperance,

De ça de là se campent en mon cuoeur,

Or l'une vainq, ores l'autre est vainqueur,

Pareilz en force et en perseverance.

Ores doubteux, ores plain d'asseurance,

Entre l'espoyr et le froyd de la peur,

Heureusement de moy mesme trompeur,

Au cuoeur captif je prometz delivrance.

Verray-je point avant mourir le temps,

Que je tondray la fleur de son printemps,

Soubz qui ma vie à l'ombrage demeure?

Verray-je point qu'en ses bras enlassé,

De trop combatre honnestement lassé,

Honnestement entre ses bras je meure?

XLV

Je voudrois estre Ixion et Tantale,

Dessus la roüe, et dans les eaus là bas:

Et quelque fois presser entre mes bras

Cette beauté qui les anges égale.

(S'ainsin étoit) toute peine fatale

Me seroit douce, et ne me chaudroit pas,

Non d'un vautour fussai-je le repas,

Non, qui le roc remonte et redevale.

Lui tatonner seulement le tetin

Echangeroit l'oscur de mon destin

Au sort meilleur des princes de l'Asie:

Un demi dieu me feroit son baiser,

Et flanc à flanc entre ses bras m'aiser,

Un de ceus là qui mengent l'Ambrosie.

XLVI

Amour me tue, et si je ne veus dire

Le plaisant mal que ce m'est de mourir:

Tant j'ai grand peur, qu'on vueille secourir

Le mal, par qui doucement je soupire.

Il est bien vrai, que ma langueur desire

Qu'avec le tans je me puisse guerir:

Mais je ne veus ma dame requerir

Pour ma santé: tant me plaist mon martire.

Tai toi langueur: je sen venir le jour,

Que ma maistresse, apres si long sejour,

Voiant le soin qui ronge ma pensée,

Toute une nuit, folatrement m'aiant

Entre ses bras, prodigue, ira paiant

Les intérés de ma peine avancée.

XLVII

Je veus mourir pour tes beautés, Maistresse,

Pour ce bel oeil, qui me prit à son hain,

Pour ce dous ris, pour ce baiser tout plein

D'ambre, et de musq, baiser d'une Deesse.

Je veus mourir pour cette blonde tresse,

Pour l'embonpoint de ce trop chaste sein,

Pour la rigueur de cette douce main,

Qui tout d'un coup me guerit et me blesse.

Je veus mourir pour le brun de ce teint,

Pour ce maintien, qui, divin, me contreint

De trop aimer: mais par sus toute chose,

Je veus mourir es amoureus combas,

Souflant l'amour, qu'au coeur je porte enclose

Toute une nuit, au millieu de tes bras.

XLVIII

Dame, depuis que la premiere fléche

De ton bel oeil m'avança la douleur,

Et que sa blanche et sa noire couleur

Forçant ma force, au coeur me firent bréche:

Je sen toujours une amoureuse méche,

Qui se ralume au meillieu de mon coeur,

Dont le beau rai (ainsi comme une fleur

S'écoule au chaut) dessus le pié me séche.

Ni nuit, ne jour, je ne fai que songer,

Limer mon coeur, le mordre et le ronger,

Priant Amour, qu'il me tranche la vie.

Mais lui, qui rit du torment qui me point,

Plus je l'apelle, et plus je le convie,

Plus fait le sourd, et ne me répond point.

XLIX

Ni de son chef le tresor crépelu,

Ni de sa joüe une et l'autre fossette,

Ni l'embonpoint de sa gorge grassette,

Ni son menton rondement fosselu,

Ni son bel oeil que les miens ont voulu

Choisir pour prince à mon ame sugette,

Ni son beau sein, dont l'Archerot me gette

Le plus agu de son trait émoulu,

Ni de son ris les miliers de Charites,

Ni ses beautés en mile coeurs écrites,

N'ont esclavé ma libre affection.

Seul son esprit, où tout le ciel abonde,

Et les torrens de sa douce faconde,

Me font mourir pour sa perfection.

L

Mon dieu, mon dieu, que ma maistresse est belle!

Soit que j'admire ou ses yeus, mes seigneurs,

Ou de son front les dous-graves honneurs,

Ou l'Orient de sa levre jumelle.

Mon dieu, mon dieu, que ma dame est cruelle!

Soit qu'un raport rengrege mes douleurs,

Soit qu'un depit parannise mes pleurs,

Soit qu'un refus mes plaïes renouvelle.

Ainsi le miel de sa douce beauté

Nourrit mon coeur: ainsi sa cruauté

D'aluine amere enamere ma vie.

Ainsi repeu d'un si divers repas,

Ores je vi, ores je ne vi pas

Egal au sort des freres d'Oebalie.

LI

Cent fois le jour, à part moi je repense,

Que c'est qu'Amour, quelle humeur l'entretient,

Quel est son arc, et quelle place il tient

Dedans nos coeurs, et quelle est son essence.

Je conoi bien des astres la puissance,

Je sai, comment la mer fuit, et revient,

Comme en son Tout le Monde se contient:

De lui sans plus me fuit la conoissance.

Si sai-je bien, que c'est un puissant Dieu,

Et que, mobile, ores il prend son lieu

Dedans mon coeur, et ores dans mes veines:

Et que depuis qu'en sa douce prison

Dessous mes sens fit serve ma raison

Toujours, mal sain, je n'ai langui qu'en peines.

LII

Mile, vraiment, et mile voudroient bien,

Et mile encor, ma guerriere Cassandre,

Qu'en te laissant, je me voulusse rendre

Franc de ton ret, pour vivre en leur lien.

Las! mais mon coeur, ainçois qui n'est plus mien,

Comme un vrai serf, ne sauroit plus entendre

A qui l'apelle, et mieus voudroit atendre

Dix mile mors qu'il fût autre que tien.

Tant que la rose en l'epine naitra,

Tant que sous l'eau, la baleine paitra,

Tant que les cerfs aimeront les ramées,

Et tant qu'Amour se nourrira de pleurs,

Toujours au coeur ton nom et tes valeurs,

Et tes beautés me seront imprimées.

LIII

Avant qu'Amour, du Chaos otieux

Ouvrist le sein, qui couvoit la lumiere,

Avec la terre, avec l'onde premiere,

Sans art, sans forme, estoyent brouillez les cieulx.

Ainsi mon tout erroit seditieux

Dans le giron de ma lourde matiere,

Sans art, sans forme, et sans figure entiere,

Alors qu'Amour le perça de ses yeulx.

Il arondit de mes affections

Les petitz corps en leurs perfections,

Il anima mes pensers de sa flamme.

Il me donna la vie, et le pouvoyr,

Et de son branle il fit d'ordre mouvoyr

Les pas suyviz du globe de mon ame.

LIV

Par ne scay quelle estrange inimitié,

J'ay veu tomber mon esperance à terre,

Non de rocher, mais tendre comme verre,

Et mes desirs rompre par la moytié.

Dame où le ciel logea mon amitié,

Pour un flateur qui si laschement erre,

Et pour quoy tant me brasses tu de guerre,

Privant mon cuoeur de ta doulce pitié?

Or s'il te plaist fay moy languir en peine,

Tant que la mort me desnerve et desveine,

Je seray tien: et plus tost le Chaos

Se troublera de sa noyse ancienne,

Que par rigueur aultre amour que la tienne,

Soubz aultre joug me captive le doz.

LV

O doulx parler, dont l'appast doulcereux

Nourrit encor la faim de ma memoire,

O front, d'Amour le Trophée et la gloire

O riz sucrez, o baisers savoureux.

O cheveulx d'or, o coustaulx plantureux

De liz, d'oeilletz, de Porphyre, et d'ivoyre,

O feuz jumeaulx dont le ciel me fit boyre

A si longs traitz le venin amoureux.

O vermeillons, o perlettes encloses,

O diamantz, o liz pourprez de roses,

O chant qui peulx les plus durs esmovoyr,

Et dont l'accent dans les ames demeure.

Et dea beaultez, reviendra jamais l'heure

Qu'entre mes bras je vous puisse r'avoyr?

LVI

Verray-je plus le doulx jour qui m'apporte

Ou trefve ou paix, ou la vie ou la mort,

Pour edenter le souci, qui me mord

Le cuoeur à nud d'une lime si forte?

Verray-je plus que ma Naiade sorte

Du fond de l'eau pour m'enseigner le port?

Nourai-je plus ainsi qu'Ulysse abord

Ayant au flanc son linge pour escorte?

Verray-je plus que ces astres jumeaulx,

En ma faveur encore par les eaulx,

Montrent leur flamme à ma Caréne lasse?

Verray-je point tant de vents s'accorder,

Et calmement mon navire aborder,

Comme il souloit au havre de sa grace.

LVII

Quel dieu malin, quel astre me fit estre,

Et de misere et de tourment si plein?

Quel destin fit, que tousjours je me plain

De la rigueur d'un trop rigoreux maistre?

Quelle des Seurs, à l'heure de mon estre

Noircit le fil de mon sort inhumain?

Et quel Démon d'une senestre main

Berça mon corps quand le ciel me fit naistre.

Heureux ceulx là dont la terre a lez oz,

Heureux vous rien, que la nuict du Chaos

Presse au giron de sa masse brutalle!

Sans sentiment vostre rien est heureux:

Que suis je, las! moy chetif amoureux,

Pour trop sentir, qu'un Sisyphe ou Tantale?

LVIII

Divin Bellay, dont les nombreuses loix,

Par une ardeur du peuple separée,

Ont revestu l'enfant de Cytherée,

D'arc, de flambeau, de traitz et de carquoys:

Si le doulx feu dont chaste tu ardoys

Enflamme encor ta poitrine sacrée,

Si ton oreille encore se recrée

D'ouyr les plaints des amoureuses voix:

Oy ton Ronsard, qui sanglotte et lamente,

Palle, agité des flotz de la tourmente,

Croysant en vain ses mains devers les Dieux,

En fraisle nef, et sans voyle, et sans rame,

Et loing du bord, où pour astre sa Dame

Le conduisoyt du Phare de ses yeulx.

LIX

Quand le Soleil à chef renversé plonge

Son char doré dans le sein du viellard,

Et que la nuict un bandeau sommeillard

Des deux coustez de l'orizon alonge:

Amour adonc qui sape, mine, et ronge

De ma raison le chancelant rempart,

Pour l'assaillir à l'heure à l'heure part,

Armant son camp des ombres et du songe.

Lors ma raison, et lors ce dieu cruel,

Seulz per à per d'un choc continuel

Vont redoublant mille escarmouches fortes:

Si bien qu'Amour n'en seroit le vainqueur,

Sans mes pensers, qui luy ouvrent les portes,

Par la traison que me brasse mon cuoeur.

LX

Comme un chevreuil, quand le printemps destruit

L'oyseux crystal de la morne gelée,

Pour mieulx brouster l'herbette emmielée

Hors de son boys avec l'Aube s'en fuit,

Et seul, et seur, loing de chiens et de bruit,

Or sur un mont, or dans une vallée,

Or pres d'une onde à l'escart recelée,

Libre follastre où son pied le conduit:

De retz ne d'arc sa liberté n'a crainte,

Sinon alors que sa vie est attainte,

D'un trait meurtrier empourpré de son sang:

Ainsi j'alloy sans espoyr de dommage,

Le jour qu'un oeil sur l'avril de mon age

Tira d'un coup mille traitz dans mon flanc.

LXI

Ny voyr flamber au point du jour les roses,

Ny lis planté sus le bord d'un ruisseau,

Ny chant de luth, ny ramage d'oyseau,

Ny dedans l'or les gemmes bien encloses:

Ny des zephyrs les gorgettes descloses,

Ny sur la mer le ronfler d'un vaisseau,

Ny bal de Nymphe au gazouilliz de l'eau,

Ny de mon cuoeur mille metamorphoses:

Ny camp armé de lances herissé,

Ny antre verd de mousse tapissé,

Ny les Sylvains qui les Dryades pressent,

Et ja desja les dontent à leur gré,

Tant de plaisirs ne me donnent qu'un Pré,

Où sans espoyr mes esperances paissent.

LXII

Dedans des Prez je vis une Dryade,

Qui comme fleur s'assisoyt par les fleurs,

Et mignotoyt un chappeau de couleurs,

Eschevelée en simple verdugade.

Des ce jour là ma raison fut malade,

Mon cuoeur pensif; mes yeulx chargez de pleurs,

Moy triste et lent: tel amas de douleurs

En ma franchise imprima son oeillade.

Là je senty dedans mes yeulx voller

Un doulx venin, qui se vint escouler

Au fond de l'ame: et depuis cest oultrage,

Comme un beau lis, au moys de Juin blessé

D'un ray trop chault, languist à chef baissé,

Je me consume au plus verd de mon age.

LXIII

Quand ces beaulx yeulx jugeront que je meure,

Avant mes jours me fouldroyant là-bas,

Et que la Parque aura porté mes pas

A l'aultre flanc de la rive meilleure:

Antres et prez, et vous forestz, à l'heure,

Je vous supply, ne me desdaignez pas,

Ains donnez moy, soubz l'ombre de voz bras,

Quelque repos de paisible demeure.

Puisse avenir qu'un poëte amoureux,

Ayant horreur de mon sort malheureux,

Dans un cyprez notte cest epigramme:

Cy dessoubz gist un amant vandomoys,

Que la douleur tua dedans ce boys:

Pour aymer trop les beaux yeullx de sa dame.

LXIV

Qui vouldra voyr dedans une jeunesse,

La beaulté jointe avec la chasteté,

L'humble doulceur, la grave magesté,

Toutes vertus, et toute gentillesse:

Qui vouldra voyr les yeulx d'une deesse,

Et de noz ans la seule nouveauté,

De ceste Dame oeillade la beaulté,

Que le vulgaire appelle ma maistresse.

Il apprendra comme Amour rid et mord,

Comme il guarit, comme il donne la mort,

Puis il dira voyant chose si belle:

Heureux vrayment, heureux qui peult avoyr

Heureusement cest heur que de la voyr,

Et plus heureux qui meurt pour l'amour d'elle.

LXV

Tant de couleurs le grand arc ne varie

Contre le front du Soleil radieux,

Lors que Junon, par un temps pluvieux,

Renverse l'eau dont sa mere est nourrie:

Ne Juppiter armant sa main marrie

En tant d'esclairs ne fait rougir les cieulx,

Lors qu'il punist d'un fouldre audacieux

Les montz d'Epire, ou l'orgueil de Carie:

Ny le Soleil ne rayonne si beau,

Quand au matin il nous monstre un flambeau,

Pur, net, et clayr, comme je vy ma Dame

De cent couleurs son visage acoustrer,

Flamber ses yeulx, et claire se monstrer,

Le premier jour qu'elle ravit mon ame.

LXVI

Quand j'aperçoy ton beau chef jaunissant,

Qui l'or filé des Charites efface,

Et ton bel oeil qui les astres surpasse,

Et ton beau sein chastement rougissant:

A front baissé je pleure gemissant,

De quoy je suis (pardon digne de grace)

Soubz l'humble voix de ma rime si basse,

De tes beaultez les honneurs trahissant.

Je cognoy bien que je devroy me taire,

Ou mieux parler: mais l'amoureux ulcere

Qui m'ard le cuoeur, me force de chanter.

Doncque (mon Tout) si dignement je n'use

L'encre et la voix à tes graces vanter,

Non l'ouvrier, non, mais son destin accuse.

LXVII

Ciel, air, et vents, plains et montz descouvers,

Tertres fourchuz, et forestz verdoyantes,

Rivages tortz, et sources ondoyantes,

Taillis razez, et vous bocages verds,

Antres moussus à demyfront ouvers,

Prez, boutons, fleurs, et herbes rousoyantes,

Coustaux vineux, et plages blondoyantes,

Gastine, Loyr, et vous mes tristes vers:

Puis qu'au partir, rongé de soing et d'ire,

A ce bel oeil, l'Adieu je n'ay sceu dire,

Qui pres et loing me detient en esmoy:

Je vous supply, Ciel, ait, ventz, montz et plaines,

Tailliz, forestz, rivages et fontaines,

Antres, prez, fleurs, dictes le luy pour moy.

LXVIII

Voïant les yeus de toi, Maitresse elüe,

A qui j'ai dit, seule à mon coeur tu plais,

D'un si dous fruit mon ame je repais,

Que plus en mange, et plus en est goulüe.

Amour qui seul les bons espris englüe,

Et qui ne daigne ailleurs perdre ses trais,

M'alege tant du moindre de tes rais,

Qu'il m'a du coeur toute peine tolüe.

Non, ce n'est point une peine qu'aimer:

C'est un beau mal, et son feu dous-amer

Plus doucement qu'amerement nous brûle.

O moi deus fois, voire trois bienheureus,

S'Amour m'occit, et si avec Tibulle

J'erre là-bas sous le bois amoureus.

LXIX

L'oeil qui rendroit le plus barbare apris,

Qui tout orgueil en humblesse destrampe,

Par la vertu de ne sçay quelle trampe

Qui sainctement affine les espritz,

M'a tellement de ses beaultez espris,

Qu'autre beaulté dessus mon coeur ne rampe,

Et m'est avis, sans voyr un jour la lampe

De ses beaulx yeulx, que la mort me tient pris.

Cela vrayment, que l'air est aux oyseaulx,

Les boys aux cerfz, et aux poissons les eaux,

Son bel oeil m'est. O lumiere enrichie

D'un feu divin qui m'ard si vivement,

Pour me donner et force et mouvement,

N'este vous pas ma seulle Endelechie?

LXX

De quelle plante, ou de quelle racine,

De quel unguent, ou de quelle liqueur,

Oindroy-je bien la playe de mon cuoeur

Qui d'oz en oz incurable chemine?

Ny vers charmez, pierre, ny medecine,

Drogue, ny just, ne romproyent ma langueur,

Tant je sen moindre et moindre ma vigueur,

Ja me traisner dans la Barque voysine.

Las, toy qui scays des herbes le pouvoyr,

Et qui la playe au cuoeur m'as faict avoyr,

Guary le mal, que ta beaulté me livre:

De tes beaulx yeulx allege mon soucy,

Et par pitié retien encor ici

Ce pauvre amant qu'Amour soulle de vivre.

LXXI

Ja desja Mars ma trompe avoit choisie,

Et, dans mes vers ja françoys, devisoyt:

Sus ma fureur ja sa lance aiguizoit,

Epoinçonnant ma brave poësie.

Ja d'une horreur la Gaule estoit saisie,

Et soubz le fer ja Sene treluisoit,

Et ja Francus à son bord conduisoit

L'ombre d'Hector, et l'honneur de l'Asie,

Quand l'archerot emplumé par le dos

D'un trait certain me playant jusqu'à l'os,

De sa grandeur le sainct prestre m'ordonne:

Armes adieu. Le Myrte Paphien

Ne cede point au Laurier Delphien,

Quand de sa main Amour mesme le donne.

LXXII

Petit nombril, que mon penser adore,

Non pas mon oeil, qui n'eu onques ce bien,

Nombril de qui l'honneur merite bien,

Qu'une grand'ville on luy bastisse encore

Signe divin, qui divinement ore

Retiens encore l'Androgyne lien,

Combien et toy, mon mignon, et combien

Tes flancs jumeaulx follastrement j'honore!

Ny ce beau chef, ny ces yeulx, ny ce front,

Ny ce doulx ris; ny ceste main qui fond

Mon cuoeur en source, et de pleurs me fait riche,

Ne me sçauroyent de leur beau contenter,

Sans esperer quelque foys de taster

Ton paradis, où mon plaisir se niche.

LXXIII

Que n'ay-je, Dame, et la plume et la grace

Divine autant que j'ay la volonté,

Par mes escritz tu seroys surmonté,

Vieil enchanteur des vieulx rochers de Thrace

Plus hault encor que Pindare, ou qu'Horace,

J'appenderoys à ta divinité

Un livre enflé de telle gravité,

Que Du Bellay luy quitteroyt la place.

Si vive encor Laure par l'Univers

Ne fuit volant dessus les Thusques vers,

Que nostre siecle heureusement estime,

Comme ton nom, honneur des vers françoys,

Hault elevé par le vent de ma voix

S'en voleroyt sus l'aisle de ma rime.

LXXIV

Du tout changé ma Circe enchanteresse

Dedens ses fers m'enferre emprisonné,

Non par le goust d'un vin empoisonné,

Ny par le just d'une herbe pecheresse.

Du fin Gregeoys l'espée vangeresse,

Et le Moly par Mercure ordonné,

En peu de temps du breuvage donné,

Forcerent bien la force charmeresse,

Si qu'à la fin le Dulyche troupeau

Reprint l'honneur de sa premiere peau,

Et sa prudence auparavant peu caute:

Mais pour la mienne en son lieu reloger,

Ne me vaudroyt la bague de Roger,

Tant ma raison s'aveugle dans ma faulte.

LXXV

Les Elementz, et les Astres, à preuve

Ont façonné les raiz de mon Soleil,

Et de son teint le cinabre vermeil,

Qui ça ne là son parangon ne treuve.

Des l'onde Ibere où nostre jour s'abreuve

Jusques au lict de son premier reveil,

Amour ne voyt un miracle pareil,

N'en qui le Ciel tant de ses graces pleuve.

Son oeil premier m'apprit que c'est d'aymer:

Il vint premier ma jeunesse animer

A la vertu, par ses flammes dardées.

Par luy mon cuoeur premierement s'aisla,

Et loing du peuple à l'escart s'en vola

Jusque au giron des plus belles Idées.

LXXVI

Je parangonne à voz yeulx ce crystal,

Qui va mirer le meurtrier de mon ame:

Vive par l'air il esclate une flamme

Vos yeulx un feu qui m'est sainct et fatal.

Heureux miroer, tout ainsi que mon mal

Vient de trop voyr la beaulté qui m'enflamme:

Comme je fay, de trop mirer ma Dame

Tu languiras d'un sentiment egal.

Et toutesfoys, envieux, je t'admire,

D'aller mirer le miroer où se mire

Tout l'univers dedans luy remiré.

Va donc miroer, va donq, et pren bien garde,

Qu'en le mirant ainsi que moy ne t'arde

Pour avoir trop ses beaulx yeulx admiré.

LXXVII

J'ai cent fois épreuvé les remedes d'Ovide,

Et si je les épreuve encore tous les jours,

Pour voir, si je pourrai de mes vieilles amours,

Qui trop m'ardent le coeur, avoir l'estomac vuide:

Mais cet amadoüeur, qui me tient à la bride,

Me voïant aprocher du lieu de mon secours,

Maugré moi tout soudain fait vanoïer mon cours,

Et d'où je vins mal sain, mal sain il me reguide.

Hà, poëte Romain, il te fut bien aisé,

Quand d'une courtisane on se voit embrasé,

Donner quelque remede, affin qu'on s'en depestre:

Mais cettui là qui voit les yeux de mon Soleil,

Qui n'a de chasteté, ni d'honneur son pareil,

Plus il est son esclave, et plus il le veut estre.

LXXVIII

Ni les combats des amoureuses nuits

Ni les plaisirs que les amours conçoivent

Ni les faveurs que les amans reçoivent

Ne valent pas un seul de mes ennuis.

Heureus ennui, en toi seulet je puis

Trouver repos des maus qui me deçoivent:

Et par toi seul mes passions reçoivent

Le dous obli du torment où je suis.

Bienheureus soit mon torment qui n'empire,

Et le dous jou, sous lequel je respire,

Et bienheureus le penser soucieus,

Qui me repait du dous souvenir d'elle:

Et plus heureus le foudre de ses yeux,

Qui cuit mon coeur dans un feu qui me gelle.

LXXIX

A ton frere Paris tu sembles en beauté,

A ta soeur Polyxene en chaste conscience,

A ton frere Helenin en profete science,

A ton parjure aïeul en peu de loiauté.

A ton pere Priam en meurs de roïauté,

Au vieillart Antenor en mieleuse eloquence,

A ta tante Antigone en superbe arrogance,

A ton grand frere Hector en fiere cruauté.

Neptune n'assit onc une pierre si dure

Dans tes murs, que tu es, pour qui la mort j'endure:

Ny des Grecs outragés, l'exercite vainqueur

N'emplit tant Ilion de feus, de cris, et d'armes

De soupirs, et de pleurs, que tu combles mon coeur

De brasiers, et de morts, de sanglos et de larmes.

LXXX

Si je trépasse entre tes bras, Madame,

Il me suffit, car je ne veus avoir

Plus grand honneur, sinon que de me voir

En te baisant, dans ton sein rendre l'ame.

Celui que Mars horriblement enflamme

Aille à la guerre, et manque de pouvoir,

Et jeune d'ans, s'ébate à recevoir

En sa poitrine une Espaignole lame;

Mais moi, plus froid, je ne requier, sinon

Apres cent ans, sans gloire, et sans renom,

Mourir oisif en ton giron, Cassandre:

Car je me trompe, ou c'est plus de bonheur,

Mourir ainsi, que d'avoir tout l'honneur,

Pour vivre peu, d'un guerrier Alexandre.

LXXXI

Pour voyr ensemble et les champs et le bord,

Où ma guerriere avec mon cuoeur demeure,

Alme Soleil, demain avant ton heure,

Monte à cheval, et galope bien fort:

Ainçoys les champs, où l'amyable effort

De ses beaulx yeulx, ordonne que je meure,

Si doulcement, qu'il n'est vie meilleure

Que les souspirs d'une si doulce mort.

A costé droit, sus le bord d'un rivage,

Reluit à part l'angelique visage,

Que trop avare ardentement je veulx:

Là ne se voyot, roc, source, ny verdure,

Qui dans son teint or ne me r'affigure

L'une ses yeulx, or l'autre ses cheveux.

LXXXII

Pardonne moy, Platon, si je ne cuide

Que soubz la vouste et grande arche des dieux,

Soit hors du monde, ou au centre des lieux,

En terre, en l'eau, il n'y ayt quelque vuide.

Si l'air est plein en sa courbure humide,

Qui reçoyt donq tant de pleurs de mes yeulx,

Tant de souspirs, que je sanglote aux cieulx,

Lors qu'à mon dueil Amour lasche la bride?

Il est du vague, ou certes s'il n'en est,

D'un air pressé le comblement ne naist:

Plus tost le ciel, qui bening se dispose

A recevoir l'effect de mes douleurs,

De toutes partz se comble de mes pleurs,

Et de mes vers qu'en mourant je compose.

LXXXIII

L'onde et le feu, ce sont de la machine

Les deux seigneurs que je sen pleinement,

Seigneurs divins; et qui divinement

Ce faix divin ont chargé sus l'eschine.

Toute matiere, essence, et origine

Doibt son principe à ces deux seulement,

Touts deux en moy vivent esgallement,

En eulx je vi, rien qu'eulx je n'imagine.

Aussi de moy il ne sort rien que d'eulx,

Et tour à tour en moy naissent touts deux:

Car quand mes yeulx de trop pleurer j'appaise,

Rasserénant les flotz de mes douleurs,

Lors de mon cuoeur s'exhale une fournaise,

Puis tout soubdain recommancent mes pleurs.

LXXXIV

Si l'escrivian de la mutine armée,

Eut veu tes yeulx, qui serf me tiennent pris,

Les faictz de Mars il n'eut jamais empris,

Et le Duc Grec fut mort sans renommée.

Et si Paris, qui vit en la valée

La grand'beaulté dont son cuoeur fut espris,

Eut veu la tienne, il t'eut donné le pris,

Et sans honneur Venus s'en fut allée.

Mais s'il advient ou par le vueil des Cieulx,

Ou par le traict qui sort de tes beaulx yeulx,

Qu'en publiant ma prise, et ta conqueste,

Oultre la Tane on m'entende crier,

Iö, iö, quel myrte, ou quel laurier

Sera bastant pour enlasser ma teste?

LXXXV

Pour celebrer des astres devestuz

L'heur escoulé dans celle qui me lime,

Et pour louer son esprit, qui n'estime

Que le divin des divines vertuz:

Et ses regardz, ains traitz d'amour pointuz,

Que son bel oeil au fond du cuoeur m'imprime,

Il me fauldroyt non l'ardeur de ma rime,

Mais la fureur du Masconnoys Pontus.

Il me fauldroyt ceste chanson divine

Qui transforma sus la rive Angevine

L'olive palle en un teint plus naïf,

Et me fauldroyt un Desautelz encore,

Et cestuy là qui sa Meline adore

En vers dorez le biendisant Bayf.

LXXXVI

Estre indigent, et donner tout le sien,

Se feindre un ris, avoir le cuoeur en pleinte,

Hayr le vray, aymer la chose feinte,

Posseder tout et ne jouir de rien:

Estre delivre, et traisner son lien,

Estre vaillant, et couharder de crainte,

Vouloir mourir, et vivre par contraincte,

De cent travaulx ne recevoir un bien:

Avoir tousjours, pour un servil hommage,

La honte au front, en la main le dommage:

A ses pensers d'un courage haultain

Ourdir sans cesse une nouvelle trame,

Sont les effetz qui logent dans mon ame

L'espoir doubteux, et le tourment certain.

LXXXVII

Oeil, qui portrait dedans les miens reposes,

Comme un Soleil, le dieu de ma clarté:

Ris, qui forçant ma doulce liberté

Me transformas en cent metamorphoses:

Larme, vrayment qui mes souspirs arroses,

Quand tu languis de me veoir mal traicté:

Main, qui mon cuoeur captives arresté

Parmy ton lis, ton ivoyre et tes roses,

Je suis tant vostre, et tant l'affection

M'a peint au vif vostre perfection,

Que ny le temps, ny la mort tant soit forte,

Ne fera point qu'au centre de mon sein,

Tousjours gravéz en l'ame je ne porte

Un oeil, un ris, une larme, une main.

LXXXVIII

Si seulement l'image de la chose

Fait à noz yeulx la chose concevoir,

Et si mon oeil n'a puissance de veoir,

Si quelqu'idole au devant ne s'oppose:

Que ne m'a faict celuy, qui tout compose,

Les yeulx plus grandz, affin de mieux pouvoir

En leur grandeur la grandeur recevoir

Du simulachre, où ma vie est enclose?

Certes le ciel trop ingrat de son bien,

Qui seul la fit, et qui seul veit combien

De sa beaulté divine estoit l'idée,

Comme jaloux du tresor de son mieux,

Silla le Monde, et m'aveugla les yeulx,

Pour de luy seul seule estre regardée.

LXXXIX

Soubz le cristal d'une argenteuse rive,

Au moys d'Avril, une perle je vy,

Dont la clarté m'a tellement ravy

Qu'en mes discours aultre penser n'arrive.

Sa rondeur fut d'une blancheur naïve,

Et ses rayons treluysoyent à l'envy:

Son lustre encor ne m'a point assouvy,

Ny ne fera, non, non, tant que je vive.

Cent et cent foys pour la pescher à bas,

Tout recoursé, je devalle le bras,

Et ja desja content je la tenoye,

Sans un archer, qui du bout de son arc

A front panché me plongeant soubz le lac,

Frauda mes doigtz d'une si doulce proye.

XC

Soit que son or se crespe lentement

Ou soit qu'il vague en deux glissantes ondes,

Qui çà qui là par le sein vagabondes,

Et sur le col, nagent follastrement:

Ou soit qu'un noud diapré tortement

De maintz rubiz, et maintes perles rondes,

Serre les flotz de ses deux tresses blondes,

Je me contente en mon contentement.

Quel plaisir est ce, ainçoys quelle merveille

Quand ses cheveux troussez dessus l'oreille

D'une Venus imitent la façon?

Quand d'un bonet son chef elle adonize,

Et qu'on ne sçait (tant bien elle desguise

Son chef doubteux) s'elle est fille ou garçon?

XCI

De ses cheveulx la rousoyante Aurore

Eparsement les Indes remplissoyt,

Et ja le ciel à longz traitz rougissoyt

De meint esmail qui le matin decore,

Quand elle veit la Nymphe que j'adore

Tresser son chef, dont l'or, qui jaunissoit,

Le crespe honneur du sien esblouissoit,

Voire elle mesme et tout le ciel encore.

Lors ses cheveux vergongneuse arracha,

Si qu'en pleurant sa face elle cacha,

Tant la beaulté des beaultez luy ennuye:

Et ses souspirs parmy l'air se suyvantz,

Troys jours entiers enfanterent des ventz,

Sa honte un feu, et ses yeulx une pluye.

XCII

Avéques moi pleurer vous devriés bien,

Tertres bessons, pour la facheuse absence

De cette là, qui fut par sa presence

Vôtre Soleil, ainçois qui fut le mien.

Las! de quels maus, Amour, et de combien

Une beauté ma peine recompense!

Quand plein de honte à toute heure je pense

Qu'en un moment j'ai perdu tout mon bien.

Or, à dieu donc beauté qui me dédaigne:

Quelque rocher, quelque bois, ou montaigne

Vous pourra bien éloigner de mes yeus:

Mais non du coeur, que pront il ne vous suive,

Et que dans vous, plus que dans moi, ne vive,

Comme en la part qu'il aime beaucoup mieus.

XCIII

Tout me déplait, mais rien ne m'est si gref,

Que ne voir point les beaus yeus de ma Dame,

Qui des plaisirs les plus dous de mon ame

Avéques eus ont emporté la clef.

Un torrent d'eau s'écoule de mon chef:

Et tout confus de soupirs je me pâme,

Perdant le feu, dont la drillante flame

Seule guidoit de mes pensers la nef.

Depuis le jour, que je senti sa braise,

Autre beauté je n'ai veu, qui me plaise,

Ni ne verrai. Mais bien puissai-je voir

Qu'avant mourir seulement cette Fere

D'un seul tour d'oeil promette un peu d'espoir

Au coup d'Amour, dont je me desespere.

XCIV

Quand je vous voi, ou quand je pense en vous,

Je ne sçai quoi dans le coeur me fretille,

Qui me pointelle, et tout d'un coup me pille

L'esprit emblé d'un ravissement dous.

Je tremble tout de nerfs et de genous:

Comme la cire au feu, je me distile,

Sous mes souspirs: et ma force inutile

Me laisse froid, sans haleine et sans pous.

Je semble au mort, qu'on devale en la fosse,

Ou à celui qui d'une fievre grosse

Perd le cerveau, dont les esprits mués

Révent cela, qui plus leur est contraire.

Ainsi, mourant, je ne sçauroi tant faire,

Que je ne pense en vous, qui me tués.

XCV

Morne de cors, et plus morne d'espris

Je me trainoi' dans une masse morte,

Et sans sçavoir combien la Muse aporte

D'honneur aus siens, je l'avois à mépris:

Mais aussi tôt, que de vous je m'épris,

Tout aussi tôt vôtre oeil me fut escorte

A la vertu, voire de telle sorte

Que d'ignorant je devin bien apris.

Donques mon Tout, si je fai quelque chose,

Si dignement de vos yeus je compose,

Vous me causés vous mesmes ces effets.

Je pren de vous mes graces plus parfaites,

Car je suis manque, et dedans moi vous faites,

Si je fai bien, tout le bien que je fais.

XCVI

Las! sans la voir, à toute heure je voi

Cette beauté dedans mon coeur presente:

Ni mont, ni bois, ni fleuve ne m'exente

Que par pensée elle ne parle à moi.

Dame, qui sais ma constance et ma foi,

Voi, s'il te plait, que le tans qui s'absente

Depuis set ans en rien ne desaugmente

Le plaisant mal que j'endure pour toi.

De l'endurer lassé je ne suis pas,

Ni ne seroi', tombassai-je là bas,

Pour mile fois en mile cors renaitre:

Mais de mon coeur, sans plus, je suis lassé,

Qui me déplait, et qui plus ne peut estre

Mien, comme il fut, puis que tu l'as chassé.

XCVII

Dans un sablon la semence j'épan,

Je sonde en vain les abymes d'un goufre:

Sans qu'on m'invite à toute heure je m'oufre,

Et sans loïer mon âge je dépan.

A son portrait pour un veu je m'apan:

Devant son feu mon coeur se change en soufre,

Et pour ses yeus cruellement je soufre

Dis mile maus, et d'un ne me repan.

Qui sçauroit bien, quelle trampe a ma vie,

D'estre amoureus n'auroit jamais envie.

Je tremble j'ars, je me pai d'un amer,

Qui plus qu'aluine est rempli d'amertume:

Je vi d'ennui, de deuil je me consume:

En tel estat je suis pour trop aimer.

XCVIII

Devant les yeus, nuit et jour, me revient

L'idole saint de l'angelique face,

Soit que j'écrive, ou soit que j'entrelasse

Mes vers au luth, toujours il m'en souvient.

Voiés pour dieu, comme un bel oeil me tient

En sa prison, et point ne me delasse;

Et comme il prend mon coeur dedans sa nasse,

Qui de pensée, à mon dam, l'entretient.

O le grand mal, quand une affection

Peint nôtre esprit de quelque impression!

J'enten alors que l'Amour ne dédaigne

Suttilement l'engraver de son trait:

Toujours au coeur nous revient ce portrait,

Et maugré nous toujours nous acompaigne.

XCIX

Chanson

D'un gosier machelaurier

J'oi crier

Dans Lycofron ma Cassandre,

Qui profetise aus Troïens

Les moïens

Qui les tapiront en cendre.

Mais ces pauvres obstinés,

Destinés

Pour ne croire à ma Sibylle,

Virent, bien que tard, apres,

Les feus Grecs

Forcenés parmi leur ville.

Aïans la mort dans le sein,

De leur main.

Plomboient leur poitrine nue:

Et tordant leurs cheveux gris,

De lons cris

Pleuroient, qu'ils ne l'avoient creüe.

Mais leurs cris n'eurent pouvoir

D'émouvoir

Les Grecs si chargés de proïe,

Qu'ils ne laisserent sinon,

Que le nom

De ce qui fut jadis Troïe.

Ainsi pour ne croire pas,

Quand tu m'as

Prédit ma peine future,

Et que je n'aurois en don

Pour guerdon

De t'aimer, que la mort dure,

Un grand brasier sans repos,

Et mes os

Et mes nerfs, et mon coeur brûle:

Et pour t'amour j'ai receu

Plus de feu,

Que ne fit Troïe incredule.

C

Apres ton cours je ne haste mes pas

Pour te souiller d'une amour deshonneste:

Demeure donq: le Locroys m'amonneste

Aux bords Gyrez de ne te forcer pas.

Neptune oyant ses blasphemes d'abas,

Accabla là son impudique teste

D'un grand rocher au fort de la tempeste.

Le ciel conduit le meschant au trespas.

Il te voulut, le meschant, violer,

Lors que la peur te faisoit acoller

Les piedz vangeurs de sa Grecque Minerve:

Moy je ne veulx qu'à ta grandeur offrir

Ce chaste cuoeur, s'il te plaist de souffrir

Qu'en l'immolant de victime il te serve.

CI

Picqué du nom qui me glace en ardeur,

Me souvenant de ma doulce Charite,

Ici je plante une plante d'eslite,

Qui l'esmeraude efface de verdeur.

Tout ornement de royalle grandeur,

Beaulté, sçavoir, honneur, grace, et merite,

Sont pour racine à ceste Marguerite

Qui ciel et terre emparfume d'odeur.

Divine fleur, où ma vie demeure,

La manne tombe à toute heure à toute heure

Dessus ton front sans cesse nouvelét:

Jamais de toy la pucelle n'aproche,

La mousche à miel, ne la faucille croche

Ny les ergotz d'un follastre aignelét.

CII

Depuis le jour, que le trait otieux

Grava ton nom au roc de ma memoire,

Et que l'ardeur qui flamboit en ta gloire

Me fit sentir le fouldre de tes yeulx:

Mon cuoeur attaint d'un esclair rigoreux

Pour eviter le feu de ta victoire,

S'alla cacher dans tes ondes d'ivoire,

Et soubz l'abri de tes flancz amoureux.

Là point ou peu soucieux de ma playe

De ça de là par tes flotz il s'esgaye,

Puis il se seiche aux raix de ton flambeau:

Et s'emmurant dedans leur forteresse,

Seul, palle et froid, sans retourner, me laisse,

Comme un esprit qui fuit de son tombeau.

CIII

Le mal est grand, le remede est si bref

A ma douleur qui jamais ne s'alente,

Que bas ne hault, des le bout de la plante,

Je n'ay santé, jusqu'au sommét du chef.

L'oeil qui tenoit de mes pensers la clef,

En lieu de m'estre une estoile drillante,

Parmy les flotz d'une mer violente,

Contre un orgueil a faict rompre ma néf.

Un soing meurtrier soit que je veille ou songe,

Tigre affamé, le cuoeur me mange et ronge,

Suçant tousjours le plus doulx de mon sang,

Et le penser qui me presse et represse,

Et qui jamais en repos ne me laisse,

Comme un mastin, me mord tousjours au flanc.

CIV

Amour, si plus ma fiebvre se renforce,

Si plus ton arc tire pour me blesser,

Avant mes jours, j'ay grand'peur de laisser

Le verd fardeau de cette jeune escorse.

Ja de mon cuoeur je sen moindre la force

Se transmuer pour sa mort avancer

Devant le feu de mon ardent penser,

Non en boys verd, mais en pouldre d'amorce.

Bien fut pour moy le jour malencontreux,

Quand je humay le bruvage amoureux,

Qu'à si longz traictz me versoit une oeillade:

O fortuné! si pour me secourir,

Des le jour mesme Amour m'eust faict mourir,

Sans me tenir si longuement malade.

CV

Si doulcement le souvenir me tente

De la mieleuse et fieleuse saison,

Où je perdi la loy de ma raison,

Qu'autre douleur ma peine ne contente.

Je ne veulx point en la playe de tente

Qu'Amour me fit, pour avoir guarison,

Et ne veulx point, qu'on m'ouvre la prison,

Pour affranchir autre part mon attente.

Plus que venin je fuy la liberté,

Tant j'ay grand peur de me voyr escarté

Du doulx lien qui doulcement offense:

Et m'est honneur de me voyr martirer,

Soubz un espoyr quelquefoys de tirer

Un seul baiser pour tout recompense.

CVI

Amour archer d'une tirade ront

Cent traitz sur moy, et si ne me conforte

D'un seul espoir, celle pour qui je porte

Le cuoeur aux yeulx, les pensers sus le front.

D'un Soleil part la glace qui me fond,

Et m'esbays que ma froydeur n'est morte

Au feu d'un oeil, qui d'une flamme accorte

Brulle mon cuoeur d'un ulcere profond.

En tel estat je voy languir ma vie,

Qu'aux plus chetifz ma langueur porte envie,

Tant le mal croist et le cuoeur me deffault:

Mais la douleur qui plus comble mon ame

D'un vain espoyr, c'est qu'Amour et Madame

Scavent mon mal, et si ne leur en chault.

CVII

Je vy ma Nymphe entre cent damoyselles,

Comme un Croyssant par les menuz flambeaulx,

Et de ses yeulx plus que les astres beaulx

Faire obscurcir la beaulté des plus belles.

Dedans son sein les graces immortelles,

La Gaillardize, et les freres jumeaux,

Alloyent vollant comme petitz oyseaux

Par my le verd des branches plus nouvelles.

Le ciel ravy, que son chant esmouvoyt,

Roses, et liz, et girlandes pleuvoyt

Tout au rond d'elle au meillieu de la place:

Si qu'en despit de l'hyver froydureux,

Par la vertu de ses yeulx amoureux,

Un beau printemps s'esclouit de sa face.

CVIII

Plus mile fois que nul or terrien,

J'aime ce front où mon Tyran se joüe

Et le vermeil de cette belle joüe,

Qui fait honteux le pourpre Tyrien.

Toutes beautés à mes yeus ne sont rien,

Au pris du sein qui lentement secoüe

Son gorgerin, sous qui per à per noüe

Le branle égal d'un flot Cytherien.

Ne plus, ne moins, que Juppiter est aise,

Quand de son luth quelque Muse l'apaise,

Ainsi je suis de ses chansons épris,

Lors qu'à son luth ses doits elle embesongne,

Et qu'elle dit le branle de Bourgongne,

Qu'elle disoit, le jour que je fus pris.

CIX

Celle qui est de mes yeus adorée,

Qui me fait vivre entre mile trespas,

Chassant un cerf, suivoit hier mes pas,

Com'ceus d'Adon Cyprine la dorée:

Quand une ronce en vain enamourée,

Ainsi que moi, du vermeil de ses bras,

En les baisant, lui fit couler à bas

Une liqueur de pourpre colorée.

La terre adonc, qui, soigneuse, receut

Ce sang divin, tout sus l'heure conceut

Pareille au sang une rouge fleurette:

Et tout ainsi que d'Helene naquit

La fleur, qui d'elle un beau surnom aquit,

Du nom Cassandre elle eut nom Cassandrette.

CX

Sur mes vint ans, pur d'offence, et de vice,

Guidé, mal caut, d'un trop aveugle oiseau,

Aiant encor le menton damoiseau,

Sain et gaillard je vins à ton service:

Ores forcé de ta longue malice,

Je m'en retourne avec une autre peau,

En chef grison, en perte de mon beau:

Et pour t'aimer il faut que je perisse.

Helas! que di-je? où veus-je retourner?

En autre part je ne puis sejourner,

Ni vivre ailleurs, ni d'autre amour me paître.

Demeuron donc dans le camp fortement:

Et puis qu'au moins veinqueur je ne puis estre,

Que l'arme au poin je meure honnestement.

CXI

Franc de travail une heure je n'ay peu

Vivre, depuis que les yeulx de ma Dame

Mielleusement verserent dans mon ame

Le doulx venin, dont mon cuoeur fut repeu:

Ma chere neige, et mon cher et doulx feu,

Voyez comment je m'englace et m'enflamme:

Comme la cire aux rayons d'une flamme,

Je me consume, et vous en chault bien peu.

Bien est il vray, que ma vie est heureuse

De s'escouler doulcement langoureuse,

Desoubz votre oeil, qui jour et nuict me poingt.

Mais si fault il que vostre bonté pense,

Que l'amitié d'amitié se compense

Et qu'un Amour sans frere ne croyst point.

CXII

D'amour ministre, et de perseverance,

Qui jusqu'au fond l'ame peulx esmouvoyr,

Et qui les yeulx d'un aveugle sçavoyr,

Et qui les cuoeurs voyles d'une ignorance,

Vaten ailleurs chercher ta demeurance.

Vaten ailleurs quelqu'autre decevoyr,

Je ne veulx plus chez moy te recevoyr,

Malencontreuse et meschante esperance.

Quand Juppiter, ce lasche criminel,

Teingnit ses mains dans le sang paternel,

Desrobant l'or de la terre où nous sommes,

Il te laissa, Harpye, et salle oyseau,

Cropir au fond du Pandorin vaisseau,

Pour enfieller le plus doulx miel des hommes.

CXIII

Franc de raison, esclave de fureur,

Je voys chassant une Fére sauvage,

Or sur un mont, or le long d'un rivage,

Or dans le boys de jeunesse et d'erreur.

J'ay pour ma lesse un cordeau de malheur,

J'ay pour limier un trop ardent courage,

J'ay pour mes chiens, et le soing, et la rage,

La cruaulté, la peine et la douleur.

Mais eulx voyant que plus elle est chassée,

Loing loing devant plus s'enfuit eslancée,

Tournant sur moy la dent de leur effort,

Comme mastins affamez de repaistre,

A longz morceaux se paissent de leur maistre,

Et sans mercy me traisnent à la mort.

CXIV

Le Ciel ne veut, Dame, que je joüisse

De ce dous bien que dessert mon devoir:

Aussi ne veus-je, et ne me plaît d'avoir

Sinon du mal en vous faisant service.

Puis qu'il vous plaît, que pour vous je languisse,

Je suis heureus, et ne puis recevoir

Plus grand honneur, qu'en mourant, de me voir

Faire à vos yeus de mon coeur sacrifice.

Donc si ma main, maugré moi, quelque fois

De l'amour chaste outrepasse les lois

Dans vôtre sein cherchant ce qui m'embraise,

Punissés la du foudre de vos yeus,

Et la brulés: car j'aime beaucoup mieus

Vivre sans main, que ma main vous déplaise.

CXV

Bien que six ans soyent ja coulez derriere,

Depuis le jour, que l'homicide trait

Au fond du cuoeur m'engrava le portrait

D'une humblefiere, et fierehumble guerriere,

Si suis-je heureux d'avoyr veu la lumiere

En ces ans tardz pour avoyr veu le trait

De son beau front, qui les graces attrait

Par une grace aux Graces coustumiere.

Le seul Avril de son jeune printemps,

Endore, emperle, enfrange nostre temps,

Qui n'a sceu voyr la beaulté de la belle,

Ny la vertu, qui foysonne en ses yeulx:

Seul je l'ay veue, aussi je meur pour elle,

Et plus grand heur ne m'ont donné les cieulx.

CXVI

Si ce grand Dieu le pere de la lyre,

Qui va bornant aux Indes son reveil,

Ains qui d'un oeil, mal apris au sommeil,

De ça de là, toutes choses remire,

Lamente encor, pour le bien où j'aspire,

Ne suis je heureux, puisque le trait pareil,

Qui d'oultre en oultre entame le Soleil,

Mon cuoeur entame à semblable martire?

Dea, que mon mal contente mon plaisir,

D'avoyr osé pour compaignon choysir

Un si grand Dieu: ainsi par la campagne,

Le boeuf courbé desoubz le joug pesant,

Traisne le faix plus leger et plaisant,

Quand son travail d'un aultre s'acompagne.

CXVII

Ce petit chien, qui ma maistresse suit,

Et qui jappant ne recognoyst personne,

Et cest oyseau, qui me plaintes resonne,

Au moys d'Avril, souspirant toute nuit:

Et ceste pierre, où quand le chault s'enfuit

Seule aparsoy pensive s'arraisonne,

Et ce jardin, où son poulce moyssonne!

Touts les tresors que Zephyre produit:

Et ceste dance, où la flesche cruelle

M'outreperça, et la saison nouvelle

Qui tous les ans rafraischit mes douleurs,

Et son oeillade, et sa parolle saincte,

Et dans le cuoeur sa grace que j'ay peinte,

Baignent mon sein de deux ruisseaux de pleurs.

CXVIII

Entre tes bras, impatient Roger,

Pipé du fard de magicque cautelle,

Pour refroydir ta chaleur immortelle,

Au soyr bien tard Alcine vint loger.

Opiniatre à ton feu soulager,

Ore planant, ore nouant sus elle,

Dedans le gué d'une beaulté si belle,

Toute une nuit tu apris à nager.

En peu de temps, le gracieux Zephyre,

Heureusement empoupant ton navire,

Te fit surgir dans le port amoureux:

Mais quand ma nef de s'aborder est preste

Tousjours plus loing quelque horrible tempeste

La single en mer, tant je suis malheureux.

CXIX

Je te hay, peuple, et m'en sert de tesmoing,

Le Loyr, Gastine, et les rives de Braye,

Et la Neuffaune, et l'humide saulaye,

Qui de Sabut borne l'extreme coin.

Quand je me perdz entre deux montz bien loing,

M'arraisonnant seul à l'heure j'essaye

De soulager la douleur de ma playe,

Qu'Amour encherne au plus vif de mon soing.

Là pas à pas, Dame, je rememore

Ton front, ta bouche, et les graces encore

De tes beaulx yeulx trop fidelles archers:

Puis figurant ta belle idoleifeinte

Dedans quelque eau, je sanglote une pleinte,

Qui fait gemir le plus dur des rochers.

CXX

Non la chaleur de la terre, qui fume

Béant de soif au creux de son profond,

Non l'Avantchien, qui tarit jusqu'au fond

Les tiedes eaux, qu'ardent de soif il hume:

Non ce flambeau qui tout ce monde allume

D'un bluëtter qui lentement se fond,

Bref ny l'esté, ny ses flammes ne font

Ce chault brazier qui m'embraize et consume.

Vos chastes feux, espriz de vos beaulx yeux,

Vos doulx esclairs qui rechauffent les dieux,

Seulz de mon feu eternizent la flamme:

Et soit Phebus attelé pour marcher

Devers le Cancre, ou bien devers l'Archer,

Vostre oeil me fait un esté dans mon ame.

CXXI

Ny ce coral, qui double se compasse,

Sur meinte perle entée doublement,

Ny ceste bouche où vit fertillement

Un mont d'odeurs qui le Liban surpasse,

Ny ce bel or qui frisé s'entrelasse

En mille noudz mignardez gayement,

Ny ces oeilletz esgalez unyment

Au blanc des liz encharnez dans sa face,

Ny de ce front le beau ciel esclarci,

Ny le double arc de ce double sourci,

N'ont à la mort ma vie abandonnée:

Seulz voz beaulx yeulx (*où le certain archer,

Pour me tuer, d'aguet se vint cacher*)

Devant le soir finissent ma journée.

CXXII

De toy, Paschal, il me plaist que j'escrive,

Qui de bien loing le peuple abandonnant,

Vas du Arpin les tresors moyssonnant,

Le long des bordz où ta Garonne arrive.

Hault d'une langue eternellement vive,

Son cher Paschal Tolouse aille sonnant,

Paschal Paschal Garonne resonnant,

Rien que Paschal ne responde sa rive.

Si ton Durban, l'honneur de nostre temps,

Lit quelque foys ces vers par passetemps,

Di luy, Paschal (ainsi l'aspre secousse

Qui m'a fait cheoir, ne te puisse esmouvoir):

Ce pauvre Amant estoit digne d'avoir

Une maistresse ou moins belle, ou plus doulce.

CXXIII

Dy l'un des deux, sans tant me desguiser

Le peu d'amour que ton semblant me porte:

Je ne scauroy, veu ma peine si forte,

Tant lamener ne tant petrarquiser.

Si tu le veulx, que sert de refuser

Ce doulx present dont l'espoir me conforte?

Si non, pourquoy, d'une esperance morte

Pais tu ma vie affin de l'abuser?

L'un de tes yeulx dans les enfers me ruë,

L'aultre à l'envy tour à tour s'esvertue

De me rejoindre en paradis encor:

Ainsi tes yeulx pour causer mon renaistre,

Et puis ma mort, sans cesse me font estre

Ore un Pollux, et ores un Castor.

CXXIV

L'an mil cinq cent contant quarante et six,

Dans ses cheveux une beaulté cruëlle,

(Ne sçay quel plus, las, ou cruelle ou belle)

Lia mon cuoeur de ses graces épris.

Lors je pensoy, comme sot mal appris,

Né pour souffrir une peine immortelle,

Que les crespons de leur blonde cautelle

Deux ou troys jours sans plus me tiendroyent pris:

L'an est passé, et l'autre commence ores

Où je me voy plus que devant encores

Pris dans leurs retz: et quand parfoys la mort.

Veult delacer le lien de ma peine,

Amour tousjours pour l'ennouer plus fort,

Oingt ma douleur d'une esperance vaine

CXXV

A toy chaque an j'ordonne un sacrifice

Fidelle coing, où tremblant et poureux,

Je descouvry le travail langoureux,

Que j'enduroy, Dame, en vostre service.

Un coing vrayment, plus seur ne plus propice

A deceler un tourment amoureux,

N'est point dans Cypre, ou dans les plus heureux

Vergers de Gnide, Amathonte, ou d'Eryce.

Eussé-je l'or d'un peuple ambicieux,

Tu toucherois, nouveau temple, les cieux,

Elabouré d'une merveille grande:

Et là dressant à ma Nymphe un autel,

Sur les pilliers de son nom immortel,

J'appenderoy mon ame pour offrande.

CXXVI

Le pensement, qui me fait devenir

Haultain et brave, est si doulx que mon ame

Desja desja impuissante, se pasme,

Yvre du bien qui me doibt avenir.

Sans mourir donq, pourray-je soustenir

Le doulx combat, que me garde Madame,

Puis qu'un penser si brusquement l'entame,

Du seul plaisir d'un si doulx souvenir?

Helas, Venus, que l'escume féconde,

Non loing de Cypre, enfanta dessus l'onde,

Si de fortune en ce combat je meurs,

Reçoy ma vie, o deesse, et la guide

Parmy l'odeur de tes plus belles fleurs,

Dans les vergers du paradis de Gnide.

CXXVII

Quand en songeant ma follastre j'acolle,

Laissant mes flancz sus les siens s'allonger,

Et que d'un bransle habillement leger,

En sa moytié ma moytié je recolle:

Amour adonq si follement m'affolle,

Qu'un tel abus je ne vouldroy changer,

Non au butin d'un rivage estranger,

Non au sablon qui jaunoye en Pactole.

Mon dieu, quel heur, et quel contentement,

M'a fait sentir ce faux recollement,

Changeant ma vie en cent metamorphoses:

Combien de fois doulcement irrité,

Suis-je ore mort, ore resuscité,

Parmy l'odeur de mile et mile roses?

CXXVIII

O de Nepenthe, et de lyesse pleine,

Chambrette heureuse, où deux heureux flambeaux,

Les plus ardentz du ciel, et les plus beaulx,

Me font escorte apres si longue peine.

Or je pardonne à la mer inhumaine,

Aux flotz, aux ventz, la traison de mes maulx,

Puis que par tant et par tant de travaulx,

Une main doulce à si doulx port me meine.

Adieu tourmente, à dieu naufrage, à dieu,

Vous flotz cruelz, ayeux du petit Dieu,

Qui dans mon sang a sa flesche souillée:

Ores encré dedans le sein du port,

Par voeu promis, j'appen dessus le bord

Aux dieux marins ma despouille mouillée

CXXIX

Je parangonne à ta jeune beaulté,

Qui tousjours dure en son printemps nouvelle,

Ce moys d'Avril, qui ses fleurs renouvelle,

En sa plus gaye et verte nouveaulté.

Loing devant toy fuyra la cruaulté,

Devant luy fuit la saison plus cruelle.

Il est tout beau, ta face est toute belle,

Ferme est son cours, ferme est ta loyaulté.

Il peint les champs de dix mille couleurs,

Tu peins mes vers d'un long esmail de fleurs.

D'un doulx zephyre il fait onder les plaines,

Et toy mon cuoeur d'un souspir larmoyant.

D'un beau crystal son front est rousoyant,

Tu fais sortir de mes yeulx deux fontaines.

CXXX

Ce ne sont qu'haims, qu'amorces et qu'appastz,

De son bel oeil qui m'alesche en sa nasse,

Soyt qu'elle rie, ou soyt qu'elle compasse

Au son du Luth le nombre de ses pas.

Une mynuit tant de flambeaux n'a pas,

Ny tant de sable en Euripe ne passe,

Que de beaultez embellissent sa grace,

Pour qui j'endure un millier de trespaz.

Mais le tourment, qui moyssonne ma vie,

Est si plaisant que je n'ay point envie

De m'eslongner de sa doulce langueur:

Ains face Amour, que mort encores j'aye

L'aigre doulceur de l'amoureuse playe,

Que deux beaulx yeulx m'encharnent dans le cuoeur.

CXXXI

Oeil, qui mes pleurs de tes rayons essuye',

Sourci, mais ciel des autres le greigneur,

Front estoylé, Trophée à mon Seigneur,

Qui dans ton jour ses despouilles étuye:

Gorge de marbre, où la beaulté s'appuye,

Col Albastrin emperlé de bonheur,

Tetin d'ivoyre où se niche l'honneur,

Sein dont l'espoyr mes travaulx desennuye:

Vous avez tant appasté mon desir,

Que pour souler la faim de son plaisir,

Et nuict et jour il fault qu'il vous revoye.

Comme un oyseau, quine peult sejourner,

Sans revoler, tourner, et retourner,

Aux bordz congneuz pour y trouver sa proye.

CXXXII

Haulse ton aisle, et d'un voler plus ample,

Forçant des ventz l'audace et le pouvoir,

Fay, Denisot, tes plumes esmouvoir,

Jusques au ciel où les dieux ont leur temple.

Là, d'oeil d'Argus, leurs deitez contemple,

Contemple aussi leur grace, et leur sçavoir,

Et pour ma Dame au parfait concevoir,

Sur les plus beaulx fantastique un exemple.

Moissonne apres le teint de mille fleurs,

Et les detrampe en l'argent de mes pleurs,

Que tiedement hors de mon chef je ruë:

Puis attachant ton esprit et tes yeulx

Dans le patron desrobé sur les dieux,

Pein, Denisot, la beaulté qui me tuë.

CXXXIII

Ville de Bloys, le sejour de Madame,

Le nid des Roys et de ma voulonté,

Où je suis pris, où je suis surmonté,

Par un oeil brun qui m'oultreperce l'ame:

Sus le plus hault de sa divine flamme,

Pres de l'honneur, en grave magesté,

Reveremment se sied la chasteté,

Qui tout bon cuoeur de ses vertuz enflamme.

Se loge Amour dans tes murs pour jamais,

Et son carquoys, et son arc desormais

Pendent en toy, comme autel de sa gloire:

Puisse il tousjours soubz ses plumes couver

Ton chef royal, et nud tousjours laver

Le sien crespu dans l'argent de ton Loyre.

CXXXIV

Heureuse fut l'estoille fortunée,

Qui d'un bon oeil ma maistresse apperceut:

Heureux le bers, et la main qui la sceut

Emmailloter alors qu'elle fut née.

Heureuse fut la mammelle emmannée,

De qui le laict premier elle receut,

Et bienheureux le ventre, qui conceut

Si grand beaulté de si grandz dons ornée.

Heureux les champs qui eurent cest honneur

De la voir naistre, et de qui le bon heur

L'Inde et l'Egypte heureusement excelle.

Heureux le filz dont grosse elle sera,

Mais plus heureux celuy qui la fera

Et femme et mere, en lieu d'une pucelle.

CXXXV

L'astre ascendant, soubz qui je pris naissance,

De son regard ne maistrisoyt les cieux;

Quand je nasquis il coula dans tes yeulx,

Futurs tyrans de mon obeissance.

Mon tout, mon bien, mon heur, ma cognoissance,

Vint de ses raiz: car pour nous lier mieulx,

Tant nous unit son feu presagieux,

Que de nous deux il ne fit qu'une essence,

En toy je suis, et tu es dedans moy,

En moy tu vis, et je vis dedans toy:

Ainsi noz toutz ne font qu'un petit monde.

Sans vivre en toy je tomberoy là bas:

La Salemandre, en ce point, ne vit pas

Perdant sa flamme, et le Daulphin son onde.

CXXXVI

De ton poil d'or en tressés blondissant,

Amour ourdit de son arc la ficelle,

Il me tira de ta vive estincelle,

Le doulx fier traict, qui me tient languissant.

Du premier coup j'eusse esté perissant,

Sans l'autre coup d'une flesche nouvelle,

Qui mon ulcere en santé renouvelle,

Et par son coup le coup va guarissant.

Ainsi jadis sur la pouldre Troyenne

Du souldard Grec la hache pelienne,

Du Mysien mit la douleur à fin:

Ainsi le trait que ton bel oeil me ruë,

D'un mesme coup me garit et me tuë.

Hé, quelle Parque a filé mon destin!

CXXXVII

Ce ris plus doulx que l'oeuvre d'une abeille,

Ces doubles liz doublement argentez,

Ces diamantz à double ranc plantez

Dans le coral de sa bouche vermeille,

Ce doulx parler qui les mourantz esveille,

Ce chant qui tient mes soucis enchantez,

Et ces deux cieulx sur deux astres antez,

De ma Deesse annoncent la merveille.

Du beau jardin de son printemps riant,

Naist un parfum, qui mesme l'orient

Embasmeroit de ses doulces aleines.

Et de là sort le charme d'une voix,

Qui touts raviz fait sauteler les boys,

Planer les montz, et montaigner les plaines.

CXXXVIII

Dieux, si là hault s'enthrosne la pitié,

En ma faveur ores, ores, qu'on jette

Du feu vangeur la meurtriere sagette,

Pour d'un mauvais punir la mauvaistié,

Qui seul m'espie, et seul mon amitié

Va detraquant, lors que la nuict segrette,

Et mon ardeur honteusement discrette,

Guident mes pas où m'attent ma Moytié.

Accablez, Dieux, d'une juste tempeste

L'oeil espion de sa parjure teste,

Dont le regard toutes les nuictz me suit:

Ou luy donnez l'aveugle destinée

Qui aveugla le malheureux Phinée,

Pour ne veoir rien qu'une eternelle nuict.

CXXXIX

J'iray tousjours et resvant et songeant

En la doulce heure, où je vy l'angelette,

Qui d'esperance et de crainte m'alaitte,

Et dans ses yeulx mes destins va logeant.

Quel or ondé en tresses s'allongeant

Frapoit ce jour sa gorge nouvelette,

Et sus son col, ainsi qu'une ondelette

Flotte aux zephyrs, au vent alloit nageant?

Ce n'estoit point une mortelle femme,

Que je vis lors, ny de mortelle dame

Elle n'avoit ny le front ny les yeulx:

Donques, mon cuoeur, ce ne fut chose estrange

Si je fu pris: c'estoyt vrayment un Ange

Qui pour nous prendre estoit vollé des cieulx.

CXL

Espovanté je cherche une fontaine

Pour expier un horrible songer,

Qui toute nuict ne m'a faict que ronger

L'ame effroyée au travail de ma peine.

Il me sembloyt que ma doulce inhumaine

Crioit, Amy sauve moy du danger,

Auquel par force un larron estranger

Par les forestz prisonniere m'emmeine.

Lors en sursault, où me guidoit la voix,

Le fer au poing je brossay dans le boys,

Mais en courant apres la desrobée,

Du larron mesme assallir me suis veu,

Qui me perçant le cuoeur de mon espée

M'a fait tomber dans un torrent de feu.

CXLI

Chanson

Las, je n'eusse jamais pensé

Veu les ennuiz de ma langueur,

Que tu m'eusses recompensé

D'une si cruelle rigueur:

Mais puis qu'Amour me chasse à tort,

Ma seule alegence est la mort.

Si fortuné j'eusse apperçu

Quand je te vy premierement,

Le mal que j'ai depuis receu

Pour te servir loyalement:

Mon cuoeur qui franc avoyt vescu,

N'eust pas esté pris ne vaincu.

Mais la doulceur de tes beaulx yeulx,

Cent fois asseura mon debvoir,

De me donner encore mieulx

Que les miens n'esperoient avoyr:

La vaine attente d'un tel bien

A transformé mon aise en rien.

Si tost que je vy ta beaulté,

Je me sentis naistre un desir

D'assubjetir ma loyaulté

Soubz l'empire de ton plaisir,

Et des ce jour l'amoureux trait

Au cuoeur m'engrava ton pourtrait.

Ce fut, Dame, ton bel acueil,

Qui pour me rendre serviteur,

M'ouvrit par la clef de ton oeil

Le paradis de ta grandeur,

Que ta saincte perfection

Peignit dans mon affection.

Et lors pour hostage de moy

Desja profondement blessé,

Mon cuoeur plain de loyale foy

En garde à tes yeulx je laissé:

Et fus bien aise de l'offrir,

Pour le veoyr doulcement soufrir.

Bien qu'il endure jours et nuictz

Mainte amoureuse aversité,

Le plus cruel de ses ennuiz

Luy semble une felicité:

Et ne sçauroit jamais vouloyr

Qu'autre amour le face douloyr.

Un grand rocher qui a le dos

Et les piedz toujours oultragez

Ore des vens, ore des flos

En leurs tempestes enragez,

N'est point si ferme que mon cuoeur

Contre le choc de ta rigueur.

Car luy de plus en plus aymant

Ta grace, et ton honnesteté,

Semble au pourtrait d'un diamant,

Qui pour garder sa fermeté,

Se rompt plus tost soubz le marteau,

Que se voyr tailler de nouveau.

Aussi ne l'or qui peult tenter,

Ny autre grace, ny maintien,

Ne scauroient dans mon cuoeur enter

Un autre portrait que le tien,

Et plus tost il mourroit d'ennuy

Que d'en soufrir une autre en luy.

Il ne fault point pour empescher

Qu'une autre dame en ayt sa part,

L'environner d'un grand rocher,

Ou d'une fosse, ou d'un rempart,

Amour te l'a si bien conquis

Que plus il ne peult estre aquis.

Chanson, les estoilles seront

La nuict sans les cieulx allumer,

Et plus tost les ventz cesseront

De tempester dessus la mer,

Que l'orgueil de sa cruaulté

Puisse esbranler ma loyaulté.

CXLII

Un voyle obscur par l'orizon espars

Troubloyt le ciel d'une humeur survenue,

Et l'air crevé d'une graisle menue

Frappoyt à bonds les champz de toutes partz:

Desja Vulcan les bras de ses souldardz

Hastoyt despit à leur forge cognue,

Et Juppiter dans le creux d'une nue

Armoyt sa main de l'esclair de ses dardz:

Quand ma Nymphette en simple verdugade

Cueillant des fleurs, des raiz de son oeillade

Essuya l'air grelleux et pluvieux,

Des ventz sortiz remprisonna les tropes,

Et ralenta les marteaux des Cyclopes,

Et de Jupin rasserena les yeulx.

CXLIII

En aultre part les deux flambeaux de celle

Qui m'esclairoyt sont allez faire jour,

Voyre un midi, qui d'un stable sejour,

Sans annuiter dans les cuoeurs estincelle.

Et que ne sont et d'une et d'une aultre aille

Mes deux coustez emplumez alentour?

Hault par le ciel soubz l'escorte d'Amour

Je volleroy comme un Cygne, aupres d'elle.

De ses deux raiz ayant percé le flanc,

J'empourpreroy mes plumes dans mon sang

Pour tesmoigner la peine que j'endure:

Et suis certain que ma triste langueur

Emouveroyt non seulement son cuoeur

De mes soupirs, mais une roche dure.

CXLIV

Si tu ne veulx les astres despiter

En ton malheur, ne metz point en arriere

L'humble souspir de mon humble priere:

La priere est fille de Juppiter.

Quiconque veult la priere eviter

Jamais n'acheve une jeunesse entiere,

Et voyt tousjours de son audace fiere

Jusqu'aux enfers l'orgueil precipiter.

Pour ce, orgueilleuse, eschape cest orage:

Mollis un peu le roc de ton courage

Aux longz souspirs de ma triste langueur:

Tousjours le ciel, tousjours l'eau n'est venteuse,

Tousjours ne doyt ta beaulté despiteuse

Contre ma playe endurcit sa rigueur.

CXLV

Entre mes bras qu'ores ores n'arrive

Celle qui tient ma playe en sa verdeur,

Et ma pensée en gelante tiedeur,

Sur le tapis de ceste herbeuse rive?

Et que n'est elle une Nymphe native

De quelque boys? par l'ombreuse froydeur

Nouveau Sylvain j'allenteroys l'ardeur

Du feu qui m'ard d'une flamme trop vive.

Et pourquoy, Cieulx, l'arrest de vos destins

Ne m'a fait naistre un de ces Paladins

Qui seulz portoyent en crope les pucelles?

Et qui tastant, baizant, et devisant,

Loing de l'envie, et loing du mesdisant,

Dieux, par les boys vivoyent avecques elles?

CXLVI

Que tout par tout dorenavant se mue:

Soyt desormais Amour soulé de pleurs

Des chesnes durs puissent naistre les fleurs,

Au choc des ventz l'eau ne soyt plus esmue,

Du cuoeur des rocz le miel degoute et sue,

Soyent du printemps semblables les couleurs,

L'esté soyt froid, l'hyver plein de chaleurs,

De foy la terre en toutz endroytz soyt nue:

Tout soyt changé, puisque le noud si fort

Qui m'estraignoyt, et que la seule mort

Devoyt couper, ma Dame veult deffaire.

Pourquoy d'Amour mesprises tu la loy?

Pourquoy fais tu ce qui ne se peult faire?

Pourquoy romps tu si faulsement ta foy?

CXLVII

Lune à l'oeil brun, la dame aux noyrs chevaulx

Qui çà qui là, qui hault qui bas te tournent,

Et de retours, qui jamais ne sejournent,

Traisnent ton char eternel en travaux:

A tes desseings les miens ne sont esgaux,

Car les amours qui ton cuoeur epoinçonnent,

Et ceulx aussi qui mon cuoeur aiguillonnent,

Divers souhaitz desirent à leurs maulx.

Toy mignotant ton dormeur de Latmie,

Tu vouldroys bien qu'une course endormie

Emblast le train de ton char qui s'enfuit:

Mais moy qu'Amour toute la nuit devore,

Las, des le soyr je souhaite l'Aurore,

Pour voyr le jour, que me celoyt ta nuit.

CXLVIII

Une diverse amoureuse langueur,

Sans se meurir dans mon ame verdoye,

Dedans mes yeulx une fontaine ondoye,

Un Montgibel s'enflamme dans mon cuoeur.

L'un de son feu, l'autre de sa liqueur,

Ore me gele, et ore me fouldroye,

Et l'un et l'autre à son tour me guerroye,

Sans que l'un soyt dessus l'autre vainqueur.

Fais Amour fay, qu'un des deux ayt la place,

Ou le seul feu, ou bien la seule glace,

Et par l'un d'eux metz fin à ce debat:

J'ay seigneur j'ay, j'ay de mourir envie,

Mais deux venins n'etouffent point la vie

Tandis que l'un à l'autre se combat.

CXLIX

Puis que cet oeil qui fidelement baille

Ses loix aux miens, sur les miens plus ne luict,

L'obscur m'est jour, le jour m'est une nuict,

Tant son absence asprement me travaille.

Le lit me semble un dur camp de bataille,

Rien ne me plaist, toute chose me nuit,

Et ce penser, qui me suit et resuit,

Presse mon cuoeur plus fort qu'une tenaille.

Ja prez du Loyr entre cent mille fleurs

Soullé d'ennuiz, de regretz et de pleurs,

J'eusse mis fin à mon angoysse forte,

Sans quelque dieu, qui mon oeil va tournant

Vers le païs où tu es sejournant,

Dont le bel air sans plus me reconforte.

CL

Comme le chault ou dedans Erymanthe,

Ou sus Rhodope ou sus un autre mont,

En beau crystal le blanc des neiges fond

Par sa tiedeur lentement vehemente:

Ainsi tes yeulx (*eclair qui me tourmente*)

Qui cire et neige à leur regard me font,

Touchans les miens ja distillez les ont

En un ruisseau, qui de mes pleurs s'augmente.

Herbes ne fleurs ne sejournent aupres,

Ains des Soucis, des Ifz, et des Cypres,

Ny d'un verd gay sa rive n'est point pleine.

Les autres eaux par les prez vont roulant,

Mais ceste ci par mon sein va coulant,

Qui nuict et jour bruit et rebruit ma peine.

CLI

De soingz mordentz et de soucis divers,

Soyt sans repos ta paupiere eveillée,

Ta levre soyt d'un noyr venin mouillée,

Tes cheveulx soyent de viperes couvers.

Du sang infait de ces groz lezards vers

Soyt ta poictrine et ta gorge souillée,

Et d'une oeillade obliquement rouillée

Tant que vouldras guigne moy de travers.

Tousjours au ciel je leveray la teste,

Et d'un escrit qui bruit comme tempeste

Je foudroyray de tes Monstres l'effort:

Autant de foys que tu seras leur guide

Pour m'assaillir dans le seur de mon fort;

Autant de foys me sentiras Alcide.

CLII

De ceste doulce et fielleuse pasture,

Dont le surnom s'appelle trop aymer,

Qui m'est et sucre, et riagas amer,

Sans me souler je pren ma nourriture.

Car ce bel oeil, qui force ma nature,

D'un si long jeun m'a tant faict epasmer,

Que je ne puis ma faim desaffamer,

Qu'au seul regard d'une vaine peinture.

Plus je la voy, moins souler je m'en puis,

Un vray Narcisse en misere je suis:

Hé qu'Amour est une cruelle chose!

Je cognoy bien qu'il me fera mourir,

Et si ne puis ma douleur secourir,

Tant j'ay sa peste en mes veines enclose.

CLIII

Que laschement vous me trompez, mes yeulx,

Enamourez d'une figure vaine:

O nouveaulté d'une cruelle peine,

O fier destin, ô malice des cieulx.

Fault il que moy de moymesme envieux,

Pour aymer trop les eaux d'une fontaine,

Je brusle apres une image incertaine,

Qui pour ma mort m'accompaigne en toutz lieux?

Et quoy fault il que le vain de ma face,

De membre à membre amenuiser me face,

Comme une cire aux raiz de la chaleur?

Ainsi pleuroyt l'amoureux Cephiside,

Quand il sentit dessus le bord humide,

De son beau sang naistre une belle fleur.

CLIV

En ma douleur, las chetif, je me plais,

Soyt quand la nuict les feux du ciel augmente,

Ou quand l'Aurore enjonche d'Amaranthe

Le jour meslé d'un long fleurage espais.

D'un joyeux dueil sans faim je me repais:

En quelque part où seulet je m'absente,

Devant mes yeulx je voy tousjours presente,

Celle qui cause et ma guerre, et ma paix.

Pour l'aymer trop egalement j'endure

Ore un plaisir, ore une peine dure,

Qui d'ordre egal viennent mon cuoeur saisir:

Et d'un tel miel mon absynthe est si pleine,

Qu'autant me plaist le plaisir que la peine,

La peine autant comme fait le plaisir.

CLV

Or que Juppin epoint de sa semence,

Hume à longz traitz les feux accoustumez,

Et que du chault de ses rains allumez,

L'humide sein de Junon ensemence:

Or que la mer, or que la vehemence

Des ventz fait place aux grandz vaisseaux armez,

Et que l'oyseau parmy les boys ramez

Du Thracien les tançons recommence:

Or que les prez, et ore que les fleurs,

De mille et mille et de mille couleurs,

Peignent le sein de la terre si gaye,

Seul, et pensif, aux rochers plus segretz,

D'un cuoeur muét je conte mes regretz,

Et par les boys je voys celant ma playe.

CLVI

Ayant par mort mon cuoeur desalié

De son subject, et l'estincele esteinte

J'alloy chantant, et la chorde desceinte,

Qui si long temps m'avoyt ars, et lié

Puis je disoy, Et quelle aultre moytié,

Apres la mort de ma moytié si saincte,

D'un nouveau feu, et d'une neuve estrainte,

Ardra, noura ma seconde amitié?

Quand je senti le plus froid de mon ame

Se rembraser d'une nouvelle flamme,

Encordelée es retz Idaliens:

Amour reveult pour eschauffer ma glace,

Qu'aultre oeil me brusle, et qu'aultre main m'enlasse,

O flamme heureuse, o plus qu'heureux liens.

CLVII

Puissé-je avoir ceste Fére aussi vive

Entre mes bras, qu'elle est vive en mon cuoeur:

Un seul moment gariroit ma langueur,

Et ma douleur feroit aller à rive.

Plus elle court, et plus elle est fuytive,

Par le sentier d'audace, et de rigueur,

Plus je me lasse, et recreu de vigueur,

Je marche apres d'une jambe tardive.

Au moins escoute et rallente tes paz:

Comme veneur je ne te poursuy pas,

Ou comme archer qui blesse à l'impourveue:

Mais comme amy piteusement touché

Du fer cruel, qu'Amour m'a decoché,

Faisant un trait des beaulx raiz de ta veue.

CLVIII

Contre le ciel mon cuoeur estoit rebelle,

Quand le destin, que forçer je ne puis

Me traisna voyr la Dame à qui je suis,

Ains que vestir ceste escorce nouvelle.

Un chaud adonq de moelle en moëlle,

De nerfz en nerfz, de conduitz en conduitz,

Vint à mon cuoeur, dont j'ay vescu depuis,

Or en plaisir, or en peine cruelle.

Si qu'en voyant ses beaultez, et combien

Elle est divine, il me resouvint bien

L'avoir jadis en paradis laissée;

Car des le jour que j'en refu blessé,

Soit pres ou loing, je n'ay jamais cessé

De l'adorer de fait, ou de pensée.

CLIX

Voyci le bois, que ma sainte Angelette

Sus le printemps anime de son chant.

Voyci les fleurs que son pied va marchant,

Lors que pensive elle s'esbat seullette.

Iö voici la prée verdelette,

Qui prend vigueur de sa main la touchant,

Quand pas à pas pillarde va cherchant

Le bel esmail de l'herbe nouvelette.

Ici chanter, là pleurer je la vy,

Ici soubrire, et là je fus ravy

De ses beaulx yeulx par lesquelz je desvie:

Ici s'asseoir, là je la vi dancer:

Sus le mestier d'un si vague penser

Amour ourdit les trames de ma vie.

CLX

Saincte Gastine, heureuse secretaire

De mes ennuis, qui respons en ton bois,

Ores en haulte, ores en basse voix,

Aux longz souspirs que mon cuoeur ne peult taire:

Loyr, qui refrains la course voulontaire

Du plus courant de tes flotz vandomoys,

Quand acuser ceste beaulté tu m'ois,

De qui tousjours je m'affame et m'altere:

Si dextrement l'augure j'ay receu,

Et si mon oeil ne fut hyer deceu

Des doulx regardz de ma doulce Thalie,

Dorenavant poete me ferez,

Et par la France appellez vous serez,

L'un mon laurier, l'aultre ma Castalie.

CLXI

En ce pandant que tu frappes au but

De la vertu, qui n'a point sa seconde,

Et qu'à longz traitz tu t'enyvres de l'onde

Que l'Ascrean entre les Muses but,

Ici, Bayf, où le mont de Sabut

Charge de vins son espaulle féconde,

Pensif je voy la fuite vagabonde

Du Loyr qui traisne à la mer son tribut.

Ores un antre, or un desert sauvage,

Ore me plaist le segret d'un rivage,

Pour essayer de tromper mon ennuy:

Mais quelque horreur de forest qui me tienne,

Faire ne puis qu'Amour tousjours ne vienne,

Parlant à moy, et moy tousjours à luy.

CLXII

Quel bien auray-je apres avoir esté

Si longuement privé des yeulx de celle,

Qui le Soleil de leur vive estincelle

Rendroyent honteux au plus beau jour d'Esté?

Et quel plaisir, voyant le ciel vousté

De ce beau front, qui les beaultez recelle,

Et ce col blanc, qui de blancheur excelle

Un mont de laict sus le jonc cailloté?

Comme du Grec la troppe errante et sotte,

Afriandée aux doulceurs de la Lote,

Sans plus partir vouloyent là séjourner:

Ainsi j'ay peur, que ma trop friande ame,

R'affriandée aux doulceurs de Madame

Ne veille plus dedans moy retourner.

CLXIII

Puis que je n'ay pour faire ma retraitte.

Du Labyrinth qui me va seduysant,

Comme Thesée, un filet conduysant

Mes paz doubteux dans les erreurs de Crete:

Eussé-je au moins une poinctrine faicte,

Ou de crystal, ou de verre luysant,

Lors tu serois dedans mon cuoeur lisant,

De quelle foy mon amour est parfaite.

Si tu sçavois de quelle affection

Je suis captif de ta perfection,

La mort seroit un confort à ma plainte:

Et lors peult-estre esprise de pitié,

Tu pousserois sur ma despouille esteinte,

Quelque souspir de tardive amitié.

CLXIV

Hà, Belacueil, que ta doulce parolle

Vint traistrement ma jeunesse offenser

Quand au premier tu l'amenas dancer,

Dans le verger, l'amoureuse carolle.

Amour adonq me mit à son escolle,

Ayant pour maistre un peu sage penser,

Qui des le jour me mena commencer

Le chapelet de la danse plus folle.

Depuis cinq ans dedans ce beau verger,

Je voys balant avecque faulx danger,

Soubz la chanson d'Allegez moy Madame

Le tabourin se nommoit fol plaisir,

La fluste erreur, le rebec vain desir,

Et les cinq pas la perte de mon ame.

CLXV

En escrimant un Démon m'eslança

Le mousse fil d'une arme rabatue,

Qui de sa pointe aux aultres non pointue,

Jusques à l'os le coulde m'offença.

Ja tout le bras à seigner commença,

Quand par pitié la beaulté qui me tue,

De l'estancher soigneuse s'evertuë,

Et de ses doigtz ma playe elle pança.

Las, di-je lors, si tu as quelque envie

De soulager les playes de ma vie,

Et luy donner sa premiere vigueur,

Non ceste ci, mais de ta pitié sonde

L'aspre tourment d'une aultre plus profonde,

Que vergongneux je cele dans mon cuoeur.

CLXVI

Tousjours des bois la syme n'est chargée,

Soubz les toysons d'un hyver éternel,

Tousjours des Dieux le fouldre criminel

Ne darde en bas sa menace enragée.

Tousjours les ventz, tousjours la mer d'Egée

Ne gronde pas d'un orage cruel:

Mais de la dent d'un soing continuel,

Tousjours tousjours ma vie est oultragée.

Plus je me force à le vouloir tuer,

Plus il renaist pour mieux s'esvertuer

De féconder une guerre en moymesme.

O fort Thebain, si ta serve vertu

Avoit encor ce monstre combatu,

Ce seroit bien de tes faitz le treiziesme.

CLXVII

Je veus brusler pour m'en voler aux cieux,

Tout l'imparfait de ceste escorce humaine,

M'eternisant, comme le filz d'Alcméne,

Qui tout en feu s'assit entre les Dieux.

Ja mon esprit chatouillé de son mieux,

Dedans ma chair, rebelle se promeine,

Et ja le bois de sa victime ameine

Pour s'enflammer aux rayons de tes yeulx.

O sainct brazier, ô feu chastement beau,

Las, brusle moy d'un si chaste flambeau

Qu'abandonnant ma despouille cognue,

Nét, libre, et nud, je vole d'un plein sault,

Oultre le ciel, pour adorer là hault

L'aultre beaulté dont la tienne est venue.

CLXVIII

Ce fol penser pour s'en voler plus hault,

Apres le bien que haultain je desire,

S'est emplumé d'ailles joinctes de cire,

Propres à fondre aux raiz du premier chault.

Luy fait oyseau, dispost de sault en sault,

Poursuit en vain l'object de son martire,

Et toy, qui peux, et luy doys contredire,

Tu le vois bien, Raison, et ne t'en chault.

Soubz la clarté d'une estoile si belle,

Cesse, penser, de hazarder ton aisle,

Ains que te voir en bruslant deplumer:

Car pour estaindre une ardeur si cuizante,

L'eau de mes yeulx ne seroit suffisante,

Ny suffisants toutz les flotz de la mer.

CLXIX

Or que le ciel, or que la terre est pleine

De glaz, de graille esparse en tous endrois,

Et que l'horreur des plus frigoreux mois

Fait herisser les cheveux de la plaine,

Or que le vent, qui mutin se promeine,

Rompt les rochers, et desplante les bois,

Et que la mer redoublant ses abois,

Contre les bordz sa plus grand rage ameine,

Amour me brusle, et l'hyver froidureux,

Qui gele tout, de mon feu chaleureux

Ne gele point l'ardeur, qui tousjours dure:

Voyez, Amantz, comme je suis traitté,

Je meurs de froid au plus chault de l'Esté,

Et de chaleur au cuoeur de la froidure.

CLXX

Je ne suis point, Muses, acoustumé

De voir la nuict vostre dance sacrée:

Je n'ay point beu dedans l'onde d'Ascrée,

Fille du pied du cheval emplumé.

De tes beaulx raiz chastement allumé

Je fu poëte: et si ma voix recrée,

Et si ma lyre, ou si ma rime agrée,

Ton oeil en soit, non Parnase, estimé.

Certes le ciel te debvoit à la France,

Quand le Thuscan, et Sorgue, et sa Florence,

Et son Laurier engrava dans les cieux:

Ore trop tard beaulté plus que divine,

Tu vois nostre âge, helas, qui n'est pas digne

Tant seulement de parler de tes yeulx.

CLXXI

Ny les desdaingz d'une Nymphe si belle,

Ny le plaisir de me fondre en langueur,

Ny la fierté de sa doulce rigueur,

Ny contre amour sa chasteté rebelle,

Ny le penser de trop penser en elle,

Ny de mes yeulx la fatale liqueur,

Ny mes souspirs messagers de mon cuoeur,

Ny de ma flamme une ardeur eternelle,

Ny le desir qui me lime et me mord,

Ny voir escrite en ma face la mort,

Ny les erreurs d'une longue complainte,

Ne briseront mon cuoeur de diamant,

Que sa beaulté n'y soit tousjours emprainte,

Belle fin fait qui meurt en bien aymant.

CLXXII

Dedans le lit où mal sain je repose,

Presque en langueur Madame trespassa

Au moys de Juin, quand la fiebvre effaça

Son teint d'oeilletz, et ses lévres de rose

Une vapeur avec sa fiebvre esclose,

Entre les draps son venin delaissa,

Qui par destin, diverse me blessa

D'une autre fiebvre en mes veines enclose.

L'un apres l'autre elle avoyt froyd et chault,

Le froyd, le chault jamais ne me default,

Et quand l'un croyst l'autre ne diminue:

L'aspre tourment tousjours ne la tentoyt,

De deux jours l'un sa fiebvre s'allentoyt,

Las, mais la mienne est tousjours continue.

CLXXIII

O traitz fichez dans le but de mon ame,

O folle emprise, ô pensers repensez,

O vainement mes jeunes ans passez,

O miel, ô fiel, dont me repaist Madame,

O chault, ô froyd, quilm' englace et m'enflamme,

O promptz desirs d'esperance cassez,

O doulce erreur, ô paz en vain trassez,

O montz, ô rocz, que ma douleur entame,

O terre, ô mer, chaos, destins et cieulx,

O nuit; ô jour, ô Manes stygieux,

O fiere ardeur, ô passion trop forte:

O vous Démons, et vous divins Espritz,

Si quelque amour quelque foys vous a pris,

Voyez pour dieu quelle peine je porte.

CLXXIV

Las, force m'est qu'en brullant je me taise,

Car d'autant plus qu'esteindre je me veux,

Plus le desir me r'allume les feux,

Qui languissoyent desoubz la morte braize

Si suis-je heureux (et cela me rapaize)

De plus soufrir que soufrir je ne peulx,

Et d'endurer le mal dont je me deulx,

Je me deulx, non, mais dont je suis bien aise.

Par ce doulx mal j'adoray la beaulté,

Qui me liant d'une humble cruaulté

Me desnoua les liens d'ignorance.

Par luy me vint ce vertueux penser,

Qui jusqu'au ciel fit mon cuoeur eslancer,

Aillé de foy, d'amour et d'esperance.

CLXXV

Amour et Mars sont presque d'une sorte,

L'un en plein jour, l'autre combat de nuict,

L'un aux rivaux, l'autre aux gensdarmes nuit,

L'un rompt un huis, l'autre rompt une porte.

L'un finement trompe une ville forte,

L'autre coyment une garde seduict:

L'un un butin, l'autre le gaing poursuit,

L'un deshonneur, l'autre dommage apporte.

L'un couche à terre, et l'autre gist souvent

Devant un huis à la froydeur du vent:

L'un boyt meinte eau, l'autre boyt meinte larme.

Mars va tout seul, les Amours vont touts seulz:

Qui vouldra donc ne languir paresseux,

Soyt l'un ou l'autre, amoureux ou gendarme.

CLXXVI

Jamais au cuoeur ne sera que je n'aye,

Soyt que je tombe en l'obly du cercueil,

Le souvenir du favorable acueil,

Qui regarit et rengregea ma playe.

Tant ceste là, pour qui cent mortz j'essaye,

Me saluant d'un petit riz de l'oeil,

Si doulcement satisfait à mon dueil,

Qu'un seul regard les interestz m'en paye.

Si donc le bien d'un esperé bon jour,

Plein de caresse, apres un long sejour,

En cent nectars peult enyvrer mon ame,

Quel paradis m'apporteront les nuictz,

Où se perdra le rien de mes ennuiz,

Evanouy dans le sein de Madame?

CLXXVII

Au cuoeur d'un val, où deux ombrages sont,

Dans un destour, de loing j'avisay celle,

Dont la beaulté dedans mon cuoeur se cele,

Et les douleurs m'apparoyssent au front.

Des boys toffuz voyant le lieu profond,

J'armay mon cuoeur d'asseurance nouvelle,

Pour luy chanter les maulx que j'ay pour elle,

Et les tourmentz que ses beaulx yeulx me font.

En cent façons, desja, desja ma langue

Avantpensoyt les motz de sa harangue,

Ja soulageant de mes peines le faix,

Quand un Centaure envieux sur ma vie

L'ayant en crope au galop l'a ravie,

Me laissant seul, et mes criz imparfaitz.

CLXXVIII

Veufve maison des beaulx yeulx de Madame,

Qui pres et loing me paissent de douleur,

Je t'acompare à quelque pré sans fleur,

A quelque corps orfelin de son ame.

L'honneur du ciel n'est-ce pas ceste flamme

Qui donne aux dieux et lumiere et chaleur?

Ton ornement n'est ce pas la valeur

De son bel oeil, qui tout le monde enflamme?

Soyent tes buffetz chargez de masse d'or,

Et soyent tes flancz empeinturez encor

De mainte histoyre en filz d'or enlassée:

Cela, Maison, ne me peult resjouir,

Sans voyr en toy ceste Dame, et l'ouyr,

Que j'oy tousjours, et voy dans ma pensée.

CLXXIX

Puis qu'aujourdhuy pour me donner confort,

De ses cheveulx ma Maistresse me donne,

D'avoyr receu, mon cuoeur, je te pardonne,

Mes ennemis au dedans de mon fort.

Non pas cheveux, mais un lien bien fort,

Qu'Amour me lasse, et que le ciel m'ordonne,

Où franchement captif je m'abandonne,

Serf volontaire, en volontaire effort.

D'un si beau crin le dieu que Déle honore,

Son col de laict blondement ne decore,

Ny les flambeaux du chef Egyptien,

Quand de leurs feux les astres se couronnent,

Maugré la nuict ne treluysent si bien,

Que ces cheveux qui mes bras environnent.

CLXXX

Je m'assuroy qu'au changement des cieulx

Cest an nouveau romproyt ma destinée,

Et que sa trace, en serpent retournée,

Adoulciroyt mon travail soucieux:

Mais plus qu'il volte en un rond pluvieux

Ses frontz lavez d'une humide journée,

Cela me dit qu'au cours de ceste année

Je pleuveray ma vie par les yeulx.

Las, toy qui es de moy la quinte essence,

De qui l'humeur sur la mienne a puissance,

Ou de tes yeulx serene mes douleurs,

Ou bien les miens alambique en fontaine,

Pour estoufer le plus vif de ma peine,

Dans le ruisseau, qui naistra de mes pleurs.

CLXXXI

Seconde Aglaure, advienne que l'Envie

Rouille ton cuoeur traistrement indiscret,

D'avoyr osé publier le secret,

Qui bienheuroyt le bonheur de ma vie.

Fiere à ton col Tisiphone se lie,

Qui d'un remors, d'un soing et d'un regret,

Et d'un fouet, d'un serpent, et d'un trait,

Sans se lasser punisse ta folie.

En ma faveur ce vers injurieux

Suyve l'horreur du despit furieux,

Dont Archiloc aiguiza son ïambe:

Et mon courroux t'ourdisse le licol

Du fil meurtrier, que le meschant Lycambe,

Pour se saulver estraignit à son col.

CLXXXII

En nul endroyt, comme a chanté Virgile,

La foy n'est seure, et me l'a fait scavoyr

Ton jeune cuoeur, mais vieil pour decevoyr,

Rompant la sienne infamement fragile.

Tu es vrayment et sotte, et mal habile,

D'assubjettir les cuoeurs à ton pouvoyr,

Jouet à vent, flot prompt à s'esmouvoyr,

Beaulté trop belle en ame trop mobile.

Helas, Amour, si tu as quelque foys

Haussé ton vol soubz le vent de ma voix,

Jamais mon cuoeur de son coeur ne racointes.

Puisse le ciel sur sa langue envoyer

Le plus aigu de sa fouldre à troys pointes

Pour le payment de son juste loyer.

CLXXXIII

Son chef est d'or, son front est un tableau

Où je voy peint le gaing de mon dommage,

Belle est sa main, qui me fait devant l'age,

Changer de teint, de cheveulx, et de peau.

Belle est sa bouche, et son soleil jumeau,

De neige et feu s'embellit son visage,

Pour qui Juppin reprendroyt le plumage,

Ore d'un Cygne, or le poyl d'un toreau.

Doulx est son ris, qui la Meduse mesme

Endurciroyt en quelque roche blesme,

Vangeant d'un coup cent mille cruaultez.

Mais tout ainsi que le Soleil efface

Les moindres feux: ainsi ma foy surpasse

Le plus parfaict de toutes ses beaultez.

CLXXXIV

Tousjours l'erreur, qui seduit les Menades,

Ne deçoyt pas leurs espritz estonnez,

Tousjours au son des cornetz entonnez,

Les mons Troyens ne foulent de gambades.

Tousjours le Dieu des vineuses Thyades,

N'affolle pas leurs cuoeurs epoinçonnez,

Et quelque foys leurs cerveaux forcenez

Cessent leur rage et ne sont plus malades.

Le Corybente a quelquefoys repos,

Et le Curete aux piedz armez dispos,

Ne sent tousjours le Tan de sa deesse:

Mais la fureur de celle qui me joint,

En patience une heure ne me laisse

Et de ses yeulx tousjours le cuoeur me point.

CLXXXV

Bien que les champz, les fleuves et les lieux,

Les montz, les boys, que j'ay laissez derriere,

Me tiennent loing de ma doulce guerriere,

Astre fatal d'où s'ecoule mon mieux:

Quelque Demon par le congé des cieulx,

Qui presidoyent à mon ardeur premiere,

Conduit tousjours d'une aisle coustumiere

Sa belle image au sejour de mes yeulx.

Toutes les nuictz, impatient de haste,

Entre mes bras je rembrasse et retaste

Son ondoyant en cent formes trompeur:

Mais quand il voyt que content je sommeille,

Mocquant mes braz il s'enfuit, et m'esveille,

Me laissant plein de vergogne et de peur.

CLXXXVI

Il faisoyt chault, et le somme coulant

Se distilloyt dans mon ame songearde,

Quand l'incertain d'une idole gaillarde,

Fut doulcement mon dormir affolant.

Panchant soubz moy son bel ivoyre blanc,

Et mitirant sa langue fretillarde,

Me baisotoyt d'une lévre mignarde,

Bouche sur bouche et le flanc sus le flanc.

Que de coral, que de liz, que de roses,

Ce me sembloyt, à pleines mains descloses,

Tastay-je lors entre deux manimentz?

Mon dieu mon dieu, de quelle doulce aleine,

De quelle odeur estoyt sa bouche pleine,

De quelz rubiz, et de quelz diamantz!

CLXXXVII

Ces flotz jumeaulx de laict bien espoissi,

Vont et revont par leur blanche valée,

Comme à son bord la marine salée,

Qui lente va, lente revient aussi.

Une distance entre eulx se fait, ainsi

Qu'entre deux montz une sente esgalée,

En toutz endroitz de neige, devalée,

Soubz un hyver doulcement adoulci.

Là deux rubiz hault eslevez rougissent,

Dont les rayons cest ivoyre finissent

De toutes partz unyment arondis:

Là tout honneur, là toute grace abonde:

Et la beaulté, si quelqu'une est au monde,

Vole au sejour de ce beau paradis.

CLXXXVIII

Quelle langueur ce beau front deshonore?

Quel voile obscur embrunit ce flambeau?

Quelle palleur despourpre ce sein beau,

Qui per à per combat avec l'Aurore?

Dieu medecin, si en toy vit encore

L'antique feu du Thessale arbrisseau,

Las, pren pitié de ce teint damoyseau,

Et son lis palle en oeilletz recolore.

Et toy Barbu, fidelle gardien

Du temple assis au champ Rhagusien,

Deflamme aussi le tison de ma vie:

S'il vit, je vy, s'il meurt je ne suis riens:

Car tant son ame à la mienne est unie,

Que ses destins seront suyvis des miens.

CLXXXIX

D'un Ocëan qui nostre jour limite

Jusques à l'autre, on ne voit point de fleur,

Qui de beaulté, de grace et de valeur,

Puisse combatre au teint de Marguerite.

Si riche gemme en Orient eslite

Comme est son lustre affiné de bon heur,

N'emperla point de la Conche l'honneur

Où s'apparut Venus encore petite.

Le pourpre esclos du sang Adonien,

Le triste ai ai du Telamonien,

Ni des Indoys la gemmeuse largesse,

Ny toutz les biens d'un rivage estranger,

A leurs tresors ne sauroient eschanger

Le moindre honneur de sa double richesse.

CXC

Au plus profond de ma poytrine morte,

Sans me tuer une main je reçoy,

Qui me pillant entraine avecque soy

Mon cuoeur captif, que maistresse elle emporte.

Coustume inique, et de mauvaise sorte,

Malencontreuse et miserable loy,

Tant à grand tort, tant tu es contre moy,

Loy sans raison, miserablement forte.

Fault il que veuf, seul entre mille ennuiz,

Mon lict desert je couve tant de nuictz

Hà, que je porte et de haine, et d'envie

A ce Vulcan ingrat, et sans pitié,

Qui s'opposant aux raiz de ma moytié,

Fait eclipser le Soleil de ma vie.

CXCI

Ren moy mon cuoeur, ren moy mon cuoeur, pillarde,

Que tu retiens dans ton sein arresté:

Ren moy, ren moy ma doulce liberté

Qu'à tes beaulx yeux mal caut je mis en garde.

Ren moy ma vie, ou bien la mort retarde,

Qui me devance au cours de ta beaulté,

Par ne scay quelle honneste cruaulté,

Et de plus pres mes angoisses regarde.

Si d'un trespas tu payes ma langueur,

L'âge à venir maugrayant ta rigueur,

Dira sus toy: De ceste fiere amie

Puissent les oz reposer durement,

Qui de ses yeulx occit meurtrierement

Un qui l'avoyt plus chere que sa vie.

CXCII

Quand le grand oeil dans les Jumeaux arrive,

Un jour plus doulx seréne l'Univers,

D'espicz crestez ondoyent les champz verdz,

Et de couleurs se peinture la rive.

Mais quand sa fuite obliquement tardive,

Par le sentier qui roulle de travers,

Atteint l'Archer, un changement divers

De jour, d'espicz, et de couleurs les prive.

Ainsi quand l'oeil de ma deesse luit,

Dedans mon cuoeur, dans mon cuoeur se produit

Un beau printemps qui me donne asseurance:

Mais aussi tost que son rayon s'enfuit,

De mon printempz il avorte le fruit,

Et à myherbe il tond mon esperance.

CXCIII

Fauche, garçon, d'une main pilleresse,

Le bel esmail de la verte saison,

Puis à plein poing enjonche la maison

Du beau tapis de leur meslange espaisse.

Despen du croc ma lyre chanteresse:

Je veus charmer, si je puis la poison,

Dont un bel oeil, sorcela ma raison

Par la vertu d'une oeillade maistresse.

Donne moy l'encre, et le papier aussi

En cent papiers tesmoingz de mon souci,

Je veux tracer la peine que j'endure:

En cent papiers plus durs que diamant,

A celle fin que la race future

Juge du mal que je soufre en aymant.

CXCIV

Les vers d'Homere entreleuz d'avanture,

Soit par destin, par rencontre, ou par sort,

En ma faveur chantent tous d'un accord

La garison du tourment que j'endure.

Ces vieux Barbuz, qui la chose future,

Des traitz des mains, du visage, et du port,

Vont predisant, annoncent reconfort

Aux passions de ma peine si dure.

Mesmes la nuict, le somme qui vous mét

Doulce en mon lict, augure, me promet

Que je verray voz fiertez adoucies:

Et que vous seule, oracle de l'amour,

Vérifirez dans mes braz quelque jour,

L'arrest fatal de tant de propheties.

CXCV

Un sot Vulcan ma Cyprine faschoit,

Mais elle apart qui son courroux ne cele

L'un de ses yeulx arma d'une estincelle,

De l'autre un lac sur sa face espanchoit.

Tandis Amour qui petit se cachoit

Folastrement dans le sein de la belle,

En l'oeil humide alloit baignant son aisle,

Puis en l'ardent ses plumes il sechoit.

Ainsi voit on quelquefois en un temps,

Rire et pleurer le soleil du printemps,

Quand une nuë à demy le traverse.

L'un dans les miens darda tant de liqueur,

Et l'autre apres tant de flammes au cuoeur,

Que pleurs et feux depuis l'heure je verse.

CXCVI

Mon dieu, quel dueil, et quelles larmes sainctes,

Et quelz souspirs Madame alloit formant,

Et quelz sanglotz, alors que le tourment

D'un teint de mort ses graces avoit peintes.

Croysant ses mains à l'estomac estraintes

Fichoit au ciel son regard lentement,

Et triste apart pleuroit si tristement,

Que les rochers se brisoyent de ses plaintes.

Les cieux fermez aux criz de sa douleur,

Changeans de front, de grace et de couleur,

Par sympathie en devindrent malades:

Tous renfrognez les astres secouoyent

Leurs raiz du chef, telles pitiez nouoyent

Dans le cristal de ses moytes oeillades.

CXCVII

Le feu jumeau de Madame brusloit

Par le rayon de sa flamme divine,

L'amas pleureux d'une obscure bruine

Qui de leur jour la lumière celoit.

Un bel argent chauldement s'escouloit

Dessus sa joue, en la gorge ivoyrine,

Au paradis de sa chaste poitrine,

Où l'Archerot ses flesches esmouloit.

De neige tiede estoit sa face pleine,

D'or ses cheveux, ses deux sourciz d'ebéne,

Ses yeulx m'estoyent un bel astre fatal:

Roses et liz, où la douleur contrainte

Formoit l'accent de sa juste complainte,

Feu ses souspirs, ses larmes un crystal.

CXCVIII

Celuy qui fit le monde façonné

Sur le compas de son parfait exemple,

Le couronnant des voustes de son temple,

M'a par destin ton esclave ordonné.

Comme l'esprit, qui sainctement est né

Pour voyr son dieu, quand sa face il contemple,

De touts ses maulx un salaire plus ample

Que de le voyr, ne luy est point donné:

Ainsi je pers ma peine coustumiere,

Quand à longz traitz j'oeillade la lumiere

De ton bel oeil, chefdoeuvre nompareil.

Voyla pour quoy, quelque part qu'il sejourne,

Tousjours vers luy maulgré moy je me tourne,

Comme un Souci aux rayons du soleil.

CXCIX

Que Gastine ait tout le chef jaunissant

De maint citron et mainte belle orenge,

Que toute odeur de toute terre estrange,

Aille par tout noz plaines remplissant.

Le Loyr soit laict, son rempart verdissant

En un tapis d'esmeraudes se change,

Et le sablon, qui dans Braye se range,

D'arenes d'or soit par tout blondissant.

Pleuve le ciel des parfumz et des roses,

Soyent des grands ventz les aleines encloses,

La mer soit calme, et l'air plein de bon heur:

Voici le jour, que l'enfant de mon maistre,

Naissant au monde, au monde a fait renaistre

La foy premiere, et le premier honneur.

CC

Jeune Herculin, qui des le ventre sainct

Fus destiné pour le commun service,

Et qui naissant rompis la teste au vice

De ton beau nom dedans les astres peint:

Quand l'age d'homme aura ton cuoeur atteint,

S'il reste encor quelque trac de malice,

Le monde adonc ployé soubz ta police

Le pourra voyr totalement estaint.

En ce pendant crois enfant, et prospere,

Et sage apren les haultz faitz de ton pere,

Et ses vertuz, et les honneurs des Roys.

Puis aultre Hector tu courras à la guerre,

Aultre Jason tu t'en iras conquerre,

Non la toison, mais les champz Navarroys.

CCI

Comme on souloit si plus on ne me blasme

D'estre tousjours lentement otieux,

Je t'en ren grace, heureux trait de ces yeulx,

Qui m'ont parfait l'imparfait de mon ame.

Ore l'esclair de leur divine flamme,

Dressant en l'air mon vol audacieux

Pour voir le Tout, m'esleve jusqu'aux cieux,

Dont ici bas la partie m'enflamme.

Par le moins beau, qui mon penser aisla,

Au sein du beau mon penser s'en vola,

Epoinçonné d'une manie extreme:

Là, du vray beau j'adore le parfait,

Là, d'otieux actif je me suis fait,

Là je cogneu ma maistresse et moy-mesme.

CCII

Brave Aquilon, horreur de la Scythie,

Le chassenue, et l'ebranlerocher,

L'irritemer, et qui fais approcher

Aux enfers l'une, aux cieux l'autre partie:

S'il te souvient de la belle Orithye,

Toy de l'hiver le plus fidele archer,

Fais à mon Loyr ses mines relascher,

Tant que Madame à rive soit sortie.

Ainsi ton front ne soit jamais moyteux;

Et ton gosier horriblement venteux,

Mugle tousjours dans les cavernes basses,

Ainsi les braz des chesnes les plus vieux,

Ainsi la terre, et la mer, et les cieux,

Tremblent d'effroy quelque part où tu passes.

CCIII

Soeur de Paris, la fille au roy d'Asie,

A qui Phebus en doubte fit avoyr

Peu cautement l'aiguillon du scavoyr,

Dont sans proffit ton ame fut saisie,

Tu variras vers moy de fantaisie,

Puis qu'il te plaist (bien que tard) de vouloyr

Changer ton Loyre au sejour de mon Loyr,

Voyre y fonder ta demeure choysie.

En ma faveur le ciel te guide ici,

Pour te montrer de plus pres le souci

Qui peint au vif de ses couleurs ma face.

Vien Nymphe vien, les rochers et les boys

Qui de pitié s'enflamment soubz ma voix,

De leurs souspirs eschauferont ta glace.

CCIV

L'or crespelu, que d'autant plus j'honore,

Que mes douleurs s'augmentent de son beau,

Laschant un jour le noud de son bandeau,

S'esparpilloyt sur le sein que j'adore:

Mon cuoeur, helas, qu'en vain je r'appelle ore,

Vola dedans, ainsi qu'un jeune oyseau,

Qui s'enfueillant dedans un arbrisseau,

De branche en branche à son plaisir s'essore:

Lors que voyci dix beaux doigtz ivoyrins,

Qui ramassantz ses blondz filetz orins

Pris en leurs retz esclave le lierent.

J'eusse crié, mais la peur que j'avoys;

Gela mes sens, mes poumons, et ma voix,

Et ce pendant le cuoeur ils me pillerent.

CCV

L'homme est vraiment ou de plomb ou de bois

S'il ne tressaut de creinte et de merveille

Quand face à face il voit ma nompareille,

Ou quand il oit les acors de sa vois.

Ou quand, pensive, aus jours des plus beaus mois

La voit à part (comme un qui se conseille)

Tracer les prés, et d'une main vermeille

Trier de ranc les fleurettes de chois:

Ou quand l'Esté, lors que le chaut s'avale,

Au soir, à l'huis, il la voit, qu'elle égale

La soie à l'or d'un pouce ingenieus:

Puis de ses dois, qui les roses effacent,

Toucher son luc, et d'un tour de ses yeus

Piller les coeurs de mile hommes qui passent.

CCVI

Avec les fleurs et les boutons éclos

Le beau printans fait printaner ma peine,

Dans chaque nerf, et dedans chaque veine

Soufflant un feu qui m'ard jusques à l'os.

Le marinier ne conte tant de flos,

Quand plus Borée horrible son haleine,

Ni de sablons l'Afrique n'est si pleine,

Que de tourmens dans mon coeur sont enclos.

J'ai tant de mal, qu'il me prendroit envie

Cent fois le jour de me trancher la vie,

Minant le fort où loge ma langueur,

Si ce n'estoit que je tremble de creinte

Qu'apres la mort ne fust la plaïe éteinte

Du coup mortel qui m'est si dous au coeur.

CCVII

Si blond, si beau, comme est une toyson

Qui mon dueil tue, et mon plaisir renforce,

Ne fut onq l'or, que les toreaux par force,

Au champ de Mars donnerent à Jason.

De ceulx, qui Tyr ont esleu pour maison,

Si fine soye en leur main ne fut torse.

Ny mousse encor ne revestit escorse,

Si tendre qu'elle en la prime saison.

Poyl folleton, où nichent mes liesses,

Puis que pour moy tes compagnons tu laisses

Je sen ramper l'esperance en mon cuoeur:

Courage Amour, desja la ville est prise,

Lors qu'en deux partz, mutine, se devise,

Et qu'une part se vient rendre au vainqueur.

CCVIII

D'une vapeur enclose soubz la terre,

Ne s'est pas fait cest esprit ventueux.

Ny par les champs le Loyr impetueux

De neige cheute à toute bride n'erre.

Le prince Eole en ces moys ne deterre

L'esclave orgueil des vents tumultueux,

Ny l'Ocean des flotz tempestueux

De sa grand clef les sources ne desserre.

Seulz mes souspirs ont ce vent enfanté,

Et de mes pleurs le Loyr s'est augmenté,

Pour le depart d'une beaulté si fiere:

Et m'esbays, de tant continuer:

Souspirs et pleurs, que je n'ay veu muer

Mon cuoeur en vent, et mes yeulx en riviere.

CCIX

Je suis, je suis plus aise que les Dieus

Quand maugré toi tu me baises, Maîtresse:

De ton baiser la douceur larronnesse

Tout éperdu m'envole jusque aus cieus.

Quant est de moi, j'estime beaucoup mieus

Ton seul baiser, que si quelque Déesse,

En cent façons doucement tenteresse,

M'acoloit nu d'un bras delicieus.

Il est bien vrai, que tu as de coutume

D'entremeller tes baisers d'amertume,

Les donnant cours, mais quoy? je ne pourrois

Vivre autrement, car mon ame, qui touche

Tant de beautés, s'enfuiroit par ma bouche,

Et de trop d'aise en ton sein je mourrois.

CCX

Telle qu'elle est, dedans ma souvenance

Je la sen peinte, et sa bouche, et ses yeus,

Son dous regard, son parler gratieus,

Son dous meintien, sa douce contenance.

Un seul Janet, honneur de nostre France,

De ses craïons ne la portrairoit mieus,

Que d'un Archer le trait ingenieus

M'a peint au coeur sa vive remembrance.

Dans le coeur donque au fond d'un diamant

J'ai son portrait, que je suis plus aimant

Que mon coeur mesme. O sainte portraiture,

De ce Janet l'artifice mourra

Frapé du tans, mais le tien demourra

Pour estre vif apres ma sepulture.

CCXI

Amourette

Petite Nymphe folastre,

Nymphette que j'idolatre,

Ma mignonne dont les yeulx

Logent mon pis et mon mieux;

Ma doucette, ma sucrée,

Ma Grace, ma Cytherée,

Tu me doibs pour m'apaiser

Mille fois le jour baiser.

Avance mon cartier belle,

Ma tourtre, ma colombelle,

Avance moy le cartier

De mon payment tout entier.

Demeure, où fuis tu Maistresse?

Le desir qui trop me presse,

Ne sçauroit arrester tant

S'il n'a son payment contant.

Revien revien mignonnette,

Mon doulx miel, ma violete,

Mon oeil, mon cuoeur, mes amours,

Ma cruëlle, qui tousjours

Treuves quelque mignardise,

Qui d'une doulce faintise

Peu à peu mes forces fond,

Comme on voyt dessus un mont

S'escouler la neige blanche:

Ou comme la rose franche

Pert le pourpre de son teint

Du vent de la Bise atteint.

Où fuis-tu mon âmelete?

Mon diamant, ma perlete?

Las, revien, mon sucre doulx,

Sur mon sein, sur mes genoux,

Et de cent baisers apaise

De mon cuoeur la chaulde braise.

Donne m'en bec contre bec,

Or un moyte, ores un sec,

Ore un babillard, et ores

Un qui soit plus long encores

Que ceulx des pigeons mignards,

Couple à couple fretillards,

Hà là! ma doulce guerriere,

Tire un peu ta bouche arriere,

Le dernier baiser donné

A tellement estonné

De mille doulceurs ma vie,

Qu'il me l'a presque ravie,

Et m'a fait veoir à demi

Le Nautonnier ennemi

Et les pleines où Catulle,

Et les rives où Tibulle

Paz à paz leur promenant',

Vont encores maintenant

De leurs bouchettes blesmies

Rebaisotans leurs amies.

CCXII

Des Grecs marris l'industrieuse Helene,

Et des Troïens ouvrageoit les combas:

Dessus ta gaze en ce point tu t'ebas,

Traçant le mal duquel ma vie est pleine.

Mais tout ainsi, maitresse, que ta leine

D'un filet noir figure mon trespas,

Tout au rebours, pourquoi ne peins-tu, las!

De quelque verd un espoir à ma peine?

Las! je ne voi sur ta gaze rangé

Sinon du noir, sinon de l'orangé,

Tristes témoins de ma longue soufrance.

O fier destin, son oeil ne me defait

Tant seulement, mais tout ce qu'elle fait

Ne me promet qu'une desesperance.

CCXIII

Mon Dieu, que j'aime à baiser les beaus yeus

De ma maitresse, et à tordre en ma bouche

De ses cheveus l'or fin qui s'écarmouche

Si gaïement dessus deus petis cieus.

C'est, Amour, c'est ce qui lui sied le mieus

Que ce bel oeil, qui jusqu'au coeur me touche,

Et ce beau poil, qui d'un Scythe farouche

Prendroit le coeur en ses nous gracieus,

Ce beau poil d'or, et ce beau chef encore

De leurs beautés font vergoigner l'Aurore,

Quand plus crineuse elle embellit le ciel.

Et dans cet oeil je ne sai quoi demeure,

Qui me peut faire à toute heure, à toute heure,

Le sucre fiel, et riagas le miel.

CCXIV

L'arc contre qui des plus braves gendarmes

Ne vaut l'armet, le plastron, ni l'escu,

D'un si dous trait mon courage a veincu,

Que sus le champ je lui rendi les armes.

Comme apostat je n'ai point fait d'alarmes,

Depuis que serf sous Amour j'ai vescu,

Ni n'eusse peu, car, pris, je n'ai onq eu

Pour tout secours, que l'aide de mes larmes.

Il est bien vrai qu'il me fache beaucoup

D'estre defait, mesme du premier coup,

Sans resister plus long tans à la guerre:

Mais ma defaite est digne de grand pris,

Puis que le Roi, ains le dieu, qui m'a pris,

Combat le Ciel, les Enfers, et la terre.

CCXV

Cet oeil besson dont, goulu, je me pais,

Qui fait rocher celui qui s'en aprouche,

Ore d'un ris, or d'un regard farouche

Nourrit mon coeur en querelle et en pais.

Pour vous, bel oeil, en soufrant, je me tais,

Mais aussi tôt que la douleur me touche,

Toi, belle sainte, et angelique bouche,

De tes douceurs revivre tu me fais.

Bouche, pourquoi me viens-tu secourir,

Quand ce bel oeil me force de mourir?

Pourquoi veus-tu que vif je redevienne?

Las! bouche, las! je revis en langueur,

Pour plus de soin, à fin que le soin vienne

Plus longuement se paître de mon coeur.

CCXVI

Depuis le jour que mal sain je soupire,

L'an dedans soi s'est roüé par set fois.

(Sous astre tel je pris l'hain) toutefois

Plus qu'au premier ma fievre me martire:

Quand je soulois en ma jeunesse lire

Du Florentin les lamentables vois,

Comme incredule alors je ne pouvois,

En le moquant, me contenir de rire.

Je ne pensoi, tant novice j'étoi,

Qu'home eut senti ce que je ne sentoi,

Et par mon fait les autres je jugeoie.

Mais l'Archerot qui de moi se facha,

Pour me punir, un tel soin me cacha

Dedans le coeur, qu'onque puis je n'eus joïe.

CCXVII

Mets en obli, Dieu des herbes puissant,

Le mauvais tour que non loin d'Hellesponte

Te fit m'amie, et vien d'une main pronte

Garir son teint palement jaunissant.

Tourne en santé son beau cors perissant,

Ce te sera, Phebus, une grand'honte,

Sans ton secours, si la ledeur surmonte

L'oeil qui te tint si long tans languissant.

En ma faveur si tu as pitié d'elle,

Je chanterai comme l'errante Dele

S'enracina sous ta vois, et comment

Python sentit ta premiere conqueste,

Et comme Dafne aus tresses de ta teste

Donna jadis le premier ornement.

CCXVIII

Bien que ton trait, Amour soit rigoureus,

Et toi rempli de fraude, et de malice,

Assés, Amour, en te faisant service,

Plus qu'on ne croit, j'ai vescu bienheureus.

Car cette-là, qui me fait langoureus,

Non, mais qui veut, qu'en vain je ne languisse,

Hier au soir me dit, que je tondisse

De son poil d'or un lien amoureus.

J'eu tant d'honneur, que de son ciseau mesme

Je le tranchai. Voiés l'amour extrême,

Voiés, Amans, la grandeur de mon bien.

Jamais ne soit qu'en mes vers je n'honore

Ce dous ciseau, et ce beau poil encore,

Qui mon coeur presse en un si beau lien.

CCXIX

Si hors du cep où je suis arresté,

Cep où l'Amour de ses flesches m'encloue,

J'eschape franc, et du ret qui m'ennoue

Si quelquefoys je me voy desreté:

Au coeur d'un pré loing de gents escarté,

Que fourchument l'eau du Loyr entrenoue,

De gazons verdz un temple je te vouë,

Heureuse, saincte et alme Liberté

Là, j'appendray le soing, et les ennuiz,

Les faulx plaisirs, les mensonges des nuictz,

Le vain espoyr, les souspirs, et l'envie:

Là touts les ans je te pairay mes voeux,

Et soubz tes pieds j'immoleray cent boeufz,

Pour le bienfaict d'avoyr saulvé ma vie.

CCXX

Veu la douleur qui doulcement me lime,

Et qui me suit compaigne, paz à paz,

Je congnoy bien qu'encor je ne suis pas,

Pour trop aymer, à la fin de ma ryme.

Dame, l'ardeur qui de chanter m'anime,

Et qui me rend en ce labeur moins las,

C'est que je voy qu'aggreable tu l'as,

Et que je tien de tes pensers la cyme.

Je suis vrayment heureux et plusque heureux,

De vivre aymé et de vivre amoureux

De la beaulté d'une Dame si belle:

Qui lit mes vers, qui en fait jugement,

Et qui me donne à toute heure argument

De souspirer heureusement pour elle.

CCXXI

J'alloy roullant ces larmes de mes yeulx,

Or plein de doubte, ores plein d'esperance

Lors que Henry loing des bornes de France,

Vangeoyt l'honneur de ses premiers ayeulx,

Lors qu'il trenchoyt d'un bras victorieux

Au bord du Rhin l'Espaignolle vaillance,

Ja se trassant de l'aigu de sa lance,

Un beau sentier pour s'en aller aux cieulx.

Vous saint troupeau, qui dessus Pinde errez,

Et qui de grace ouvrez, et desserrez

Voz doctes eaux à ceulx qui les vont boyre:

Si quelque foys vous m'avez abreuvé,

Soyt pour jamais ce souspir engravé,

Dans l'immortel du temple de Memoyre.

Pièces retranchées en 1553

I

D'un foyble vol, je volle apres l'espoyr,

Qui mieux vollant volle oultre la carriere,

Puis, quand il voyt que je volle derriere,

De mon voller renforce le pouvoyr.

Voyant le sien qui volle pour m'avoyr,

Me revoltant je franchi la barriere,

Et d'un bas vol je m'escarte en arriere,

Pour ne le prendre, et pour pris ne me voyr.

Je suis semblable au malade qui songe,

Le quel en vain ses doigtz mocquez allonge,

Pour tastonner l'idole qui n'est pas:

L'un fuit, l'un suit d'une vaine poursuite,

Ainsi suyvant l'espoyr qui est en fuite,

Et qui ne suit, je perdz en vain mes pas.

II

Moins que devant m'agitoit le vouloyr,

Qui me piquoyt d'une ardeur fanatique,

Quand pour garir ma verve poëtique,

Laissant Paris j'aborde sus le Loyr

Là je vivoy pour plus ne me chaloyr

Ny de la Muse, ou Romaine, ou Attique

Alors qu'Amour de son trait fantastique

Causa le mal qui tant me fait douloyr.

Dedans des prez, et dans un boys champestre,

Parmy les fleurs où seur je pensoys estre

Le doulx Tyran me martela de coupz:

Et me fit voyr, que jamais on n'estrange.

Loing de son chef, quelque païs qu'on change

L'arrest du ciel qui preside sur nous.

Le Cinqieme des Odes (1553)

I

Elégie à M. A. De Muret

Non Muret, non, ce n'est pas dujourdui

Que l'Archerot, qui cause nôtre ennui,

Cause l'erreur qui retronpe les hommes:

Non Muret, non, les premiers nous ne sommes,

A qui son arc, d'un petit trait veincueur,

Si grande plaie a dardé sous le coeur.

Tous animaus, tous ceus-là des canpagnes,

Tous ceus des bois, et tous ceus des montagnes

Sentent sa force, et son feu dousamer

Sentent sous l'eau les monstres de la mer

Et qu'est-il rien que ce garson ne brule?

Ce porteciel, ce tugeant Hercule

Le sentit bien, je di ce fort Thebain

Qui le Sangler étrangla de sa main

Qui tua Nesse, et qui de sa massüe

Mors abatit les enfans de la nüe,

Qui de son arc toute Lerne étonna,

Qui des enfers le chien enprisonna,

Qui sur le bord de l'eau Thermodontée

Prit le baudrier de la vierge dontée,

Qui tua l'Ourque, et qui par plusieurs-fois

Se remoqua des feintes d'Achelois,

Qui fit mourir la pucelle de Phorce,

Qui le Lion démachoira par force,

Qui dans ses bras Anthée acravanta,

Et qui deus mons pour ses merques planta.

Bref ce Heros qui demonstra la terre,

Ce coeur sans peur, ce foudre de la guerre,

Sentit amour, et sa gelante ardeur

Le matta plus que son Roi commandeur.

Non par epris, comme on nous voit éprendre

Toi de ta Janne, ou moi de ma Cassandre,

Mais de tel Tan amour l'aiguillonnoit,

Que tout son coeur, sans raison, bouillonnoit

Au soufre ardent, qui lui cuisoit les venes:

Du feu d'amour elles furent si plenes,

Si plains ses ôs, ses moeles et ses ners,

Que dans Hercul, qui donta l'univers,

Ne reste rien sinon une amour fole

Que lui versoient les deus beaus yeux d'Iole.

Toujours d'Iole il aimoit les beaus yeus,

Fût que le char qui donne jour aus cieus

Sortît de l'eau, ou fût que devalée

Tournât sa roüe en la pleine salée,

De tous humains acoisant les travaus,

Mais non d'Hercul les miserables maus.

Tanseulement il n'avoit de sa dame

Les yeux colés au plus profond de l'ame,

Mais son parler, sa grace et sa douceur

Toujours colés s'atachoient à son coeur.

D'autre que d'elle en son coeur il ne pense,

Toujours absente il la voit en presence.

Et de fortune, Alcid, si tu la vois

Dans ton gousier begue reste ta vois,

Glacé de peur voiant la face aimée:

Ore une fievre ardemment alumée

Ronge ton âme, et ores un glaçon

Te fait tranbler d'amoureuse frisson.

Bas à tes piés ta meurdriere massüe

Gît sans honneur, et bas la peau velüe,

Qui sur ton dôs roide se herissoit,

Quand ta grand main les monstres punissoit.

Plus ton sourci contre eus ne se renfrongne

Comme il souloit. O honteuse vergongne,

O deshonneur. Hercule estant donté

(Aprés avoir le monde surmonté)

Non d'Eurysthée, ou de Junon cruëlle,

Mais de la main d'une simple pucelle.

Voiés pour Dieu quelle force a l'Amour!

Quand une fois elle a gaingné la tour

De la raison, el' ne laisse partie

Qui ne soit toute en fureur convertie.

Ce n'est pas tout, seulement pour aimer.

Il n'oublia la façon de s'armer,

Ou d'anpougner sa masse hazardeuse,

Ou d'achever quelque enprise douteuse:

Mais lent et vain, abatardant son coeur,

Et son esprit qui l'avoit fait veincueur

De tout le monde, o plus lache difame,

Il s'abilla des habis d'une femme,

Et d'un Heros devenu damoiseau

Guidoit l'aiguille, ou tournoit le fuzeau

Et vers le soir, comme une chambriere

Rendoit sa tache à douce joliere,

Qui le tenoit en ses laz plus serré

Qu'un prisonnier dans un cep enferré.

Vraiment Junon, tu es assés vengée

De voir ainsi sa vie estre changée,

De voir ainsi devenu filandier

Ce grand Alcid de tant de rois meurdrier,

Sans ajouter à ton ire indontée

Les mandemens de son frere Eurysthée.

Que veus-tu plus? Iole le contraint

D'estre une femme, il la doute, il la craint:

Il craint ses mains, plus qu'un valet esclave

Ne craint les cous de quelques maistre brave

Et ce pendant qu'il ne fait que penser

A s'atifer, à s'oindre, à s'agencer,

A dorloter sa barbe bien rougnée,

A mignoter sa teste bien paignée;

Impuniment les monstres ont loisir

D'asujetir la terre à leur plaisir,

Sans plus cuider qu'Hercule soit au monde:

Aussi n'est-il, car la poison profonde

Qui dans son coeur s'aloit trop dérivant

L'avoit tué dedans un cors vivant.

Nous donq, Muret, à qui la méme rage

Peu cautement afole le courage,

S'il est possible éviton le lien

Que nous ordît l'anfant Cytherien:

Et rabaisson le vouloir qui domine,

Desous le joug de la raison divine,

Raison qui deût au vrai bien nous guider,

Et de nos sens maistresse presider.

Mais si l'amour las! las! trop miserable

A desja fait nôtre plaie incurable

Tant que le mal peu sujét au conseil

De la raison dedaigne l'apareil,

Veincus par lui, faison place à l'envie,

Et sus Alcid deguison nôtre vie:

Encependant que les riddes ne font

Créper encor le cham de nôtre front

Et que la neige avant l'age venüe

Ne fait encor nôtre teste chenüe,

Qu'un jour ne coule entre nous pour neant

Sans suivre amour, car il n'est mal seant

Pour quelquefois au sinple populaire

Des grans seigneurs imiter l'exemplaire.

II

Sonnet à Cassandre

Prenés mon coeur, dame, prenés mon coeur,

Prenés mon coeur, je vous l'offre, madame,

Car il est vôtre, et ne peut d'autre fame,

Tant vôtre il est, devenir serviteur.

Donque si vôtre, il meurt vôtre en langueur,

Vôtre à jamais, vôtre en sera le blâme,

Et si là bas voirés punir vôtre âme,

Pour ce malfait, d'une juste rigueur.

Quand vous seriés quelque fille d'un Scythe,

Encore l'amour qui les Tygres incite

Vous forceroit de mon mal secourir:

Mais vous trop plus, qu'une Tygresse, fiere,

De mon coeur vôtre helas estes meurtriere,

Et ne vivés que de le voir mourir.

Sonets

I

Amour, quiconque ait dit que le ciel fut ton pere,

Et que Venus la douce en ses flancs te porta,

Il mentit lachement: une ourse en avorta

S'une ourse d'un tel fils se veut dire la mere.

Des chams Massyliens la plus cruelle fere

Entre ses lionneaus sus un roc t'alaitta,

Et, t'ouvrant ses tetins, par son lait te jetta

Tout à l'entour du coeur sa rage la plus fiere.

Rien ne te plaist, cruel, que sanglos et que pleurs,

Que dechirer nos coeurs d'épineuses douleurs,

Que tirer tout d'un coup mile mors de ta trousse.

Un si mechant que toi du ciel n'est point venu.

Si Venus t'eust conceu, tu eusses retenu

Quelque peu de douceur d'une mere si douce.

II

Beauté dont la douceur pourroit vaincre les Rois,

Mon coeur que vous tenés dans vos yeus en servage,

Helas, pour Dieu rendés le! ou me baillés en gage

Le vôtre, car sans coeur vivre je ne pourrois.

Quand mort en vous servant, sans mon coeur je serois,

Plus que vous ne pensés, ce vous seroit dommage

De perdre un tel ami, à moi grand avantage,

Grand honneur et plaisir quand pour vous je mourrois.

Ainsi nous ne pouvons encourir de ma mort

Vous, madame, qu'un blâme, et moi qu'un reconfort,

Pourveu que mon trepas vous plaise en quelque chose:

Et veus que sur ma lame Amour aille ecrivant:

Celui qui gît ici sans coeur estoit vivant,

Et trespassa sans coeur, et sans coeur il repose.

III

Amour, qui si long tans en peine m'as tenu,

S'il te plaist d'amolir la fierté de la belle

Qui se montre en ma plaie à grand tort si cruelle;

Tant que par ton moyen mon travail soit connu,

Sur un Terme doré je te peindrai tout nu,

En l'air un pié levé, à chaque flanc une aelle,

L'arc courbé dans la main, le carquois sous l'esselle,

Le cors gras et douillet, le poil crespe et menu.

Tu sais, Amour, combien mon coeur soufre de peine:

Mais las! plus humble il est, plus d'audace elle est pleine

Et mesprise tes dards, comme si tout son coeur

Etoit environné de quelque roche dure:

Que d'un trait elle sente à tout le moins, Seigneur,

Qu'un mortel ne doit point aus Dieus faire d'injure.

IV

Je puisse donc mourir si encores j'arreste

Une heure en cette vile, où par le vueil des Dieus

Sur mon vint et un an le feu de deus beaus yeus

(Souvenir trop amer) me fouldroia la teste.

Le Grec qui a senti la meurdriere tempeste

Des rochers Cafarés, n'aborde plus tels lieus,

Et s'il les voit de loin, ils lui sont odieus,

Et pour les eviter tient sa navire preste.

A Dieu donc, vile, à Dieu, puis qu'en toi je ne fais

Que toujours ressemer le mal dont je me pais

Et toujours refraichir mon ancienne plaie:

Je ne suis plus si sot de souhetter la mort,

C'est trop soufert de peine; il est tans que j'essaie

Apres mile perils, de rencontrer le port.

V

Ah, que malheureus est cestui là qui s'empestre

Dans les liens d'amour, sa peine est plus cruelle

Que si tournoit là bas la rou continuelle,

Ou s'il bailloit son coeur aux aigles à repaistre.

Maugré lui dans son âme à toute heure il sent naître

Un joïeus deplaisir qui douteus l'épointelle,

Quoi l'épointelle! ainçois le genne et le martelle,

Sa raison est veinquë et l'apetit est maistre.

Il ressemble à l'oiseau, qui tant plus se remüe

Captif dans les gluaus, et tant plus se r'englüe,

Se debatant en vain d'echaper l'oiseleur:

Ainsi tant plus l'amant les rets d'amour secoüe,

Plus à l'entour du col son destin les renoüe,

Pour jamais n'échaper d'un si plaisant malheur.

VI

Bien que ton oeil me face une dure escarmouche,

Moi restant le veincu, et lui toujours veinqueur,

Bien que depuis set ans sa cruelle rigueur

Me tienne prisonnier de ta beauté farouche,

Si est ce que jamais (veu la foi qui me touche)

Je ne veus echaper de si douce langueur,

Ne vivre sans avoir ton image en mon coeur,

Tes mains dedans ma plaie, et ton nom en ma bouche.

Si tu me veus tuer, tu'moi, je le veus bien,

Ma mort te sera perte, à moi un tresgrand bien,

Et l'oeuvre qu'à ton lôs je veus mettre en lumiere

Finera par ma mort, finissant mon emoi:

Ainsi, mort je serai libre de peine, et toi

Cruelle, de ton nom tu seras la meurtriere.

VII

Que ne sui-je insensible? ou que n'est mon visage

De rides labouré? ou que pui-je espendre

Sans trepasser le sang qui, chaut, subtil et tendre,

Bouillonnant dans mon coeur me trouble le courage?

Ou bien, en mon erreur que ne sui-je plus sage?

Ou, pourquoi la raison qui me devroit reprendre

Ne commande à ma chair, sans paresseuse atendre

Qu'un tel commandement me soit enjoint par l'age?

Mais que pourroi-je faire, et puis que ma maistresse,

Mes sens, mes ans, amour et ma raison traitresse

Ont juré contre moi, las! quand mon chef seroit

De vieillesse aussi blanc que la vieille Cumée,

Si est ce qu'en mon coeur le tans n'efaceroit

La douleur qui jamais ne sera consumée.

VIII

Morfée, s'il te plaist de me representer

Cette nuit ma Cassandre aussi belle et gentille

Que je la vi le soir quand sa vive scintile

Par ne sçai quel regard vint mes yeus enchanter:

Et s'il te plaist encor tant soit peu d'alenter

(Miserable souhet!) de sa feinte inutile

Le feu qu'amour me vient de son aile sutile

Tout alentour du coeur, sans repos, eventer:

Sur le haut de mon lit en voeu je t'apendrai,

Devot, un saint tableau, sur lequel je peindrai

L'heur que j'aurai reçeu de ta forme douteuse,

Et comme Jupiter à Troye fut deceu

Du Somme et de Junon, apres avoir receu

De la simple Venus la ceinture amoureuse.

IX

Ecumiere Venus, roine en Cypre puissante,

Mere des dous amours, à qui toujours se joint

Le plaisir, et le jeu, qui tout animal point

A toujours reparer sa race perissante,

Sans toi, Nimfe aime-ris, la vie est languissante,

Sans toi rien n'est de beau, de vaillant ni de coint,

Sans toi la volupté joïeuse ne vient point,

Et des Graces sans toi la grace est desplaisante.

Ores qu'en ce printans on ne sçauroit rien voir,

Qui fiché dans le coeur ne sente ton pouvoir,

Sans plus une pucelle en sera elle exente?

Si tu ne veus du tout la traiter de rigueur

Au moins que sa froideur en ce mois d'Avril sente

Quelque peu du brasier qui m'enflame le coeur.

X

Cache pour cette nuit ta corne, bonne Lune,

Ainsi Endemion soit toujours ton ami

Et sans se reveiller en ton sein endormi:

Ainsi nul Enchanteur, jamais ne t'importune.

Le jour m'est odieus, la nuit m'est oportune,

Je crains de jour l'aguet d'un voisin ennemi,

De nuit plus courageus je traverse parmi

Le camp des espions, defendu de la brune.

Tu sçais, Lune, que peut l'amoureuse poison,

Le Dieu Pan, pour le pris d'une blanche toison

Peut bien fléchir ton coeur, et vous Astres insignes

Favorisés au feu qui me tient alumé:

Car, s'il vous en souvient, la pluspart de vous, Signes,

Ne se voit luire au ciel que pour avoir aimé.

XI

Le Jeu, la Grace, et les freres jumeaus

Suivent madame, et quelque part qu'elle erre,

Dessous ses piés fait emailler la terre,

Et des Hyvers fait des printans nouveaus.

En sa faveur jargonnent les oiseaus,

Ses vens Eole en sa caverne enserre,

Le dous Zephire un dous souspir desserre,

Et tous muets s'acoisent les ruceaus.

Les Elemans se remirent en elle,

Nature rit de voir chose si belle:

Mais las! je crains que quelcun de ses Dieus

Ne passionne apres son beau visage,

Et qu'en pillant le tresor de nôtre age,

Ne la ravisse, et ne l'emporte aux cieus.

XII

Cesse tes pleurs, mon livre, il n'est pas ordonné

Du destin; que moi vif tu reçoives ta gloire:

Avant que passé j'aye outre la rive noire,

L'honneur que l'on te doit ne te sera donné.

Apres mile ans je voi que quelcun étonné

En mes vers de bien loin viendra de mon Loir boire,

Et voiant mon païs à peine voudra croire

Que d'un si petit champ tel poëte soit né.

Pren, mon livre, pren coeur, la vertu precieuse

"De l'homme quand il vit est toujours odieuse:

Mais apres qu'il est mort chacun le pense un Dieu.

La rancueur nuit toujours à ceus qui sont en vie,

Sur les vertus d'un mort elle n'a plus de lieu,

Et la postérité rend l'honneur sans envie.

XIII

Elegie à Cassandre

Mon oeil, mon coeur, ma Cassandre, ma vie,

Hé! qu'à bon droit tu dois porter d'envie

A ce grand Roi, qui ne veut plus soufrir

Qu'à mes chansons ton nom se vienne ofrir.

C'est lui qui veut qu'en trompette j'échange

Mon Luc, afin d'entonner sa louange,

Non de lui seul, mais de tous ses aïeus

Qui sont issus de la race des Dieus.

Je le ferai puis qu'il me le commande,

Car d'un tel Roi la puissance est si grande,

Que tant s'en faut qu'on la puisse eviter,

Qu'un camp armé n'y pourroit resister.

Mais que me sert d'avoir tant leu Catulle

Ovide, et Galle, et Properse et Tibulle,

Avoir tant veu Petrarche et tant noté,

Si par un Roi le pouvoir m'est osté

De les ensuivre, et si faut que ma lyre

Pendüe au croc ne m'ose plus rien dire.

Donques en vain je me paissois d'espoir

De faire un jour à la Thuscane voir

Que nôtre France, autant qu'elle, est heureuse

A souspirer une pleinte amoureuse:

Et pour montrer qu'on la peut surpasser,

J'avois desja commancé de trasser

Mainte Elegie à la façon antique,

Mainte belle Ode, et mainte Bucolique.

Car, à vrai dire, encore mon esprit

N'est satisfait de ceus qui ont ecrit

En notre langue, et leur amour merite

Ou du tout rien, ou faveur bien petite.

Non que je soi vanteur si glorieus

D'oser passer les vers laborieus

De tant d'amans qui se pleignent en France:

Mais pour le moins j'avois bien esperance

Que si mes vers ne marchoient les premiers

Qu'ils ne seroient sans honneur les derniers.

Car Eraton, qui les amours decoeuvre,

D'assés bon oeil m'atiroit à son oeuvre.

L'un trop enflé les chante grossement,

L'un enervé les traine bassement,

L'un nous despaint une amie paillarde,

L'un plus aus vers qu'aus sentences regarde

Et ne peut onc, tant se sceut desguiser,

Aprendre l'art de bien Petrarquiser.

Que pleures tu, Cassandre, ma douce âme?

Encor Amour ne veut couper la trame,

Qu'en ta faveur je pandis au mestier,

Sans achever l'ouvrage tout entier.

Mon Roi n'a pas d'une Tygre sauvage

Sucé le lait, et son jeune courage,

Ou je me trompe, a senti quelques fois

Le trait d'Amour qui surmonte les Rois.

S'il l'a senti, ma coulpe est effacée,

Et sa grandeur ne sera courroucée

Qu'à mon retour des horribles combas

Hors de son croc mon Luc j'aveigne à bas,

Le pincetant, et qu'en lieu des alarmes

Je chante Amour, tes beautés, et mes larmes,

"Car l'arc tendu trop violentement,

Ou s'alentit, ou se romp vistement.

Ainsi Achille apres avoir par terre

Tant fait mourir de soudars en la guerre

Son Luc doré prenoit entre ses mains

Teintes encor de meurdres inhumains,

Et vis à vis du fils de Menetie

Chantoit l'amour de Briseis s'amie,

Puis tout soudain les armes reprenoit,

Et plus vaillant au combat retournoit.

Ainsi, apres que l'aïeul de mon maistre

Hors de combas retirera sa dextre,

Se desarmant dedans sa tante à part,

De sur le Luc à l'heure ton Ronsard

Te chantera, car il ne se peut faire

Qu'autre beauté lui puisse jamais plaire,

Ou soit qu'il vive, ou soit qu'outre le port,

Leger fardeau. Charon le passe mort.

I

Ode à Cassandre

Du jour que je fus amoureus,

Nul past tant soit-il savoureus

Ne vin tant soit-il delectable

Au coeur ne m'est point agreable,

Car depuis l'heure je ne sceu

Rien boire ou manger qui m'ait pleu:

Une tristesse en l'âme close

Me nourist, et non autre chose.

Tous les plesirs que j'estimois

Alors que libre je n'aimois,

Maintenant je les desestime,

Plus ne m'est plaisante l'escrime,

La paume, la chasse et le bal,

Mais come un sauvage animal

Je me pers dans un bois sauvage,

Loing de gens, pour celer ma rage.

L'amour fut bien forte poison

Qui m'ensorcela ma raison

Et qui me deroba l'audace

Que je portoi dessus la face,

Me faisant aller pas à pas,

Triste et pensif, le front à bas,

En home qui craint, et qui n'ose

Se fier plus en nule chose.

Le mal que l'on faint d'Ixion

N'aproche de ma passion.

Et mieus j'aymeroi de Tantale

Endurer la peine infernale

Un an, qu'estre un jour amoureus,

Pour languir autant malheureus,

Que j'ay fait, depuis que Cassandre

Tient mon coeur, et ne le veut rendre.

II

Elegie à Jan Brinon

Aus faits d'amour Diotime certaine,

Dit à bon droit qu'Amour est capitaine

De noz Daimons, et qu'il a le pouvoir

De les contraindre, ou de les emouvoir,

Come celui qui Couronnal preside

A leurs cantons, et par bandes les guide

Et que lui seul peut l'homme acouardi

En un moment rendre caut et hardi,

Quand il luy plaist l'echaufer de sa flame,

Et d'un beau soing lui époinçonner l'ame.

Auparavant que je fusse amoureus,

J'estoi, Brinon, et honteus et poureus:

Si j'entendoi quelque chose en la rue

Grouler de nuit, j'avoi l'ame éperdue,

De ça de là tout le cors me trembloit,

Au tour du coeur une peur s'assembloit

Gelant mes os, et mes saillantes venes

En lieu de sang de froideur estoient plenes,

Et d'une horreur tous mes cheveus dressés

Sous le chapeau se tenoient herissés.

Si j'avisois une torche flambante,

En m'encapant j'avoi l'âme tremblante,

Ou m'en fuioi de peur qu'on ne me vist

Ou que rougir de honte on ne me fist.

Mais par sur tout je perdoi le courage

Quand je passoi de nuit, par un bocage

Ou prés d'un antre, et me sembloit avis

Que par derriere un esprit m'avoit pris.

Ores sans peur j'eleve au ciel la teste,

Je ne crain plus ni gresle ni tempeste,

Ni les voleurs par lesquels sont pillés

Les vestemens des amans depouillés.

Ni les Daimons des antres soliteres,

Ni les espris des ombreus cemeteres,

Car le Daimon qui leur peut commander

Me tient escorte, et me fait hazarder

De mettre à fin tout ce que je propose,

Ou si je crain, je ne crain autre chose

Que le babil, l'envie et le courrous

D'une voisine, ou d'un mari jalous,

Ou qu'un plus riche en ma place ne vienne,

Et que ma dame entre ses bras le tienne

Toute une nuit, et que sot ce pendant

A l'huis fermé je ne bée, attendant

Que l'on m'appelle, ou qu'une chambriere

Vienne éconduire humblement ma priere

Par une excuse, et me laissant davant

La porte close, à la pluye et au vent,

Triste et pensif je ne me couche à terre,

Tremblant de froid au bruit de ma guiterre.

Donque, Brinon, si tu te plais d'avoir

L'estomac plein de force et de pouvoir,

Sois amoureux, et tu auras l'audace

Plus forte au coeur, que si une cuirasse

Vestoit ton corps, ou si un camp armé.

Pour ton secours t'enserroit enfermé.

III

Elegie à Janet peintre du Roi

Pein moi, Janet, pein moi je te supplie

Dans ce tableau les beautés de m'amie

De la façon que je te les dirai.

Comme importun je ne te supplirai

D'un art menteur quelque faveur lui faire,

Il sufist bien si tu la sçais portraire

Ainsi qu'elle est, sans vouloir deguiser

Son naturel pour la favoriser,

Car la faveur n'est bonne que pour celles

Qui se font peindre, et qui ne sont pas belles.

Fai luy premier les cheveus ondelés,

Noués, retors, recrepés, annelés.

Qui de couleur le cedre representent,

Ou les demesle, et que libres ils sentent

Dans le tableau, si par art tu le peus,

La mesme odeur de ses propres cheveus.

D'un crespe noir sa teste soit voilée,

Puis d'une toile en cent plis canelée,

Telle qu'on dit que Cleopatre avoit

Quand par la mer Anthoine elle suivoit,

Et qu'elle assise au plus haut de sa poupe.

Au bruit du Cistre encourageoit sa troupe.

Fai lui le front en bosse revouté,

Sur lequel soient d'un et d'autre costé,

Peins gravement sur trois sieges d'ivoire,

La majesté, la vergongne, et la gloire.

Que son beau front ne soit entrefendu,

De nul sillon en profond estendu,

Mais qu'il soit tel qu'est la pleine marine

Quand tant soit peu le vent ne la mutine,

Et que gisante en son lit elle dort

Calmant ses flots sillés d'un somme mort.

Tout au meillieu par la greve descende

Un beau rubi, de qui l'esclat s'epande

Par le tableau, ainsi qu'on voit de nuit

Briller les rais de la lune qui lui

Dessus la nege au fond d'un val coulée,

De trace d'home encore non foulée.

Apres fai lui son beau sourci voutis

D'ebene noir, et que son pli tortis

Semble un croissant qui montre par la nue

Au premier mois sa vouture cornue:

Ou si jamais tu as veu l'arc d'Amour,

Pren le portrait dessus le demi tour

De sa courbure à demi cercle close,

Car l'arc d'Amour et lui n'est qu'une chose:

Mais las! mon Dieu, mon Dieu je ne sai pas

Par quel moïen, ni comment, tu peindras

(Voire eusse tu l'artifice d'Apelle)

De ses beaus yeux la grace naturelle,

Qui font vergongne aus estoilles des cieus:

Que l'un soit dous, l'autre soit furieus,

Que l'un de Mars, l'autre de Venus tienne,

Que du benin tout esperance vienne,

Et du cruel vienne tout desespoir:

Ou que l'un soit pitoiable à le voir,

Come celuy d'Ariadne delessée

Aus bors de Die, alors que l'incensée,

Voyant la mer, de pleurs se consommoit,

Et son Thesée en vain elle nommoit.

L'autre soit gay, come il est bien croiable

Que l'eut jadis Penelope louable

Quand elle vit son mari retourné,

Aiant vint ans loing d'elle sejourné.

Apres fai lui sa rondelette oreille,

Petite, unie, entre blanche et vermeille,

Qui sous le voile aparoisse à l'egal

Que fait un lis enclos dans un cristal,

Ou tout ainsi qu'aparoist une rose

Tout fraichement dedans un verre enclose.

Mais pour neant tu aurois fait si beau

Tout l'ornement de ton riche tableau,

Si tu n'avois de la lineature

De son beau nez bien portrait la peinture:

Pein le moi donc gresle, long aquilin,

Poly, traitis, où l'envieus malin,

Quand il voudroit, n'i sçauroit que reprendre,

Tant proprement tu le feras descendre

Parmi la face, ainsi comme descend

Dans une pleine un petit mont qui pend.

Apres au vif pein moi sa belle joüe

Du mesme taint d'une rose qui noüe

De sur du laict, ou du taint blanchissant

Du lis qui baise un oeillet rougissant.

Dans le meillieu portrais une fossette,

Fossette, non, mais d'Amour la cachette,

D'où ce garson de sa petite main

Lache cent traitz, et jamais un en vain

Que par les yeux droit au coeur il ne touche.

Helas, Janet, pour bien peindre sa bouche

A peine Homere en ses vers te diroit

Quel vermeillon egualer la pouroit,

Car pour la peindre ainsi qu'elle merite,

Peindre il faudroit celle d'une Charite.

Pein la moy donc qu'elle semble parler,

Ores sourire, ores embasmer l'air

De ne sçay quelle ambrosienne haleine.

Mais par sur tout fai qu'elle semble pleine

De la douceur de persuasion.

Tout à l'entour atache un milion

De ris, d'atrais, de jeux, de courtoisies,

Et que deux rangs de perlettes choisies

D'un ordre egal en la place des dens

Bien poliment soient arengés dedans.

Pein tout autour une levre bessonne,

Qui d'elle mesme, en s'elevant, semonne

D'estre baisée, aiant le taint pareil

Ou de la rose, ou du coural vermeil,

Elle flambante au printems sur l'espine,

Luy rougissant au fond de la marine.

Pein son menton au meillieu fosselu

Et que le bout en rondeur pommelu

Soit tout ainsi que l'on voit aparoistre

Le bout d'un coin qui ja commence à croistre.

Plus blanc que laict caillé de sur le jonc

Pein lui le col, mais pein-le un petit long,

En forme d'Istme, et sa gorge douillette

Comme le col soit un petit longuette.

Apres fai lui par un juste compas,

Et de Junon les coudes et les bras,

Et les beaux dois de Minerve, et encore

La main pareille à celle de l'Aurore.

Je ne sçay plus, mon Janet, où j'en suis,

Je suis confus, et muet je ne puis,

Comme j'ay fait, te declarer le reste

De ses beautés, qui ne m'est manifeste:

Las! car jamais tant de faveur je n'u

Que d'avoir veu ses beaus tetins à nu

Mais si l'on peut juger par conjecture,

Persuadé de raisons, je m'asseure

Que la beauté qui ne s'aparoist doit

Du tout respondre à celle que l'on voit.

Donque pein la, et qu'elle me soit faite

Parfaitte autant comme l'autre est parfaitte.

Ainsi qu'en bosse eleve moi son sein,

Net, blanc, poly, large; profond et plein.

Dedans lequel mile rameuses venes.

De rouge sans tresaillent toutes plenes.

Puis quant au vif tu auras decouvers

Desous la peau les muscles et les ners,

Enfle au dessus deux pommes nouvelettes

Comme l'on voit deux pommes verdelettes

D'un orenger, qui encores du tout

Ne font qu'à l'heure à se rougir au bout.

Tout au plus haut des épaules marbrines,

Pein le sejour des Charites divines

Et que l'Amour sans cesse voletant

Toujours les couve, et les aille éventant,

Pensant voler avec le Jeu son frere

De branche en branche es vergers de Cythere.

Un peu plus bas, en miroir arondi,

Tout poupellé, gracelet, rebondi,

Come celui de Venus, pein son ventre:

Pein son nombril ainsi qu'un petit centre,

Le fond duquel paroisse plus vermeil

Qu'un bel oeilet entr'ouvert au soleil.

Qu'atens tu plus? Portrai moi l'autre chose

Qui est si belle, et que dire je n'ose,

Et dont l'espoir impatient me point:

Mais je te pry ne me l'ombrage point,

Si ce n'estoit d'un voile fait de soie,

Clair et subtil, affin qu'on l'entrevoie,

Ses cuisses soient come faites au tour

En grelissant, rondes tout à l'entour,

Ainsi qu'un terme arondi d'artifice

Qui soutient ferme un royal edifice.

Come deus monts enleve ses genous,

Douillets, charnus, ronds, delicas, et mous,

Dessous lesquels fay lui la greve plene,

Telle que l'ont les vierges de Lacene,

Alant lutter au rivage connu

Du fleuve Eurote, ayans le cors tout nu,

Ou bien chassans à meutes decouplées

Quelque grand cerf es forets Amiclées.

Puis pour la fin portrai lui de Thetis

Les piés estrois, et les tallons petis.

Ha, que fais-tu? tu gaste ton ouvrage,

Tu faus, Janet, à peindre son visage,

Le paignant mal tu pers de ton renom:

Vien, sui mes pas au logis de Brinon,

Là tu verras, dans un coin de sa salle

Une peinture aus déesses egale,

Qu'il fist tracer par la main des amours

Pour sa Sidere, afin que tous les jours

En la voiant eust souvenance d'elle:

Je veus du tout que m'amie soit telle

Ne lui pein donc, Janet, ne pis ne mieux,

Le front, le nez, la bouche, ni les yeux.

Ha, je la voy! elle est presque portraite,

Encor un trait, encor un, elle est faite,

Leve tes mains, ha mon Dieu je la voy!

Bien peu s'en faut qu'elle ne parle à moy.

IV

Ode à sa maîtresse

Quand au temple nous serons

Agenouillés, nous ferons

Les devots selon la guise

De ceus qui pour loüer Dieu,

Humbles se courbent au lieu

Le plus secret de l'église.

Mais quand au lit nous serons

Entrelassés, nous ferons

Les lascifs, selon les guises

Des amans, qui librement

Pratiquent folatrement

Dans les dras cent mignardises.

Pourquoi donque, quand je veus

Ou mordre tes beaus cheveus,

Ou baiser ta bouche aimée,

Ou tatonner ton beau sein,

Contrefais-tu la nonnain

Dedans un cloistre enfermée?

Pour qui gardes-tu tes yeus,

Et ton sein delicieus,

Ta joue et ta bouche belle?

En veus-tu baiser Pluton

Là-bas, apres que Caron

T'aura mise en sa nacelle?

Apres ton dernier trespas,

Gresle, tu n'auras là bas

Qu'une bouchette blesmie:

Et quand mort je te verrois

Aus ombres je n'avourois

Que jadis tu fus m'amie.

Ton test n'aura plus de peau,

Et ton visage si beau

N'aura venes ny arteres,

Tu n'auras plus que les dens,

Telles qu'on les voit dedans

Les testes des cimeteres.

Donque, tandis que tu vis,

Change, maistresse, d'avis,

Et ne m'espargne ta bouche:

Incontinent tu mourras,

Lors tu te repentiras

De m'avoir esté farouche.

Ah je meurs, ah baise moi,

Ah maistresse aproche toi,

Tu fuis comme fan qui tremble,

Au moins soufre que ma main

S'esbate un peu dans ton sein

Ou plus bas si bon te semble.

V

Sonnet

Celui qui boit, comme a chanté Nicandre,

De l'Aconite, il a l'esprit troublé,

Tout ce qu'il voit lui semble estre doublé,

Et sur ses yeux la nuit se vient espandre.

Celui qui boit de l'amour de Cassandre,

Qui par ses yeux au coeur est ecoulé,

Il perd raison, il devient afolé,

Cent fois le jour la Parque le vient prendre.

Mais la chaut vive, ou la rouille, ou le vin

Ou l'or fondu peuvent bien mettre fin

Au mal cruel que l'Aconite donne:

La mort sans plus a pouvoir de garir

Le coeur de ceux que Cassandre empoisonne,

Mais bien heureux qui peut ainsi mourir.

VI

Sonnet

J'ai pour maistresse une etrange Gorgonne,

Qui va passant les anges en beauté,

C'est un vray Mars en dure cruauté,

En chasteté la fille de Latonne.

Quand je la voy, mile fois je m'estonne

La larme à l'oeil, ou que ma fermeté.

Ne la flechit, ou que sa dureté

Ne me conduit d'où plus on ne retourne.

De la nature un coeur je n'ay receu,

Ainçois plus tost pour se nourir en feu

En lieu de luy j'ay une Salamandre,

Car si j'avoi de chair un coeur humain,

Long tems y a qu'il fust reduit en cendre,

Veu le brasier dont toujours il ard plain.

VII

Sonnet

Que tu es, Ciceron, un affetté menteur,

Qui dis, qu'il n'y a mal sinon que l'infamie

Si tu portois celui que me cause m'amie,

Pour le moins tu dirois que c'est quelque malheur.

Je sen journelement un aigle sus mon coeur,

J'entens un soing grifu, qui come une Furie

Me ronge impatient, puis tu veus que je die,

Abusé de tes mots, que mal n'est pas douleur.

Vous en disputerés, ainsi que bon vous semble,

Vous philosophes Grés, et vous Romains ensemble,

Mais je croy pour le seur qu'un travail langoureux

Est douleur, quand Amour l'encharne dedans l'ame,

Et que le deshonneur, la honte et le diffame

N'est point de mal, au pris du tourment amoureux.

VIII

Sonnet

Foudroye moy de grace ainsi que Capanée,

O pere Jupiter, et de ton feu cruel

Esteins moy l'autre feu qu'Amour continuel

Toujours m'alume au coeur d'une flame obstinée.

E ne vaut-il pas mieus qu'une seul journée

Me despouille soudain de mon fardeau mortel,

Que de soufrir toujours en l'ame un tourment tel

Que n'en soufre aus enfers l'ame la plus damnée?

Ou bien si tu ne veus, pere, me foudroyer

Donne le desespoir qui me meine noyer,

M'elançant du sommet d'un rocher solitaire,

Puis qu'autrement par soing, par peine et par labeur,

Par ennuy, par travail, je ne me puis defaire

D'amour, qui maugré moi tient fort dedans mon coeur.

IX

Sonnet

Amour, tu semble au phalange qui point,

Lui de sa queüe, et toi de ta quadrelle:

De tous deux est la pointure mortelle,

Qui rempe au coeur, et si n'aparoist point.

Sans soufrir mal tu me conduis au point

De la mort dure, et si ne voy par quelle

Playe je meurs, ny par quelle moüelle

Ton venin s'est autour de mon coeur joint.

Ceus qui se font saigner le pié dans l'eau,

Meurent sans mal, pour un crime nouveau

Fait à leur roy, par traitreuse cautelle:

Je meurs comme eus, voire et si je n'ay fait

Encontre Amour ni traison, ni forfait,

Si trop aymer un crime ne s'appelle.

X

Chanson

Il me semble que la journée

Coule plus longue qu'une année,

Quand par malheur je n'ay ce bien

De voir la grand beauté de celle

Qui tient mon coeur, et sans laquelle

Veissé-je tout je ne voy rien.

Quiconque fut jadis le sage

Qui dit que l'amoureux courage

Vit de ce qu'il ayme, il dit vrai:

Ailleurs vivant il ne peut estre,

Ni d'autre viande se paistre,

J'en suis seur, j'en ai fait l'essay.

Toujours l'amant vit en l'aimée;

Pour cela mon ame afamée

Ne se veut souler que d'amour,

De l'amour elle est si friande,

Que sans plus de telle viande

Se veut repaistre nuit et jour.

Si quelcun dit que je m'abuse,

Voye luimesme la Meduse

Qui d'un rocher m'a fait le coeur,

Et l'ayant veüe, je m'asseure

Qu'il sera fait sus la mesme heure

Le compagnon de mon malheur.

Car est-il home que n'enchante

La voix d'une dame savante,

Et fust-il Scythe en cruauté:

Il n'est point de plus grand magie

Que la docte voix d'une amie,

Quand elle est jointe à la beauté.

Or j'aime bien, je le confesse

Et plus j'iray vers la vieillesse

Et plus constant j'aimeray mieux:

Je n'obliray, fussai-je en cendre,

La douce amour de ma Cassandre,

Qui loge mon coeur dans ses yeux.

Adieu liberté ancienne,

Comme chose qui n'est plus mienne,

Adieu ma chere vie, adieu,

Ta fuite ne me peut déplaire,

Puis que ma perte voluntaire

Se retreuve en un si beau lieu.

Chanson, vaten où je t'adresse,

Dans la chambre de ma maistresse:

Di lui, baisant sa blanche main,

Que pour en santé me remettre,

Il ne lui faut sinon permettre

Que tu te caches dans son sein.

I

Thiard, chacun disoit à mon commencement

Que j'estoi trop obscur au simple populaire:

Aujourd'hui, chacun dit que je suis au contraire,

Et que je me dements parlant trop bassement.

Toi, qui as enduré presqu'un pareil torment,

Di moi, je te suppli, di moi que doi-je faire?

Di moi, si tu le sçais, comme doi-je complaire

A ce monstre testu, divers en jugement?

Quand j'escri haultement, il ne veult pas me lire,

Quand j'escri bassement, il ne fait qu'en médire:

De quel estroit lien tiendrai-je, ou de quels clous,

Ce monstrueux Prothé, qui se change à tous cous?

Paix, paix, je t'enten bien: il le faut laisser dire,

Et nous rire de lui, comme il se rit de nous.

II

Jodelle, l'autre jour, l'enfant de Cytherée

Au combat m'apela, courbant son arc Turquois,

Et lors comme hardi, je vesti le harnois,

Pour avoir contre luy ma peau mieus asseurée.

Il me tira premier une fleche acerée

Droict au coeur, puis une autre, et puis tout à la fois

Il decocha sur moi les traicts de son carquois,

Sans qu'il eust d'un seul coup ma poictrine enferrée.

Mais quand il vit son arc de fleches desarmé,

Tout dépit s'est lui-mesme en fleche transformé,

Puis se rua dans moi d'une puissance extreme:

Quand je me vi vaincu, je me désarmé lors:

Car, las! que m'eust servi de m'armer par dehors,

Ayant mon ennemi caché dedans moimesme.

III

Ce pendant que tu vois le superbe rivage

De la riviere Tusque, et le mont Palatin,

Et que l'air des Latins te fait parler latin,

Changeant à l'étranger ton naturel langage,

Une fille d'Anjou me detient en servage,

A laquelle baisant maintenant le tetin,

Et maintenant les yeux endormis au matin,

Je vy (comme lon dit) trop plus heureus que sage.

Tu diras à Maigni, lisant ces vers ici,

Et, quoi! Ronsard est donq encores amoureus?

Mon Bellay, je le suis, et le veus estre aussi,

Et ne veus confesser qu'Amour soit malheureux,

Ou si c'est un malheur, baste, je delibere

De vivre malheureus en si belle misere.

IV

Peletier mon ami, le tems leger s'enfuit,

Je change nuit et jour de poil et de jeunesse:

Mais je ne change pas l'amour d'une maistresse,

Qui, dans mon cueur colée, eternelle me suit.

Toi qui es des anfance en tout savoir instruit,

(Si de nottre amitié l'antique neud te presse)

Comme sage et plus vieil, donne moi quelque adresse

Pour eviter ce mal qui ma raison detruit.

Aide-moi, Peletier, si par philosophie

Ou par le cours des cieus tu as jamais apris

Un remede d'amour, di-le moi je te prie,

Car, bien qu'ores au ciel ton cueur soit elevé,

Si as-tu quelquefois d'une dame esté pris.

Et pour dieu! conte-moi comme tu t'es sauvé.

V

Aurat, apres ta mort, la terre n'est pas digne

Pourrir si docte cors, comme est vraiment le tien.

Les Dieux le changeront en quelque vois: ou bien,

Si Echon ne sufist, le changeront en cigne,

Ou, en ce corps qui vit de rosée divine,

Ou, en mouche qui fait le miel hymettien,

Ou, en l'oiseau qui chante et le crime ancien

De Terrée au printemps redit sus une épine.

Ou, si tu n'es changé tout entier en quelqu'un,

Tu vétiras un cors qui te sera commun

Avecques tous ceus-cy, participant ensemble

De tous (car un pour toi sufisant ne me semble)

Et d'homme seras fait un beau monstre nouveau

De voix, cigne, cigalle, et de mouche, et d'oyseau.

VI

E, n'esse, mon Paquier, é n'esse pas grand cas,

Bien que le corps party de tant de membres j'aye,

De muscles, nerfs, tendons, de pommons, et de faye,

De mains, de pieds, de flancs, de jambes et de bras,

Qu'Amour les laisse en paix, et ne les navre pas,

Et que luy pour son but, opiniatre, essaye

De faire dans mon coeur toujours toujours la playe,

Sans que jamais il vise ou plus hault, ou plus bas!

S'il estoit un enfant (comme on dit) aveuglé,

Son coup ne seroit point si seur ne si reiglé,

Vrayment il ne l'est pas, car ses traits à tout-heure

Ne se viendroient ficher au coeur en mesme lieu.

Armerai-je le mien? non, car des traits d'un Dieu

Il me plaist bien mourir, puis qu'il fault que je meure.

VII

Marie, qui voudroit vostre beau nom tourner,

Il trouveroit Aimer: aimez-moi donq, Marie,

Faites cela vers moi dont vostre nom vous prie,

Vostre amour ne se peut en meilleur lieu donner:

S'il vous plaist pour jamais un plaisir demener,

Aimez-moi, nous prendrons les plaisirs de la vie,

Penduz l'un l'autre au col, et jamais nulle envie

D'aimer en autre lieu ne nous pourra mener.

Si faut il bien aimer au monde quelque chose:

Cellui qui n'aime point, cellui-là se propose

Une vie d'un Scyte; et ses jours veut passer

Sans gouster la douceur des douceurs la meilleure.

E, qu'est-il rien de doux sans Venus? las! à l'heure

Que je n'aimeray point puissai-je trépasser!

VIII

Marie, vous passez en taille, et en visage,

En grace, en ris, en yeus, en sein, et en teton,

Votre moienne seur, d'autant que le bouton

D'un rosier franc surpasse une rose sauvage.

Je ne dy pas pourtant qu'un rosier de bocage

Ne soit plaisant à l'oeil, et qu'il ne sente bon:

Aussi je ne dy pas que vostre seur Thoinon

Ne soit belle, mais quoy? vous l'estes davantage.

Je scay bien qu'apres vous elle a le premier pris

De ce bourg, en beauté, et qu'on seroit espris

D'elle facilement, si vous estiez absente:

Mais quand vous aprochez, lors sa beauté s'enfuit,

Ou morne elle devient par la vostre presente,

Comme les astres font quand la Lune reluit.

IX

Marie, à tous les coups vous me venez reprendre

Que je suis trop leger, et me dites tousjours.

Quand je vous veus baiser que j'aille à ma Cassandre,

Et tousjours m'apellez inconstant en amours.

Je le veus estre aussi, les hommes sont bien lours

Qui n'osent en cent lieux neuve amour entreprendre.

Cétui-là qui ne veut qu'à une seule entendre,

N'est pas digne qu'Amour lui face de bons tours.

Celui qui n'ose faire une amitié nouvelle,

A faute de courage, ou faute de cervelle,

Se defiant de soi, qui ne peut avoir mieus.

Les hommes maladis, ou mattés de vieillesse,

Doivent estre constans: mais sotte est la jeunesse

Qui n'est point eveillée, et qui n'aime en cent lieus.

X

Marie, vous avés la joue aussi vermeille

Qu'une rose de Mai, vous avés les cheveus

De couleur de chastaigne, entrefrisés de neus,

Gentement tortillés tout-au-tour de l'oreille.

Quand vous estiés petite, une mignarde abeille

Dans vos levres forma son dous miel savoureus,

Amour laissa ses traits dans vos yeus rigoreus,

Pithon vous feit la vois à nulle autre pareille.

Vous avés les tetins comme deus mons de lait,

Caillé bien blanchement sus du jonc nouvelet

Qu'une jeune pucelle au mois de Juin façonne:

De Junon sont vos bras, des Graces vostre sein,

Vous avés de l'Aurore et le front, et la main,

Mais vous avés le coeur d'une fiere lionne.

XI

Je ne suis seulement amoureus de Marie,

Janne me tient aussy dans les liens d'Amour,

Ore l'une me plaist, ore l'autre à son tour:

Ainsi Tibulle aimoit Nemesis, et Delie.

On me dira tantost que c'est une folie

D'en aimer, inconstant, deux ou trois en un jour,

Voire, et qu'il faudroit bien un homme de sejour,

Pour, gaillard, satisfaire à une seule amie.

Je repons à cela, que je suis amoureus,

Et non pas jouissant de ce bien doucereus,

Que tout amant souhaite avoir à sa commande.

Quant à moi, seulement je leur baise la main,

Je devise, je ry, je leur taste le sein,

Et rien que ces biens là d'elles je ne demande.

XII

Amour estant marri qu'il avoit ses saigettes

Tiré contre Marie, et ne l'avoit blessée,

Par depit dans un bois sa trousse avoit laissée,

Tant que plene elle fust d'un bel essaim d'avettes.

Ja de leurs piquerons ces captives mouchettes

Pour avoir liberté la trousse avoient persée:

Et s'enfuyoient alors qu'Amour l'a renversée

Sur la face à Marie, et sus ses mammelettes.

Soudain, apres qu'il eut son carquois dechargé,

Tout riant sautela, pensant estre vangé

De celle, à qui son arc n'avoit sceu faire outrage,

Mais il rioit en vain: car ces filles du ciel

En lieu de la piquer, baisans son beau visage,

En amassoyent les fleurs, et en faisoyent du miel.

XIII

Je veuls, me souvenant de ma gentille amie,

Boire ce soir d'autant: et pource Corydon

Fay remplir mes flacons, et verse à l'abandon

Du vin, pour resjouir toute la compagnie.

Soit que m'amie ait nom, ou Cassandre, ou Marie,

Je m'en vois boire autant que de lettre a son nom.

Et toi, si de ta belle et jeune Madelon,

Belleau, l'amour te point, je te pry ne l'oublie.

Qu'on m'ombrage le chef de vigne, et de l'hierre,

Les bras, et tout le col, qu'on enfleure la terre

De roses, et de lis, et que dessus le jonc

On me caille du lait rougi de mainte fraise:

E n'esse pas bien fait? or sus, commençon donq,

Et chasson loin de nous tout soing et tout malaise.

XIV

Que me servent mes vers, et les sons de ma lyre,

Quand nuit et jour je change et de meurs et de peau,

Pour en aimer trop une? hé, que l'homme est bien veau

Qui aux dames se fie, et pour elles souspire!

Je pleure, je me deux, je cry, je me martire,

Je fais mile sonnetz, je me romps le cerveau,

Et si je suy haï: un amoureus nouveau

Gaigne tousjours ma place, et je ne l'ose dire.

Ah! que ma Dame est fine: el' me tient à mépris,

Pource qu'elle voit bien que d'elle suis espris;

Et que je l'aime trop: avant que je l'aimasse,

Elle n'aimoit que moi: mais or que j'ai empris

De l'aimer, el' me laisse, et s'en court à la chasse

Pour en reprendre un autre ainsi qu'elle m'a pris.

XV

Ma plume sinon vous ne scait autre suget,

Mon pié sinon vers vous ne scait autre voiage,

Ma langue sinon vous ne scait autre langaige,

Et mon oeil sinon vous ne connoit autre objet.

Si je souhaite rien, vous estes mon souhait,

Vous estes le doux gaing de mon plaisant dommage,

Vous estes le seul but ou vise mon courage,

Et seulement en vous tout mon rond se parfait.

Je ne suis point de ceus qui changent de fortune,

Comme un tas d'amoureus, aimans aujourd'huy l'une,

Et le lendemain l'autre: helas! j'ayme trop mieus

Cent fois que je ne dy, et plustost que de faire

Chose qui peut en rien nostre amytié defaire,

J'aimerois mieux mourir, tant j'aime vos beaux yeus.

XVI

Vous ne le voulez pas? et bien, j'en suis contant,

Contre vostre rigueur Dieu me doint patience,

Devant qu'il soit vingt ans j'en auray la vengence,

Voiant ternir vos yeus qui me travaillent tant.

On ne voit amoureus au monde si constant

Qui ne perdist le coeur, perdant sa recompense:

Quant à moi, si ne fust la longue experience,

Que j'ay, de soufrir mal, je mourrois à l'instant.

Toutesfois quand je pense un peu dans mon courage

Que je ne suis tout seul des femmes abusé,

Et que de plus rusés en ont reçeu dommage,

Je pardonne à moimesme, et m'ay pour excusé:

Car vous qui me trompés en estes coutumiere,

Et qui pis est, sur toute en beauté la premiere.

XVII

Le vintiéme d'Avril couché sur l'herbelette,

Je vy, ce me sembloit, en dormant un chevreuil,

Qui çà, puis là, marchoit où le menoit son vueil,

Foulant les belles fleurs de mainte gambelette.

Une corne et une autre encore nouvelette

Enfloit son petit front, petit, mais plein d'orgueil:

Comme un Soleil luisoit par les prets son bel oeil,

Et un carquan pendoit sus sa gorge douillette.

Si tost que je le vy, je voulu courre aprés,

Et lui qui m'avisa print sa course es forés,

Où, se moquant de moi, ne me voulut attendre.

Mais en suivant son trac, je ne m'avisay pas

D'un piege entre les fleurs, qui me lia mes pas,

Et voulant prendre autrui moimesme me fis prendre.

XVIII

Bien que vous surpassiés en grace et en richesse

Celles de ce païs, et de toute autre part,

Vous ne devés pourtant, et fussiés vous princesse,

Jamais vous repentir d'avoir aimé Ronsard.

C'est lui, Dame, qui peut avecque son bel art

Vous afranchir des ans, et vous faire Deesse:

Prométre il peut cela, car rien de lui ne part

Qu'il ne soit immortel, et le ciel le confesse.

Vous me responderés qu'il est un peu sourdaut,

Et que c'est deplaisir en amour parler haut:

Vous dites verité, mais vous celés aprés,

Que luy, pour vous ouir, s'aproche à vôtre oreille,

Et qu'il baise à tous coups vôtre bouche vermeille

Au milieu des propos, d'autant qu'il en est prés.

XIX

Mais respons, meschant Loir, me rens-tu ce loier,

Pour avoir tant chanté ta gloire et ta louange?

As-tu osé, barbare, au milieu de ta fange

Renversant mon bateau, sous tes eaus m'envoier?

Si ma plume eut daigné seulement emploier

Six vers, à celebrer quelque autre fleuve estrange,

Quiconque soit celui, fusse le Nil, ou Gange,

Comme toi n'eust voulu dans ses eaus me noier:

D'autant que je t'aimoi, je me fiois en toi,

Mais tu m'as bien montré que l'eau n'a point de foi:

N'es-tu pas bien meschant? pour rendre plus famé

Ton cours, à tout jamais du los qui de moi part,

Tu m'as voulu noier, afin d'estre nommé,

En lieu du Loir, le fleuve où se noya Ronsard.

XX

Amour, tu me fis voir, pour trois grandes merveilles,

Trois seurs, allant au soer, se pourmener sur l'eau,

Qui croissoient à l'envy, ainsi qu'au renouveau

Croissent dans un pommier trois pommettes pareilles.

Toutes les trois estoient en beauté nompareilles,

Mais la plus jeune avoit le visage plus beau

Et sembloit une fleur voisine d'un ruysseau

Qui remire dans l'eau ses richesses vermeilles.

Ores je souhaitois la plus vieille en mes voeus,

Et ores la moienne, et ores toutes deux,

Mais tousjours la petite estoit en ma pensée,

Et priois le Soleil de n'enmener le jour:

Car ma veüe en trois ans n'eust pas esté lassée

De voir ces trois Soleilz qui m'enflamoient d'amour.

XXI

Mon ami puisse aimer une femme de ville,

Belle, courtoise, honeste, et de doux entretien:

Mon haineux puisse aimer au village une fille,

Qui soit badine, sote, et qui ne sache rien.

Tout ainsi qu'en amour le plus excellent bien

Est d'aimer une femme, et savante; et gentille,

Aussi le plus grand mal à ceuls qui aiment bien

C'est d'aimer une femme indocte, et mal-habille.

Une gentille Dame entendra de nature

Quel plaisir c'est d'aimer, l'autre n'en aura cure,

Se peignant un honneur dedans son esprit sot:

Vous l'aurez beau préscher, et dire qu'elle est belle,

Sans s'esmouvoir de rien, vous entendra pres d'elle

Parler un jour entier, et ne respondra mot.

XXII

Je crois que je mouroi' si ce n'estoit la Muse

Qui deçà et delà fidelle m'acompaigne

Sans se lasser, par chams, par bois, et par montaigne,

Et de ses beaus presens tous mes soucis abuse:

Si je suis ennuyé je n'ay point d'autre ruse

Pour me desennuyer que Clion ma compaigne;

Si tost que je l'apelle, elle ne me dedaigne,

Et de me venir voir jamais el'ne s'excuse:

Des presens des neuf Seurs soit en toute saison

Pleine toute ma chambre, et pleine ma maison,

Car la rouille jamais à leurs beaus dons ne touche.

Le tin ne fleurit pas aus abeilles si dous

Comme leurs beaus presens me sont doux à la bouche,

Desquels les bons esprits ne furent jamais saouls.

XXIII

Mignongne, levés-vous, vous estes paresseuse,

Ja la gaye alouette au ciel a fredonné,

Et ja, le rossignol frisquement jargonné,

Dessus l'espine assis, sa complainte amoureuse.

Debout donq, allon voir l'herbelette perleuse,

Et vostre beau rosier de boutons couronné,

Et voz oeillets aimés, ausquels avés donné

Hyer au soir de l'eau, d'une main si songneuse.

Hyer en vous couchant, vous me fistes promesse

D'estre plus-tost que moi ce matin eveillée,

Mais le someil vous tient encor toute sillée:

Ian, je vous punirai du peché de paresse,

Je vois baiser cent fois vostre oeil, vostre tetin,

Afin de vous aprendre à vous lever matin.

XXIV

Bayf, il semble à voir tes rymes langoreuses,

Que tu sois seul amant, en France, langoreus,

Et que tes compaignons ne sont point amoureus,

Mais font languir leurs vers desous feintes pleureuses;

Tu te trompes, Bayf; les peines doloreuses

D'amour autant que toi nous rendent doloreus,

Sans nous feindre un tourment: mais tu es plus heureus

Que nous, à raconter tes peines amoureuses.

Quant à moi, si j'estois ta Francine chantée,

Je ne serois jamais de ton vers enchantée,

Qui se faignant un dueil se fait palir lui-mesme.

Non, celui n'aime point, ou bien il aime peu,

Qui peut donner par signe à cognoistre son feu,

Et qui peut raconter le quart de ce qu'il aime.

XXV

Je ne suis variable, et si ne veus apprendre

(Desja grison) à l'estre, aussi ce n'est qu'émoi:

Je ne dy pas si Jane estoit prise de moi;

Que tost je n'oubliasse et Marie et Cassandre.

Je ne suis pas celui qui veus Paris reprendre

D'avoir manqué si tost à Pegasis de foy:

Plutost que d'accuser ce jeune enfant de Roy

D'estre en amour leger, je voudrois le defendre.

Il fist bien, il fist bien, de ravir cette Helene,

Cette Helene qui fut de beauté si tres-plene,

Que du grand Jupiter on la disoit anfant:

L'amant est bien guidé d'une heure malheureuse,

Quand il trouve son mieus, si son mieus il ne prent,

Sans languir tant es bras d'une vieille amoureuse.

XXVI

C'est grand cas que d'aimer! Si je suis une année

Avecque ma maitresse à deviser toujours,

Et à lui raconter quelles sont mes amours,

L'an me semble plus court qu'une seule journée.

S'une autre parle à moi, j'en ay l'ame gennée:

Ou je ne luy di mot, ou mes propos sont lours,

Au milieu du devis s'egarent mes discours,

Et tout ainsi que moi ma langue est estonnée.

Mais quand je suis aupres de celle qui me tient

Le coeur dedans ses yeus, sans me forcer me vient

Un propos dessus l'autre, et jamais je ne cesse

De baiser, de taster, de rire, et de parler:

Car pour estre cent ans aupres de ma maitresse

Cent ans me sont trop cours, et ne m'en puis aller.

XXVII

E, que me sert, Paschal, ceste belle verdure

Qui rit parmi les prés, et d'ouir les oiseaus,

D'ouir par le pendant des colines les eaus,

Et des vents du printems le gracieus murmure,

Quand celle qui me blesse, et de mon mal n'a cure

Est absente de moi, et pour croistre mes maus

Me cache la clarté de ses astres jumeaus,

De ses yeus, dont mon coeur prenoit sa nourriture?

J'aimeroi beaucoup mieus qu'il fust hyver tousjours,

Car l'hyver n'est si propre à nourir les amours

Comme est le renouveau, qui d'aimer me convie,

Ainçois de me hayr, puis que je n'ay pouvoir

En ce beau mois d'Avril entre mes bras d'avoir

Celle qui dans ses yeus tient ma mort et ma vie.

XXVIII

Je ne saurois aimer autre que vous,

Non, Dame, non, je ne saurois le faire:

Autre que vous ne me sauroit complaire,

Et fust Venus descendue entre nous.

Vos yeus me sont si gracieus et dous,

Que d'un seul clin ils me peuvent defaire,

D'un autre clin tout soudain me refaire,

Me faisans vivre ou mourir en deux cous.

Quand je serois cinq cens mille ans en vie,

Autre que vous, ma mignonne m'amie,

Ne me feroit amoureus devenir.

Il me faudroit refaire d'autres venes,

Les miennes sont de vostre amour si plenes,

Qu'un autre amour n'y sauroit plus tenir.

XXIX

Pour aimer trop une fiere beauté,

Je suis en peine, et si ne saurois dire

D'où ni comment, me survint ce martyre,

Ni à quel jeu je perdi liberté.

Si sçai-je bien que je suis arresté

Au lacs d'amour: et si ne m'en retire,

Ni ne voudrois, car plus mon mal empire

Et plus je veus y estre mal traicté.

Je ne di pas, s'elle vouloit un jour

Entre ses bras me garir de l'amour,

Que son present bien à gré je ne prinse.

E, Dieu du ciel, é qui ne le prendroit,

Quand seulement de son baiser un Prince,

Voire un grand Roy, bien heureus se tiendroit.

XXX

E, que je porte et de hayne et d'envie

Au medecin qui vient soir et matin

Sans nul propos tatonner le tetin,

Le sein, le ventre et les flans de m'amie.

Las! il n'est pas si songneus de sa vie

Comme elle pense: il est mechant et fin,

Cent fois le jour ne la vient voir, qu'à fin

De voir son sein qui d'aimer le convie.

Vous qui avés de sa fievre le soin,

Je vous supli de me chasser bien loin

Ce medecin, amoureus de m'amie,

Qui fait semblant de la venir penser:

Que pleust à Dieu, pour l'en recompenser,

Qu'il eust ma peine, et qu'elle fust guarie.

XXXI

Dites maitresse, é que vous ai-je fait?

E, pourquoy las! m'estes vous si cruelle?

Ai-je failly de vous estre fidelle?

Ai-je envers vous commis quelque forfait?

Dites maitresse, é que vous ai-je fait?

E, pourquoy las! m'estes vous si cruelle?

Ai-je failli de vous estre fidelle?

Ai-je envers vous commis quelque forfait?

Certes nenny: car plutost que de faire

Chose qui deust, tant soit peu, vous déplaire,

J'aimerois mieus mille mors encourir.

Mais je voi bien que vous avez envie

De me tuer: faites-moy donq mourir,

Puis qu'il vous plaît, car à vous est ma vie.

XXXII

Chacun qui voit ma couleur triste et noire

Me dit, Ronsard, vous estes amoureus.

Mais cette-là qui me fait langoreus

Le sçait, le voit, et si ne le veut croire.

E, que me sert que mon mal soit notoire

A un chacun, quand son coeur rigoreus,

Par ne sçai quel desastre malheureus,

Me fait la playe, et si la prend à gloire?

C'est un grand cas, que pour cent fois jurer,

Cent fois promettre, et cent fois asseurer

Qu'autre jamais n'aura sus moi puissance,

Qu'elle s'esbat de me voir en langueur:

Et plus de moi je lui donne asseurance,

Moins me veut croire, et m'appelle un moqueur.

XXXIII

Plus que jamais je veus aimer, maitresse,

Vôtre oeil divin, qui me detient ravy

Mon coeur chez lui, du jour que je le vi,

Tel, qu'il sembloit celui d'une déesse?

C'est ce bel oeil qui me paist de liesse,

Liesse, non, mais d'un mal dont je vi,

Mal, mais un bien, qui m'a toujours suivy,

Me nourrissant de joye et de tristesse.

Desja neuf ans evanouiz se sont

Que vos beaus yeus en me riant me font

La playe au coeur, et si ne me soucye

Quand je mourois d'un mal si gracieus:

Car rien ne peut venir de voz beaus yeus

Qui ne me soit trop plus cher que la vie.

XXXIV

Quand ma maitresse au monde print naissance,

Honneur, Vertu, Grace, Savoir, Beauté

Eurent debat avec la Chasteté

Qui plus auroit sus elle de puissance.

L'une vouloit en avoir joüyssance,

L'autre vouloit l'avoir de son costé,

Et le debat immortel eust esté

Sans Jupiter, qui leur posa silence.

Filles, dit-il, ce n'est pas la raison

Que l'une seule ait si belle maison,

Pour-ce je veus qu'apointement on face:

L'accord fut fait: et plus soudainement

Qu'il ne l'eut dit, toutes également

En son beau cors pour jamais prindrent place.

XXXV

Je vous envoye un bouquet de ma main

Que j'ai ourdy de ces fleurs epanies:

Qui ne les eust à ce vespre cuillies,

Flaques à terre elles cherroient demain.

Cela vous soit un exemple certain

Que voz beautés, bien qu'elles soient fleuries,

En peu de tems cherront toutes flétries,

Et periront, comme ces fleurs, soudain.

Le tems s'en va, le tems s'en va, ma Dame:

Las! le tems non, mais nous nous en allons,

Et tost serons estendus sous la lame:

Et des amours desquelles nous parlons,

Quand serons morts n'en sera plus nouvelle:

Pour-ce aimés moi, ce pendant qu'estes belle.

XXXVI

Gentil barbier, enfant de Podalyre,

Je te supply, seigne bien ma maitresse,

Et qu'en ce mois, en seignant, elle laisse

Le sang gelé dont elle me martyre.

Encore un peu dans la palette tire

De son sang froid, ains de sa glace épesse,

A celle fin qu'en sa place renaisse

Un sang plus chaut qui de m'aimer l'inspire.

Ha! velelà, c'estoit ce sang si noir

Que je n'ay peu de mon chaud émouvoir

En soupirant pour elle mainte année.

Ha c'est assez, cesse gentil barbier,

Ha je me pâme! et mon ame estonnée

S'evanouist en voiant son meurtrier.

XXXVII

J'aurai tousjours en une hayne extréme

Le soir, la chaire, et le lit odieus,

Où je fus pris, sans y penser, des yeus

Qui pour aimer me font hayr moi-mesme.

J'aurai tousjours le front pensif et bléme

Quand je voirray ce bocage ennuieus,

Et ce jardin de mon aise envieus,

Où j'avisay cette beauté supréme.

J'aurai toujours en haine plus que mort

Le mois de Mai, le lyerre, et le sort

Qu'elle écrivit sus une verte feille:

J'auray tousjours cette lettre en horreur,

Dont pour adieu sa main tendre et vermeille

Me feit present pour me l'empreindre au coeur.

XXXVIII

E, Dieu du ciel, je n'eusse pas pensé

Qu'un seul depart eust causé tant de pene!

Je n'ai sur moi nerf, ni tendon, ni vene,

Faie, ni coeur qui n'en soit offensé,

Helas! je suis à-demi trespassé,

Ains du tout mort, las! ma douce inhumaine

Avecques elle, en s'en allant, enmaine

Mon coeur captif de ses beaus yeus blessé.

Que pleust à Dieu ne l'avoir jamais veue!

Son oeil gentil ne m'eust la flamme esmeue,

Par qui me faut un tourment recevoir,

Tel, que ma main m'occiroit à cette heure,

Sans un penser que j'ai de la revoir,

Et ce penser garde que je ne meure.

XXXIX

Ha, petit chien, que tu serois heureus

Si ton bon heur tu sçavois bien entendre,

D'ainsi coucher au giron de Cassandre,

Et de dormir en ses bras amoureus.

Mais, las! je vy chetif et langoreus,

Pour sçavoir trop mes miseres comprendre:

Las! pour vouloir en ma jeunesse aprendre

Trop de sçavoir, je me fis malheureus.

Mon Dieu, que n'ai-je au chef l'entendement

Aussi plombé qu'un qui journelement

Béche en la vigne ou fagotte au bocage!

Je ne serois chetif comme je suis,

Le trop d'esprit ne me seroit domage,

Et ne pourrois comprendre mes ennuis.

XL

D'une belle Marie en une autre Marie,

Belleau, je suis tombé, et si dire ne puis

De laquelle des deux plus l'amour je poursuis,

Car j'en aime bien l'une, et l'autre est bien m'amie.

On dit qu'une amitié qui se depart demie

Ne dure pas long tems, et n'aporte qu'ennuis,

Mais ce n'est qu'un abus: car tant ferme je suis

Que, pour en aimer une, une autre je n'oublie.

Tousjours une amitié plus est enracinée,

Plus long tems elle dure, et plus est ostinée

A soufrir de l'amour l'orage vehement:

E, ne sçais-tu, Belleau, que deux ancres getées

Dans la mer, quand plus fort les eaus sont agitées,

Tiennent mieus une nef qu'une ancre seulement?

XLI

Quand je serois un Turc, un Arabe, ou un Scythe,

Pauvre, captif, malade, et d'honneur devestu,

Laid, vieillard, impotent, encor' ne devrois tu

Estre, comme tu es, envers moi si dépite:

Je suis bien asseuré que mon coeur ne merite

D'aimer en si bon lieu, mais ta seule vertu

Me force de ce faire, et plus je suis batu

De ta fiere rigueur, plus ta beauté m'incite.

Si tu penses trouver un serviteur qui soit

Digne de ta beauté, ton penser te deçoit,

Car un Dieu (tant s'en faut un homme) n'en est digne.

Si tu veus donq aimer, il faut baisser ton coeur:

Ne sçais-tu que Venus (bien qu'elle fust divine)

Jadis pour son ami choisit bien un pasteur?

XLII

Dame, je ne vous puis ofrir à mon depart

Sinon mon pauvre coeur, prenés-le je vous prie:

Si vous ne le prenés, jamais une autre amie

(J'en jure par voz yeus) jamais n'y aura part.

Je le sen déjà bien, comme joyeus il part

Hors de mon estomac, peu songneus de ma vie,

Pour s'en aller chés vous, et rien ne le convie

D'y aller (ce dit-il) que vôtre dous regard.

Or si vous le chassés, je ne veus plus qu'il vienne

Vers moi, pour y r'avoir sa demeure ancienne,

Hayssant à la mort ce qui vous deplaira:

Il m'aura beau conter sa peine et son malaise,

Comme il fut paravant plus mien il ne sera,

Car je ne veus rien voir chés moi, qui vous deplaise.

XLIII

Rossignol mon mignon, qui dans cette saulaye

Vas seul de branche en branche à ton gré voletant,

Degoisant à l'envy de moi, qui vois chantant

Celle qui faut tousjours que dans la bouche j'aie,

Nous soupirons tous deux, ta douce vois s'essaie

De flechir celle-là, qui te va tourmentant,

Et moi, je suis aussi cette-là regrettant,

Qui m'a fait dans le coeur une si aigre plaie.

Toutesfois, Rossignol, nous differons d'un point.

C'est que tu es aimé, et je ne le suis point,

Bien que tous deux aions les musiques pareilles,

Car tu flechis t'amie au dous bruit de tes sons,

Mais la mienne, qui prent à dépit mes chansons,

Pour ne les escouter se bouche les oreilles.

XLIV

Si vous pensés que Mai, et sa belle verdure

De vôtre fievre quarte effacent la langueur,

Vous vous trompés beaucoup, il faut premier mon coeur

Garir du mal qu'il sent, et si n'en avés cure.

Il faut donque premier me garir la pointure

Que voz yeus dans mon coeur me font par leur rigueur,

Et tout soudain apres vous reprendrés vigueur,

Quand vous l'aurés gary du tourment qu'il endure.

Le mal que vous avés ne vient d'autre raison,

Sinon de moi, qui fis aus Dieus une oraison

Pour me venger de vous, de vous faire malade.

E, vraiment c'est bien dit; é, vous voulez garir,

Et si ne voulez pas vôtre amant secourir,

Que vous gaririez bien seulement d'une oeillade.

XLV

J'ay cent fois desiré et cent encores d'estre

Un invisible esprit, afin de me cacher

Au fond de vôtre coeur, pour l'humeur rechercher

Qui vous fait contre moi si cruelle aparoistre.

Si, j'estois dedans vous, aumoins je serois maistre,

Maugré vous, de l'humeur qui ne fait qu'empescher

Amour, et si n'auriez nerf, ne poux sous la chair

Que je ne recherchasse afin de vous cognoistre.

Je sçaurois une à une et voz complexions,

Toutes voz voluntés, et voz conditions,

Et chasserois si bien la froideur de vos venes,

Que les flammes d'Amour vous y allumeriez:

Puis quand je les voirrois de son feu toutes plenes,

Je redeviendrois homme, et lors vous m'aimeriez.

XLVI

Pour-ce que tu sçais bien que je t'aime trop mieus,

Trop mieus dix mille fois que je ne fais ma vie,

Que je ne fais mon coeur, ma bouche, ni mes yeus,

Plus que le nom de mort tu fuis le nom d'amie.

Si je faisois semblant de n'avoir point envie

D'estre ton serviteur, tu m'aimerois trop mieus,

Trop mieus dix mille fois que tu ne fais ta vie,

Que tu ne fais ton coeur, ta bouche, ni tes yeus.

C'est d'amour la coustume, alors que plus on aime

D'estre tousjours hay: je le sçai par moi-mesme

Qui suis hay de toi, seulement quand tu m'ois

Jurer que je suis tien: helas! que doi-je faire?

Tout ainsi qu'on garist un mal par son contraire,

Si je te haïssois, soudain tu m'aimerois.

XLVII

Quand je vous dis adieu, Dame, mon seul apuy,

Je laissé dans voz yeus mon coeur pour sa demeure

En gaige de ma foi: et si ay, depuis l'heure

Que je le vous laissay, tousjours vescu d'ennuy

Mais pour Dieu je vous pri, me le rendre aujourd'huy

Que je suis retourné, de peur que je ne meure:

Car je mourois sans coeur, ou, que vôtre oeil m'asseure

Que vous me donnerez le vôtre en lieu de lui.

Las! donez-le moi donq, et de l'oeil faittes signe

Que vôtre coeur est mien, et que vous n'avés rien

Qui ne soit fort joieus, vous laissant, de me suivre:

Ou bien si vous voyés que je ne sois pas digne

D'avoir chés moi le vôtre, aumoins rendés le mien,

Car sans avoir un coeur je ne saurois plus vivre.

XLVIII

Tu as beau, Jupiter, l'air de flammes dissouldre,

Et faire galloper tes haux-tonnans chevaus,

Ronflans deçà delà dans le creux des nuaus,

Et en cent mille esclats tout d'un coup les descoudre,

Ce n'est pas moi qui crains tes esclairs, ni ta foudre

Comme les coeurs poureus des autres animaus:

Il y a trop lon tems que les foudres jumeaus

Des yeus de ma maitresse ont mis le mien en poudre.

Je n'ai plus ni tendons, ni arteres, ni nerfs,

Venes, muscles, ni poux: les feux que j'ai soufferts

Au coeur pour trop aimer me les ont mis en cendre.

Et je ne suis plus rien (ô estrange meschef)

Qu'un Terme qui ne peut voir, n'oüyr, ni entendre,

Tant la foudre d'amour est cheute sus mon chef.

XLIX

Donques pour trop aimer il fault que je trépasse,

La mort, de mon amour sera donq le loyer:

L'homme est bien malheureus qui se veut emploier

Par travail meriter d'une ingrate la grace:

Mais je te pri, di moi, que veus tu que je face?

Quelle preuve veus-tu afin de te ployer

A pitié, las! veus-tu que je m'aille noyer,

Ou que de ma main propre à mort je me deface?

Es tu quelque Busire, ou Cacus inhumain,

Pour te souler ainsi du pauvre sang humain?

E, di, ne crains-tu point Nemesis la Déesse,

Qui redemandera mon sang versé à tort?

E, di, ne crains-tu point la troupe vengeresse

Des Soeurs, qui puniront ton crime apres la mort?

L

Veus-tu sçavoir, Brués, en quel estat je suis?

Je te le conterai: d'un pauvre miserable

Il n'i a nul estat, tant soit il pitoiable

Que je n'aille passant d'un seul de mes ennuis.

Je tien tout, je n'ay rien, je veus, et si ne puis,

Je revy, je remeurs, ma plaie est incurable.

Qui veut servir Amour, ce tyran execrable,

Pour toute recompense il reçoit de tels fruis.

Pleurs, larmes, et souspirs acompagnent ma vie,

Langueur, douleur, regrets, soupçon, et jalousie,

Avecques un penser qui ne me laisse avoir

Un moment de repos: et plus je ne sens vivre

L'esperance en mon coeur, mais le seul desespoir

Qui me guide à la mort, et je le veus bien suivre.

LI

Ne me di plus, Imbert, que je chante d'Amour,

Ce traistre, ce mechant; comment pouroi-je faire

Que mon esprit voulust loüer son adversaire,

Qui ne donne à sa peine un moment de sejour!

Si m'avoit fait aumoins quelque petit bon tour,

Je l'en remercirois, mais il ne veut se plaire

Qu'à rengreger mon mal, et pour mieus me défaire

Me met devant les yeux ma Dame nuit et jour.

Bien que Tantale soit miserable là-bas,

Je le passe en malheur; car si ne mange pas

Le fruit qui pend sur lui, toutesfois il le touche,

Et le baise, et s'en joue: et moi, bien que je sois

Aupres de mon plaisir, seulement de la bouche

Ni des mains, tant soit peu, toucher ne l'oserois.

LII

Quiconque voudra suivre Amour ainsi que moi,

Celui se delibere en penible tristesse

Mourir ainsi que moi: il pleust à la Déesse

Qui tient Cypre en ses mains de faire telle loi.

Apres mainte misere et maint fascheus émoi

Il lui faudra mourir, et sa fiere maitresse,

Le voiant au tombeau, sautera de liesse

Sus le corps de l'amant, mort pour garder sa foy.

Allez-donq maintenant faire service aus Dames,

Offrez-leur pour present et voz corps et voz ames,

Vous en receverés un salaire bien dous.

Je croi que Dieu les feit afin de nuire à l'homme:

"Il les feit, Pardaillan, pour nostre malheur, comme

Les tygres, les lyons, les serpens, et les lous.

LIII

J'avois cent fois juré de jamais ne revoir

(O serment d'amoureus) l'angelique visage

Qui depuis quinze mois en penible servage

Emprisonne mon coeur, et ne le puis ravoir.

J'en avois fait serment: mais je n'ai le pouvoir

M'engarder d'y aller, car mon forcé courage,

Bien que soit maugré moi surmonté de l'usage

D'amour, tousjours m'y mene, abusé d'un espoir.

Le destin, Pardaillan, est une forte chose!

L'homme dedans son coeur ses affaires dispose

Et le ciel fait tourner ses dessains au rebours.

Je sçai bien que je fais ce que je ne doy faire,

Je sçay bien que je sui de trop folles amours:

Mais quoy, puis que le ciel delibere au contraire.

LIV

Ne me sui point, Belleau, allant à la maison

De celle qui me tient en douleur nompareille:

E ne sçais-tu pas bien ce que dit la corneille

A Mopse, qui suivoit la trace de Jason?

Profete, dit l'oiseau, tu n'as point de raison

De suivre cet amant qui de voir s'apareille

Sa Dame: en autre part va, suy le et le conseille,

Mais ore de le suivre il n'est pas la saison.

Pour ton profit, Belleau, je ne vueil que tu voye'

Celle qui par les yeus la plaie au coeur m'envoye,

De peur que tu ne prenne' un mal au mien pareil.

Il suffist que sans toi je sois seul miserable:

Reste sain, je te pri, pour estre secourable

A ma douleur extréme, et m'y donner conseil.

LV

Si j'avois un hayneus qui me voulust la mort

Pour me venger de luy je ne voudrois lui faire

Que regarder les yeus de ma douce contraire,

Qui si fiers contre moi me font si dur effort.

Ceste punition, tant son regard est fort,

Luy seroit peine extréme, et se voudroit deffaire:

Ne lit, ne pain, ne vin ne luy sauroient complaire,

Et sans plus au trespas seroit son reconfort.

Tout cela que lon dit d'une Meduse antique

Au prix d'elle n'est rien que fable poëtique:

Meduse seulement tournoit l'homme en rocher,

Mais cette-cy en-roche, englace, en-eaue, en-foue

Ceus qui ozent sans peur de ses yeus approcher:

Et si en les tuant vous diriez qu'el' se joue.

LVI

Amour se vint cacher dans les yeus de Cassandre,

Comme un tan, qui les boeufs fait mouscher par les bois,

Puis il choisit un trait sur tous ceus du carquois,

Qui piquant sçait le mieus dedans les coeur descendre.

Il élongna ses mains, et feit son arc estendre

En croissant, qui se courbe aus premiers jours du mois,

Puis me lascha le trait, contre qui le harnois

D'Achille, ni d'Hector ne se pourroit defendre.

Apres qu'il m'eut blessé, en riant s'en volla,

Et par l'air mon esprit avec lui s'en alla:

Mais toutefois au coeur me demoura la playe,

Laquelle pour neant cent fois le jour j'essaye

De la vouloir garir, mais tel est son efort

Que je voy bien qu'il faut que maugré moi je l'aye,

Et que pour la garir le remede est la mort.

LVII

Dame, je meurs pour vous, je meurs pour vous, ma dame,

Dame, je meurs pour vous, et si ne vous en chaut:

Je sens pour vous au coeur un brasier si treschaut,

Que pour ne le sentir je veus bien rendre l'ame.

Ce vous sera pour-tant un scandaleus diffame,

Si vous me meurdrissés sans vous faire un defaut:

E, que voulés vous dire? Esse ainsi comme il faut

Par pitié refroidir de vôtre amant la flamme?

Non, vous ne me povés reprocher que je sois

Un effronté menteur, car mon teint, et ma voix,

Et mon chef ja grison vous servent d'asseurance,

Et mes yeus trop cavés, et mon coeur plein d'esmoi:

E, que feroi-je plus, puis que nulle creance

Il ne vous plait donner aus tesmoins de ma foy?

LVIII

Il ne sera jamais, soit que je vive en terre,

Soit qu'aus enfers je sois, ou là-haut dans les cieus,

Il ne sera jamais que je n'aime trop mieus

Que myrthe ou que laurier la feuille de lierre.

Sus elle cette main qui tout le coeur me serre

Trassa premierement de ses doigts gracieus

Les lettres de l'amour que me portoient ses yeus,

Et son coeur qui me fait une si douce guerre.

Jamais si belle fueille à la rive Cumée

Ne fut par la Sibylle en lettres imprimée

Pour bailler par écrit aus hommes leur destin,

Comme ma Dame a paint d'une espingle poignante

Mon sort sus le lierre: é Dieu, qu'amour est fin!

Est-il rien qu'en aimant une Dame n'invente.

LIX

J'aurai toujours au coeur attachés les rameaus

Du lierre, où ma Dame oza premier écrire

(Douce ruze d'amour) l'amour qu'el'n'osoit dire,

L'amour d'elle et de moy, la cause de noz maus:

Sus toi jamais, sus toi orfrayes ny corbeaus

Ne se viennent brancher, jamais ne puisse nuire

Le fer à tes rameaus, et à toi soit l'empire

Pour jamais, dans les bois, de tous les arbrisseaus.

Non pour autre raison (ce croi-je) que la mienne,

Bacchus orna de toi sa perruque Indienne,

Que pour recompenser le bien que tu lui fis,

Quand sus les bords de Die Ariadne laissée

Luy feit sçavoir par toi ses amoureus ennuys,

Ecrivant dessus toi s'amour et sa pensée.

LX

Je mourois de plaisir voyant par ces bocages

Les arbres enlassés de lierres épars,

Et la lambruche errante en mille et mille pars

Es aubepins fleuris prés des roses sauvages.

Je mourois de plaisir oyant les dous langages

Des hupes, et coqus, et des ramiers rouhars

Sur le haut d'un fouteau bec en bec fretillars,

Et des tourtres aussi voyant les mariages.

Je mourois de plaisir voyant en ces beaus mois

Sortir de bon matin les chevreuilz hors des bois,

Et de voir fretiller dans le ciel l'alouëtte.

Je mourois de plaisir, où je meurs de soucy,

Ne voyant point les yeus d'une que je souhette

Seule, une heure en mes bras en ce bocage icy.

LXI

A pas mornes et lents seulet je me promene,

Non-challant de moi-mesme: et quelque part que j'aille

Un importun penser me livre la bataille,

Et ma fiere ennemie au devant me ramene:

Penser, un peu de treve, et permets que ma pene

Se soulage un petit, et tousjours ne me baille

Argument de pleurer pour une qui travaille

Sans relasche mon coeur, tant elle est inhumaine.

Ou si tu ne le fais, je te tromperay bien:

Je t'assure ma foy que tu perdras ta place

Bien-tost, car je mouray pour ruïner ton fort.

Puis, quand je seray mort, plus ne sentiray rien

(Tu m'auras beau pincer) que ta rigueur me face,

Ma dame, ni amour: car rien ne sent un mort.

LXII

Pourtant si ta maitresse est un petit putain,

Tu ne dois pour cela te courrousser contre elle

Voudrois-tu bien hayr ton ami plus fidelle

Pour estre un peu jureur, ou trop haut à la main?

Il ne faut prendre ainsi tous pechés à dedain,

Quand la faute en pechant n'est pas continuelle:

Puis il faut endurer d'une maitresse belle

Qui confesse sa faute, et s'en repent soudain.

Tu me diras qu'honneste et gentille est t'amie,

Et je te respondrai qu'honneste fut Cynthie,

L'amie de Properce en vers ingenieus,

Et si ne laissa pas de faire amour diverse.

Endure donc, Ami, car tu ne vaus pas mieus

Que Catulle valut, que Tibulle et Properce.

LXIII

Amour, voiant du ciel un pescheur sur la mer,

Calla son aisle bas sur le bord du navire,

Puis il dit au pescheur: je te pri que je tire

Ton ret, qu'au fond de l'eau le plomb fait abymer.

Un daulphin, qui savoit le feu qui vient d'aimer,

Voiant Amour sur l'eau, à Tethis le va dire:

Tethys, si quelque soing vous tient de vôtre empire,

Secourés-le, ou bien tost il est prest d'enflammer.

Tethys laissa de peur sa caverne profonde,

Haussa le chef sur l'eau, et vit Amour sur l'onde

Qui peschoit à l'escart: las, dit el', mon nepveu,

Oustés-vous, ne bruslés mes ondes, je vous prie:

N'aiés peur, dit Amour, car je n'ay plus de feu,

Tout le feu que j'avois est aus yeus de Marie.

LXIV

Calliste mon amy, je croi que je me meurs,

Je sens de trop aimer la fievre continue,

Qui de chaud, qui de froid jamais ne diminue,

Ainçois de pis en pis rengrege mes douleurs:

Plus je vueil refroidir mes bouillantes chaleurs,

Plus Amour les ralume: et plus je m'esvertue

De rechaufer mon froid, plus la froideur me tue,

Pour languir au meilleu de deux divers malheurs.

Un ardent apetit de joüir de l'aimée

Tient tellement mon ame en pensers alumée,

Et ces pensers douteus me font réver si fort,

Que diette, ne just, ni section de vene

Ne me sauroient garir, car de la seule mort

Depend, et non d'ailleurs, le secours de ma pene.

LXV

Je veus lire en trois jours l'Iliade d'Homere,

Et pour-ce; Corydon, ferme bien l'huis sur moi:

Si rien me vient troubler, je t'asseure ma foi,

Tu sentiras combien pesante est ma colere.

Je ne veus seulement que nôtre chambriere

Vienne faire mon lit, ou m'apreste de quoi

Je menge, car je veus demeurer à requoi

Trois jours, pour faire apres un an de bonne chere.

Mais si quelcun venoit de la part de Cassandre,

Ouvre lui tost la porte, et ne le fais attendre:

Soudain entre en ma chambre, et me vien acoustrer,

Je veus tanseulement à lui seul me monstrer:

Au reste, si un Dieu vouloit pour moi descendre

Du ciel, ferme la porte, et ne le laisse entrer.

LXVI

J'ai l'ame pour un lit de regrets si touchée,

Que nul, et fusse un Roy, ne fera que j'aprouche

Jamais de la maison, encor moins de la couche

Où je vy ma maitresse, au mois de May couchée.

Un somme languissant la tenoit mi-panchée.

Dessus le coude droit, fermant sa belle bouche,

Et ses yeus, dans lesquels l'archer Amour se couche,

Ayant tousjours la fleche en la corde encochée.

Sa teste en ce beau mois, sans plus, estoit couverte

D'un riche escofion ouvré de soie verte,

Où les Graces venoient à l'envy se nicher,

Et dedans ses cheveus choysissoient leur demeure.

J'en ai tel souvenir que je voudrois qu'à l'heure

(Pour jamais n'y penser) son oeil m'eust fait rocher.

LXVII

Douce, belle, gentille, et bien fleurente Rose,

Que tu es à bon droit à Venus consacrée,

Ta delicate odeur hommes et Dieus recrée,

Et bref, Rose, tu es belle sur toute chose.

La Grace pour son chef un chapellet compose

De ta feuille, et tousjours sa gorge en est parée,

Et mille fois le jour la gaye Cytherée

De ton eau, pour son fard, sa belle joue arrose.

Hé Dieu, que je suis aise alors que je te voi

Esclorre au point du jour sur l'espine à requoy,

Dedans quelque jardin pres d'un bois solitere!

De toi les Nymphes ont les coudes et le sein:

De toi l'Aurore emprunte et sa joue, et sa main,

Et son teint celle-là qui d'Amour est la mere.

LXVIII

R. Que dis-tu, que fais-tu, pensive tourterelle

Desus cest arbre sec? T. Helas je me lamente.

R. Et pourquoi, di-le moi? T. De ma compagne absente,

Plus chere que ma vie. R. En quelle part est-elle?

T. Un cruel oyselleur par glueuse cautelle

L'a prise, et l'a tuée: et nuit et jour je chante

Son trespas dans ces bois, nommant la mort méchante

Qu'elle ne m'a tuée aveques ma fidelle.

R. Voudrois-tu bien mourir aveques ta compaigne?

T. Oui, car aussi bien je languis de douleur,

Et toujours le regret de sa mort m'acompaigne.

R. O gentils oysellets, que vous estes heureus

D'aimer si constamment, qu'heureus est vôtre coeur,

Qui, sans point varier, est tousjours amoureus!

LXIX

Le sang fut bien maudit de ceste horrible face

Qui premier engendra les serpens venimeus:

Helene, tu devois quand tu marchas sus eus,

Non sans plus les arner, mais en perdre la race.

Nous estions l'autre jour dans une verte place,

Cuillants, m'amie, et moi, les fraiziers savoureux,

Un pot de cresme estoit au meillieu de nous deux,

Et sur le jonc du laict treluisant comme glace.

Quand un villain serpent, de venin tout couvert,

Par ne sçai quel malheur sortit d'un buisson vert

Contre le pied de celle à qui je fais service,

Pour la blesser à mort de son venin infect;

Et lors je m'écriay, pensant qu'il nous eut faict

Moi, un second Orphée, et elle, une Eurydice.

LXX

Marie, tout ainsi que vous m'avés tourné

Mon sens, et ma raison, par vôtre voix subtile,

Ainsi m'avés tourné mon grave premier stile,

Qui pour chanter si bas n'estoit point destiné:

Aumoins si vous m'aviés, pour ma perte, donné

Congé de manier vôtre cuisse gentile,

Ou si à mes baisers vous n'estiés dificile,

Je n'eusse regretté mon stile abandonné.

Las, ce qui plus me deut, c'est que vous n'êtes pas

Contente de me voir ainsi parler si bas,

Qui soulois m'élever d'une muse hautaine:

Mais, me rendant à vous, vous me manquez de foy,

Et si me traités mal, et sans m'outer de peine

Tousjours vous me liés, et triomphés de moi.

I

Au beuf qui tout le jour a trainé la charue

On oste au soir le joug quand la nuict est venue,

Et mis dedans l'estable est pensé doucement,

Soulageant son travail par un bon traitement.

Quand le cheval guerrier, courant aux bordz de Pise

Des jeux Olympiens a la gloire conquise,

Et que son corps poudreux des joustes de cinq ans

Il a bien nettoyé dans les flotz Alpheans,

Plus son ventre vieillard son maistre n'esperonne,

Mais luy oste le frain, et liberté luy donne.

Quand un soldat a fait es guerres son effort

Pour gaigner la bataille, ou pour fausser un fort,

Et qu'il a tout le corps marqué de belles playes,

Il vit franc des combatz, au rang des mortes-payes,

Et à quelque crochet, ou debout contre un bois

Pour l'y laisser rouiller atache son harnois.

Mais toy, mechant Amour, tousjours tu renouvelles

Tes playes contre moy, et tes fiertez cruelles:

Et bien que ja trente ans poisent dessus mon chef,

Pourtant tu n'as pitié de mon triste mechef:

Mais comme un fier tyran, inexorable et rude,

Tu ne m'ostes du col le joug de servitude,

Foulant du pied ma teste, et brulant sans repos

D'un feu continuel mes venes et mes os.

Pour n'estre desormais une nouvelle fable

Au peuple, il seroit temps (s'il te fust agreable)

De me donner congé, et mettre en liberté

Mon col, qui si long temps au joug fut arresté,

Afranchi du travail et des peines gaignées

Suyvant tes estendartz par dix ou douze années

Sans recevoir un bien: car jamais dessoubz toy

Amant ne guerroya si malheureux que moy,

Ni si desesperé. Et quoy filz de Deesse!

Je ne suis plus dispos, ne bouillant de jeunesse

Pour faire une courvée: il te fault atizer

Ceux à qui le menton ne se fait que friser,

Afin que tes beaux traits leur servent d'exercice:

Ceux de cet age là sont bons à ton service,

Ils sont fortz et dispos, et n'ont encore senty

Le mal dont tant de foys je me suis repenty,

Mais quoy? c'est un tribut qu'il fault que chacun paye:

Non que je sois lassé d'avoir au cueur la plaie

Que ton beau trait me feit, plustost mile trespas

Me puissent avenir que jamais j'en sois las:

Car je te serviray soit en barbe meslée,

Ou soit que tout mon chef blanchisse de gelée.

Je ne suis ny tout seul, ny certes le premier

A qui tu fais du mal: ton trait est coustumier

De navrer les plus grands, et ceux dont la nature

Des plus nobles vertus gentillement a cure.

Tous les Dieux ont aymé, et les hommes aussi,

Et bref il n'y a rien exempt de ton soucy.

Si quelque homme mortel m'avoit fait cet outrage,

J'armerois contre luy l'ire de mon courage,

Et m'en voudrois venger: mais puis que c'est un Dieu

Je ne me puis deffendre, il luy fault donner lieu:

"Car on tient pour certain qu'une humaine poitrine

Ne scauroit resister à la force divine.

De cela sont tesmoings les Geans odieux

Qui en vain feirent teste à la force des Dieux.

Or' fay moy doncque, Dieu, tout ce que voudras faire,

Rien qui vienne de toy ne me scauroit desplaire,

Je suis ton seviteur, je ne veux d'autre Roy,

Sans barbe je fuz tien, barbu je suis à toy:

Tien je seray tousjours, et deussay-je en tristesse

User ma pauvre vie avecques ma maitresse.

II

Elégie

Quand j'estois libre, ains que l'amour cruelle

Ne fust éprise encore en ma moüelle

Je vivois bien heureux:

De toutes partz cent mille jeunes filles

Se travailloient par leurs flames gentilles

De me rendre amoureux:

Mais tout ainsi qu'un beau poulain farouche,

Qui n'a masché le frein dedans sa bouche

Va seulet escarté,

N'ayant soucy, sinon d'un pied superbe

A mille bons fouler les fleurs et l'herbe

Vivant en liberté:

Ores il court le long d'un beau rivage,

Ores il erre au fond d'un boys sauvage,

Ou sur quelque mont hault:

De toutes partz les poutres hanissantes

Luy font l'amour, pour neant blandissantes,

A luy qui ne s'en chault.

Ainsi j'allois, dedaignant les pucelles,

Qu'on estimoit en beaulté les plus belles,

Sans respondre à leur vueil:

Lors je vivois amoureux de moymesme,

Content et gay, sans porter couleur blesme,

Ni les larmes à l'oeil.

J'avois escrite au plus hault de la face

Avec la honte une agreable audace

Pleine d'un franc desir:

Avec le pied marchoit ma fantasie

Deça, delà, sans peur ne jalousie

Vivant de mon plaisir.

Mais aussi tost que par mauvais desastre

Je vey ton sein blanchissant comme albastre,

Et tes yeux, deux soleilz,

Tes beaux cheveux espanchez par ondées,

Et les beaux lys de tes levres bordées

De cent oeilletz vermeilz:

Incontinent j'appris que c'est service:

La liberté (de ma vie nourrice)

Füit ton oeil felon,

Comme la nue, en temps serein poussée

Fuit à grandz pas l'aleine courroucée

De l'Oursal Aquilon.

Et lors tu mis mes deux mains à la chesne,

Mon col au cep, et mon coeur à la gesne,

N'ayant de moy pitié,

Non plus (helas) qu'un oultrageux corsere

(O fier destin) a pitié d'un forcere

A la chesne lié.

Tu mis apres en signe de conqueste

Maistralement tes deux piedz sur ma teste,

Et du front m'a osté

La jeune honte, et l'audace premiere,

Acouhardant mon ame prisonniere

Serve à ta volonté:

Vengeant d'un coup mille faultes commises,

Et les beaultez qu'à grand tort j'avois mises

Paravant à mespris,

Qui me prioyent, en lieu que je te prie:

Mais d'autant plus que mercy je te crie

Tu es sourde à mes cris,

Et ne responz non plus que la fonteine

Qui de Narcis mira la forme vaine,

Vengeant dessus son bord

Mille beaultez des Nymphes amoureuses,

Que cet enfant par mines dedaigneuses

Avoit mises à mort.

III

Chanson

Petite pucelle Angevine,

Qui m'as par un traitre souris

Tiré le cueur de la poictrine,

Puis, des l'heure que tu le pris,

Contre droict et contre raison,

Tu l'enfermas dans ta prison.

Où de toy (sa rude joliere)

Il reçoit un tel traictement,

Qu'une tigresse la plus fière

Auroit pitié de son torment,

Et amoliroit sa rigueur,

Aux miseres de sa langueur.

Mais toy, plus fiere et plus cruelle

Qu'un roc pendu dessus la mer,

Tu deviens tous les jours plus belle

Du dueil qui le faict consommer,

Tirant ta beaulté de le veoir

Mourir soubz toy de desespoir.

Et non sans plus, maitresse rude,

Tu fais mon cueur languir à tort,

Par une honneste ingratitude

Me donnant une lente mort,

Voyant pasmer en triste esmoy

Dans ta prison mon cueur et moy

Mais en lieu d'un sacré Poëte,

De moy, qui chantois ton honneur,

Tu as nouvelle amitié faicte

Avec je ne scay quel Seigneur,

Qui maintenant tout seul te tient,

Et plus de moy ne te souvient.

Ha, fille trop sotte et trop nice,

Tu ne scais encore que c'est

De faire aus grandz seigneurs service,

Qui en amour n'ont point d'arrest,

Et qui suyvent sans loyaultez

En un jour dix mile beautez.

Si tost qu'ilz en ont une prise,

Ils la delaissent tout expres,

Afin qu'une autre soit conquise

Pour la laisser encore apres,

Et n'ont jamais aultre plaisir

Que de changer et de choisir.

Celuy qui ores est ton maistre,

Et qui te tient comme veinqueur,

Te laissera demain, peult estre,

Et je le vouldrois de bon coeur!

Si le ciel de nous a soucy

Puisse arriver demain ainsi.

Le ciel qui les vices contemple

Punist les traitres amoureux:

Anaxarete en sert d'exemple,

Qui devint rocher malheureux,

Perdant sa vie, pour avoir

Osé son amy decevoir.

IV

Chanson

Amour, dy moy de grace (ainsi des bas humains,

Et des dieux soit tousjours l'empire entre tes mains)

Qui te fournist de fleches,

Veu que tousjours armé en mile et mile lieux,

Tu perdz tes traitz es cueurs des hommes et des dieux

Empennez de flammeches?

Mais je te pri' dy moy, est-ce point le dieu Mars,

Quand il revient chargé des armes des soudars

Occis à la bataille?

Ou bien si c'est Vulcan qui dedans ses fourneaux

(Après les tiens perduz) t'en refaict de nouveaux,

Et en don te les baille?

Pauvret (respond Amour), et quoy ignores-tu,

(O jentil serviteur!) la puissante vertu

Des beaux yeux de t'amye?

Plus je respens mes traitz sur hommes et sur Dieux,

Et plus en un moment m'en fournissent les yeux

De ta belle Marie.

V

Chanson

Mais voyez, mon cher esmoy,

Voyez combien de merveilles

Vous parfaites dedans moy

Par voz beautez nompareilles.

De telle façon voz yeux,

Vostre ris et vostre grace,

Vostre front, et voz cheveux

Et vostre angelique face,

Me brulent depuis le jour

Que j'en eu la connoissance,

Desirant par grande amour

En avoir la jouissance.

Que si ce n'estoient les pleurs

Dont ma vie est arrosée,

Long temps a que les chaleurs

D'Amour l'eussent embrasée.

Au contraire, voz beaux yeux,

Vostre ris, et vostre grace,

Vostre front, et voz cheveux,

Et vostre angelique face

Me gelent depuis le jour

Que j'en eu la connoissance,

Desirant par grande amour

En avoir la joüissance.

Que, si ne fust les chaleurs

Dont mon âme est embrasée,

Long temps a que par mes pleurs

En eau se fut épuisée.

Voyez donc, mon cher esmoy,

Voyez combien de merveilles

Vous parfaites dedans moy

Par voz beaultez nompareilles.

VI

Chanson

Pourquoy tournez vous voz yeux

Gratieux

De moy quand voulez m'occire?

Comme si n'aviez pouvoir

Par me voir,

D'un seul regard me destruire.

Las! vous le faites afin

Que ma fin

Ne me semblast bien heureuse,

Si j'allois en perissant

Joüissant

De vostre oeillade amoureuse.

Mais quoy? vous abusez fort:

Ceste mort,

Qui vous semble tant cruelle

Me semble un gaing de bon heur

Pour l'honneur

De vous, qui estes si belle.

VII

Chanson

Bon jour mon cueur, bon jour ma doulce vie.

Bon jour mon oeil, bon jour ma chere amye,

Hé bon jour ma toute belle,

Ma mignardise, bon jour,

Mes delices, mon amour,

Mon dous printemps, ma doulce fleur nouvelle

Mon doulx plaisir, ma douce columbelle,

Mon passereau, ma gente tourterelle,

Bon jour, ma doulce rebelle.

Hé fauldra-t-il que quelcun me reproche

Que j'ay vers toy le cueur plus dur que roche

De t'avoir laissé, maitresse,

Pour aller suivre le Roy,

Mandiant je ne sçay quoy

Que le vulgaire appelle une largesse?

Plustost perisse honneur, court, et richesse,

Que pour les biens jamais je te relaisse,

Ma doulce et belle deesse.

VIII

Chanson

Belle et jeune fleur de quinze ans

Qui sens encore ton enfance,

Mais bien qui celes au dedans

Un cueur remply de desçevance,

Cachant soubz ombre d'amitié

Une jeunette mauvaitié,

Ren moy (si tu as quelque honte)

Mon cueur, que tu m'as emmené,

Dont tu ne fais non plus de conte

Que d'un prisonnier enchesné,

Ou d'un valet, ou d'un forcere

Qui est esclave d'un corsere.

Une autre moins belle que toy,

Mais d'une nature plus bonne,

Le veult par force avoir de moy,

Me priant que je le luy donne:

Elle l'aura puis qu'autrement

Il n'a de toy bon traitement.

Mais non: j'ayme trop mieux qu'il meure

Que de l'oster hors de tes mains,

J'ayme trop mieux qu'il y demeure

Soufrant mille maux inhumains,

Qu'en te changeant jouyr de celle

Qui doucement à soy l'appelle.

IX

Chanson

Le printemps n'a point tant de fleurs,

L'autonne tant de raisins meurs,

L'esté tant de chaleurs halées,

L'yver n'a point tant de gelées

Ni la mer n'a tant de poissons,

Ni la Secile de moissons,

Ni l'Afrique n'a tant d'arenes,

Ni le mont d'Ide de fonteines,

Ni la nuict tant de clairs flambeaux,

Ni les forestz tant de rameaux,

Que je porte au cueur, ma maitresse,

Pour vous de peine et de tristesse.

X

Chanson

Demandes tu, douce ennemye,

Quelle est pour toy ma pauvre vie?

Helas certainement elle est

Telle qu'ordonner te la plest:

Pauvre, chetive, langoureuse,

Dolente, triste, malheureuse,

Et si Amour a quelque esmoy

Plus facheux, il loge chez moy.

Apres demandes tu, m'amie,

Quelle compagnie a ma vie?

Certes acompagnée elle est

De telz compagnons qu'il te plest:

Ennuy, travail, peine et tristesse,

Larmes, souspirs, sanglotz, detresse:

Et s'Amour a quelque soucy

Plus facheux, il est mien aussi.

Voila comment pour toy, m'amye,

Je traine ma chetive vie,

Heureux du mal que je reçoy

Pour t'aymer cent fois plus que moy.

XI

Chanson

Veu que tu es plus blanche que le lyz,

Qui t'a rougi ta levre vermeillette

D'un si beau teint? qui est ce qui t'a mis

Sur ton beau sein ceste couleur rougette?

Qui t'a noircy les arcz de tes sourcis?

Qui t'a bruny tes beaux yeux, ma maitresse!

O grand beaulté remplie de soucis,

O grand beaulté pleine de grand liesse?

O douce, belle, honeste cruauté,

Qui doucement me contrains de te suivre:

O fiere, ingrate, et facheuse beauté,

Avecque toy je veulx mourir et vivre.

XII

O toy qui n'es de rien en ton cueur amoureuse

Que d'honneur et vertu qui te font estimer,

Quoy? en glace et en feu voiras tu consommer

Tousjours mon pauvre cueur sans luy estre piteuse?

Bien que tu sois vers moy ingrate, et dedaigneuse,

Fiere, dure, rebelle, et nonchallant'd'aymer,

Encor je ne me puis engarder de nommer

La terre où tu naquis sur toute bien heureuse.

Je ne te puis häyr, quoi que tu me sois fiere,

Mais bien je hay celluy qui me mena de nuyct

Prendre de tes beaux yeulx l'acointance premiere:

Celluy seul tout expres à la mort m'a conduit,

Celluy seul me tua! hé mon Dieu n'esse pas

Tuer, que de conduire un homme à son trespas?

XIII

S'il y a quelque fille en toute une contrée

Qui soit inexorable, inhumaine, et cruelle,

Tousjours ell'est de moy pour dame rencontrée,

Et tousjours le malheur me faict serviteur d'elle:

Mais si quelcune est douce, honneste, amyable et belle,

La prise en est pour moy tousjours desesperée:

J'ay beau estre courtois, jeune, accord et fidelle,

Elle sera tousjours d'un sot enamourée.

Souz tel astre malin je naquis en ce monde:

"Voila que c'est d'aymer: ceulx qui ont merité

D'estre recompensez sont en douleur profonde,

Et le sot voluntiers est tousjours bien traité.

O traitre et lasche Amour, que tu es malheureux:

Malheureux est celluy qui devient amoureux.

XIV

Hé que voulez vous dire? estes vous si cruelle.

De ne vouloir aymer? Voyez les passereaus

Qui demenent l'amour: voyez les colombeaux,

Regardez le ramier, voyez la tourterelle.

Voyez deçà delà d'une fretillante aesle

Volleter par les boys les amoureux oiseaux,

Voyez la jeune vigne embrasser les ormeaux,

Et toute chose rire en la saison nouvelle:

Ici, la bergerette, en tournant son fuzeau

Degoise ses amours, et là, le pastoureau

Respond à sa chanson: icy toute chose ayme,

Tout parle de l'amour, tout s'en veult enflammer:

Seulement vostre coeur froid d'une glace extreme

Demeure opiniatre, et ne veult point aymer.

XV

J'ayme la fleur de Mars, j'ayme la belle Rose,

L'une qui est sacrée à Venus la deesse,

L'autre qui a le nom de ma belle maitresse,

Pour qui ne nuict ne jour en paix je ne repose.

J'ayme trois oiseletz, l'un qui sa plume arrose

De la pluye de May, et vers le ciel se dresse:

L'autre qui veuf au boys lamente sa detresse:

L'autre qui pour son filz mile mottez compose.

J'ayme un pin elevé où Venus apendit.

Ma jeune liberté, quand serf elle rendit

Mon cueur, que doucement un bel oeil emprisonne.

J'ayme un gentil laurier, de Phebus l'arbrisseau,

Dont ma belle maistresse en tortant un rameau

Lié de ses cheveux me fist une couronne.

XVI

Aultre (j'en jure Amour) ne se scauroit vanter

D'avoir part en mon cueur, vous seule en estes dame,

Vous seule gouvernez les brides de mon ame,

Et seulz voz yeux me font ou pleurer ou chanter:

Ils m'ont sceu tellement d'un regard enchanter

Que je ne puis ardoir d'autre nouvelle flame:

Quand j'aurois devant moy toute nue une femme,

Encores sa beauté ne me scauroit tenter:

Si vous n'estes d'un lieu si noble que Cassandre

Je ne scaurois qu'y faire, Amour m'a fait descendre

Jusques à vous aymer, Amour qui n'a point d'yeus,

Qui tous les jours transforme en cent sortes nouvelles,

Aigle, Cigne, Toreau ce grand maistre des Dieux,

Pour le rendre amoureux de noz femmes mortelles.

XVII

Amour (comme lon dict), ne naist d'oysiveté,

S'il naissoit de repos il ne fust plus mon maistre:

Je cours, je vays, je viens, et si ne me depestre

De son lien qui tient serve ma liberté.

Je ne suis point oisif, et ne l'ay point esté,

Tousjours la hacquebute, ou la paume champestre,

Ou l'escrime qui rend une jeunesse adextre

Me tient en doux travail tout le jour arresté:

Ores le chien couchant, ores la grande chasse,

Ores un gros ballon bondissant en la place,

Ores nager lutter, voltiger et courir

M'amusent sans repos: mais plus je m'exercite,

Plus Amour naist dans moy, et plus je sentz nourrir

Son feu, qu'un seul regard au cueur me ressuscite.

XVIII

Les villes et les bourgs me sont si odieux

Que je meurs, si je voy quelque tracette humaine:

Seulet dedans les boys pensif je me promeine,

Et rien ne m'est plaisant que les sauvages lieux.

Il n'y a dans ces bois sangliers si furieux,

Ni roc si endurcy, ny ruisseau, ny fonteine,

Ni arbre tant soit sourd, qui ne sache ma peine,

Et qui ne soit marry de mon mal ennuyeus.

Ung penser, qui renaist d'un aultre, m'acompaigne

Avec un pleur amer qui tout le sein me baigne,

Reschauffé de souspirs qui renfrongner me font:

Si bien que si quelcun me trouvoit au bocage

Voyant mon poil rebours, et l'horreur de mon front,

Homme ne me diroit, mais un monstre sauvage.

XIX

Las! pour vous trop aymer je ne vous puis aymer,

Car il fault en aimant avoir discretion:

Helas! je ne l'ay pas: car trop d'affection

Me vient trop folement tout le cueur enflammer.

D'un feu desesperé vous faictes consommer

Mon cueur, qui va brulant sans intermission,

Et si bien la fureur nourrit ma passion

Que la raison me fault, dont je me deusse armer.

Ah! guerissez moy donc de ma fureur extreme,

Afin qu'avec raison honorer je vous puisse,

Ou pardonnez au moins mes faultes à vous mesme,

Et le peché commis en tatant vostre cuisse:

Car je n'eusse touché en lieu si deffendu,

Si pour trop vous aymer mon sens ne fust perdu.

XX

Ode

Un enfant dedans un bocage

Tendoit finement ses gluaux,

A fin de prendre des oyseaux

Pour les emprisonner en cage.

Quand il veit par cas d'adventure,

Pres un buys Amour emplumé,

Qui voloit par le boys ramé

Comme oyseau de mauvais augure.

Son plumage luisoit plus beau

Que n'est du paon la queue estrange,

Et sa face sembloit un Ange

Qu'on voit portrait en un tableau.

Cet enfant qui ne scavoit pas

Que c'estoit, fut si plein de joye

Que pour prendre une si grand' proye

Tendit sa glus et tous ses lats.

Mais quand il veid qu'il ne pouvoit

(Pour quelques gluaus qu'il peut tendre)

Ce cauteleux oyseau surprendre,

Qui voletant le decevoit,

Lors il se print à mutiner.

Et gettant sa glux de colere,

Vint trouver une vieille mere

Qui se mesloit de deviner.

Il luy va le fait expliquer,

Et sur le hault d'un buys lui monstre

L'oyseau de mauvaise rencontre,

Qui ne faisoit que s'en moquer.

La vieille, en branlant ses cheveux

Qui ja grisonnoient de vieillesse,

Luy dit: Cesse, mon enfant, cesse,

Si bien tost mourir tu ne veux,

De prendre ce fier animal:

Cet oyseau, c'est Amour qui vole,

Qui tousjours les hommes affole

Et jamais ne fait que du mal.

O que tu seras bien heureux

Si tu le fuys toute ta vie,

Et si jamais tu n'as envye

D'estre au rolle des amoureux.

Mais j'ay grand doubte qu'à l'instant

Que d'homme parfait auras l'age,

Ce malheureux oyseau volage

Qui par ces arbres te fuyt tant,

Sans y penser te surprendra

Comme une jeune et tendre queste,

Et foullant de ses piedz ta teste,

Que c'est que d'aimer t'aprendra.

XXI

Chanson

Quand je te veux raconter mes douleurs

Et de quel feu en te servant je meurs

Et quel venin desseche ma moüelle,

Ma voix tremblote, et ma langue chancelle,

Mon cueur tressault, et mon sang au dedans

Est tout troublé de gros souspirs ardens.

Sur mes genoulz se sied une gelée,

Jusqu'aux talons une sueur salée

De tout mon corps comme un fleuve se suit,

Et sur mes yeux nage une obscure nuict:

Tanseulement mes larmes abondantes

Sont les tesmoings de mes flames ardentes,

De mon amour, et de ma foy aussi,

Qui sans parler te demandent mercy.

XXII

Chanson

Il m'advint hyer de jurer

Qu'on voirroit mon amour durer

Apres la mort, ma chere amye,

Et afin de t'asseurer mieux

Je feis le serment par mes yeux,

Et par mon cueur, et par ma vie.

Quoy? dis-tu, cela est à moy.

Bien! je le veulx qu'il soit à toy,

Mais las! ma langueur miserable,

Et mes pleurs sont miens pour le moins,

Qui te serviront de tesmoings

Que ma parole est veritable.

Alors, belle, tu me baisas,

Et doucement desatizas

Le feu de ma gentille rage:

Puis tu feis signe de ton oeil,

Que tu recevois bien mon dueil,

Et ma langueur pour tesmoignage.

XXIII

Chanson

Je suis tellement langoureux

Qu'au vray raconter je ne puis

Ni où je suis, ne qui je suis:

Chetif quiconque est amoureux.

J'ay pour mon hoste nuict et jour

Dedans le cueur un fier esmoy,

Qui va exerceant dessus moy

Toutes les cruaultez d'Amour:

Et ne puis me desenflamer

De celle qui m'occist à tort:

Car plus el'me donne la mort,

Plus je suis contraint de l'aymer.

XXIV

Chanson

Je te hay bien (croy moy) maitresse,

Je te hay bien, je le confesse.

Mais toy que je debvrois plus fort

Hayr mile fois que la mort,

Il faut que maugré moy je t'ayme

Dix mille fois plus que moymesme:

Car plus ta fiere cruaulté

M'espovante, plus ta beaulté

(Pour mourir et vivre avec elle)

A ton service me r'appelle.

XXV

Chanson

Si le ciel est ton pays et ton pere,

Si l'Ambrosie est ton vin savoureux,

Si Venus est ta delicate mere,

Si tu te pais de Nectar bienheureux,

Que viens tu faire (ô cruel) en la terre?

Pourquoy viens tu habiter dans mon sein?

Pourquoy fais tu contre mes ôs la guerre?

Pourquoy boys tu mon pauvre sang humain?

Pourquoy prendz tu de mon cueur nourriture?

O filz d'un tygre, ô cruel animal:

Hé que tu es de meschante nature!

Je suis à toy, pourquoy me fais tu mal?

XXVI

Si tost que tu as beu quelque peu de rosée,

Soit de nuict, soit de jour, caché dans un buisson,

Pendant les aesles bas, tu dis une chanson

D'une notte rustique à ton gré composée.

Si tost que j'ay ma vie un petit arrousée

Des larmes de mes yeux, en la mesme façon

Couché dedans ce boys j'espen un triste son,

Selon qu'à larmoyer mon ame est disposée.

Si te passé je bien, d'autant que tu ne pleures

Sinon trois moys de l'an, et moy à toutes heures,

Navré d'une beauté qui me tient en servage.

Mais helas, Rousignol, ou bien à mes chansons

(Si quelque amour te poingt) accorde tes doux sons,

Ou laisse moy tout seul pleurer en ce bocage.

XXVII

J'ay cent mile tormentz, et n'en voudrois moins d'un,

Tant ils me sont plaisantz, pour vous belle maitresse:

Un facheux desplaisir me vaut une liesse,

Et jamais mon seigneur ne me fut importun.

Je suis bien asseuré que si jamais aucun

Fut heureux en servant une humaine déesse,

De cueur et de parolle heureux je me confesse,

Et ne veux point ceder en bon heur à quelqu'un.

Tant plus je suis malade, et plus je suis dispos,

J'appelle mon travail un gratieux repos:

Amour m'aprend par cueur ce langage, et m'assure

Qu'il vault trop mieux mourir pour si belle victoire

Que de gaigner ailleurs: il le dit et le jure

Par son arc et ses traitz, et je le veux bien croire.

XXVIII

Mars fut vostre parein quand naquistes, Marie,

La Mer vostre mareine: un Dieu cruel et fier,

L'autre, element auquel on ne se doit fier,

Car tost son onde est douce, et tost elle est marrie.

Soubz un tiltre d'honneur ce guerrier nous convie

De hanter les combatz, puis est nostre meurtrier:

La Mer quand ell'est douce en flatant vient prier

Qu'on aille en son giron, puis nous oste la vie.

Vous tenez de ce Dieu, mais trop plus de la Mer,

Qui feistes vos beaux yeux serenement calmer,

Vostre front, vostre bouche, et tout vostre visage,

Affin de m'atirer, puis quand me veistes pris

Vous feistes sur mon chef deborder un orage,

Pour me noyer aux flotz de la douce Cypris.

XXIX

Belle, gentille, honneste, humble et douce Marie,

Qui mon cueur dans voz yeux prisonnier détenez,

Et qui par montz et vaulx comme esclave menez

De vostre blanche main ma prisonniere vie.

Hé quantesfoys le jour me prend il une envie

De rompre voz prisons, mais plus vous me donnez

Espoir de liberté, plus vous m'emprisonnez

L'ame, qui languiroit sans vous estre asservie.

Ha je vous ayme tant que je suis fol pour vous,

J'ay perdu ma raison, et ma langue debile.

Au milieu des propos vous nomme à tous les coups,

Vous, comme son subject, sa parolle, et son stile,

Et qui parlant ne fait qu'interpreter, sinon

Mon esprit qui ne pense en rien qu'en vostre nom.

XXX

Mes souspirs, mes amys, vous m'estes agreables

D'autant que vous sortez pour un lieu qui le vault:

Je porte dans le cueur des flames incurables,

Le feu pourtant m'agrée, et du mal ne me chault:

Autant me plaist sentir le froid comme le chault,

Plaisir et desplaisir me sont biens incroiables,

Bien heureux je m'estime aymant en lieu si hault,

Et si veulx estre mis au rang des miserables.

Des miserables, non, mais au rang des heureux,

Car un homme ne peult (sans se veoir amoureux)

Sentir en doux torment que vallent les liesses:

Non, je ne voudrois pas pour l'or de l'univers

N'avoir souffert les maux qu'en aymant j'ay souffertz,

Pour l'attente d'un bien qui vault mille tristesses.

XXXI

Comment au departir l'adieu pourroy je dire,

Duquel le souvenir tanseulement me pasme:

Adieu donc chere vie, adieu donc ma chere ame,

Adieu mon cher soucy, par qui seul je souspire.

Adieu le bel object de mon plaisant martire,

Adieu bel oeil divin qui m'englace et m'enflame,

Adieu ma doulce glace, adieu ma doulce flame,

Adieu par qui je vis, et par qui je respire:

Adieu belle, humble, honeste, et gentille maistresse,

Adieu les doulx liens où vous m'avez tenu

Maintenant en travail, maintenant en liesse:

Il est temps de partir, le jour en est venu:

Mais avant que partir je vous supplie, en lieu

De moy, prendre mon cueur, tenez je le vous laisse,

Voy le là, baisez moy, maistresse, et puis adieu.

XXXII

Quand je vous voy, ma gentille maistresse,

Je deviens fol, sourd, muet, et sans ame,

Dedans mon sein mon pauvre cueur se pasme,

Entre-surpris de joye et de tristesse.

Par tout mon chef le poil rebours se dresse,

De glace froide une fiebvre m'enflamme

Venes et nerfz: en tel estat, ma dame,

Je suis pour vous, quand à vous je m'adresse.

Mon oeil creint plus les vostres qu'un enfant

Ne creint la verge, ou la fille sa mere,

Et toutefois vous ne m'estes severe

Sinon au point que l'honneur vous deffend:

Mais c'est assez, puisque de ma misere

La garison d'autre part ne despend.

XXXIII

Si quelque amoureux passe en Anjou par Bourgueil,

Voye un pin elevé par desus le vilage,

Et là tout au plus hault de son pointu fueillage

Voyra ma liberté, qu'un favorable acueil

A pendu pour trophée aus graces d'un bel oeil,

Qui depuis quinze mois me detient en servage:

Mais servage si doux que la fleur de mon age

Est heureuse d'avoir le bien d'un si beau dueil.

Amour n'eust sceu trouver un arbre plus aymé

Pour pendre ma despouille, en qui fut transformé

Jadis le bel Atys sur la montaigne Idée:

Mais entre Atys et moy il y a difference,

C'est qu'il fut amoureux d'une vieille ridée,

Et moy d'une beauté qui ne sort que d'enfance.

XXXIV

Chanson

Ma maistresse est toute angelette,

Toute belle fleur nouvellette,

Toute mon gratieux acueil,

Toute ma petite brunette,

Toute ma doulce mignonnette,

Toute mon cueur, toute mon oeil.

Toute ma grace et ma Charite,

Toute belle perle d'eslite,

Toute doux parfun Indien,

Toute douce odeur d'Assirie,

Toute ma douce tromperie,

Toute mon mal, toute mon bien.

Toute miel, toute reguelyce,

Toute ma petite malice,

Toute ma joye, et ma langueur,

Toute ma petite Angevine,

Ma toute simple, et toute fine,

Toute mon âme, et tout mon coeur.

Encore un envieux me nie

Que je ne doibs aymer m'amye:

Mais quoy? si ce bel envieux

Disoit que mes yeux je n'aymasse,

Penseriez-vous que je laissasse,

Pour son dire, à n'aymer mes yeux?

XXXV

Chanson

Je ne veulx plus que chanter de tristesse,

Car autrement chanter je ne pourrois,

Veu que je suis absent de ma maistresse:

Si je chantois autrement, je mourrois.

Pour ne mourir il fault donc que je chante

En chantz piteux ma plaintive langueur,

Pour le despart de ma maistresse absente,

Qui de mon sein me déroba le cueur.

Déjà l'Esté, et Cerez la bledtiere,

Ayant son front enceint de son present,

A ramené sa moisson nourriciere

Depuis le temps que mort je suis absent

De ses beaux yeux, dont la lumiere belle

Seule pourroit garison me donner,

Et si j'estois là bas en la nacelle

Me pourroit faire en vie retourner.

Mais ma raison est si bien corrompue

Par une faulce imagination

Que nuict et jour je la porte en la veue,

Et sans la voir j'en ay la vision.

Comme celuy qui contemple les nues

Pense adviser mile formes là sus

D'hommes, d'oyseaux, de chimeres cornues,

Et ne voit rien, car ses yeux sont deceuz:

Et comme cil qui d'une aleine forte,

En haute mer, à puissance de bras

Tire la rame, il pense qu'ell'soit torte

Rompue en l'eau, toutesfois ne l'est pas:

Ainsi je voy d'une veüe trompée

Celle qui m'a tout le sens depravé,

Qui dans mes yeux, et dans l'âme frappée

Par force m'a son portrait engravé,

Et soit que j'erre au plus hault des montaignes,

Ou dans un boys, loing de gens et de bruit,

Soit dans des prez; ou parmi les campagnes,

Tousjours à l'oeil ce beau portrait me suit.

Si j'apperçoy quelque champ qui blondoie

D'espicz frisez au travers des sillons,

Je pense veoir ses beaux cheveux de soye

Refrisotez en mile crespillons.

Si j'apperçoy quelque table carrée

D'yvoire, ou jaspe applany proprement,

Je pense veoir la voulte mesurée

De son beau front egallé plenement.

Si le Croissant au premier moys j'advise,

Je pense veoir son sourcy ressemblant

A l'arc d'un Turc, qui la sagette a mise

Dedans la coche, et menace le blanc.

Quand à mes yeux les estoilles drillantes

Viennent la nuict en temps calme s'offrir,

Je pense veoir ses prunelles ardentes,

Que je ne puis ny füyr ny souffrir.

Quand j'apperçoy la rose sur l'espine,

Je pense veoir de ses levres le tainct,

Mais la beauté de l'une au soir decline,

L'autre beauté jamais ne se destainct.

Quand j'apperçoy des fleurs dans une prée

S'épanouir au lever du Soleil,

Je pense veoir de sa joüe pourprée

Et de son sein le beau lustre vermeil.

Si j'apperçoy quelque chesne sauvage

Qui jusqu'au ciel esleve ses rameaux,

Je pense veoir en luy son beau corsage,

Ses pieds, sa greve, et ses coudes jumeaux.

Si j'entendz bruire une fontaine clere,

Je pense ouyr sa voix dessus le bord,

Qui, se plaignant de ma triste misere,

M'apelle à soy pour me donner confort.

Voila comment pour estre fantastique

En cent façons ses beaultez j'apperçoy,

Et m'esjouys d'estre melancolique

Pour recevoir tant de formes en moy...

Amour vrayement est une maladie,

Les medecins la scavent bien juger,

L'appellant mal, fureur de fantasie

Qui ne se peult par herbes soulager.

J'aymerois mieux la fiebvre dans mes venes,

Ou quelque peste, ou quelqu'autre douleur,

Que de souffrir tant d'amoureuses peines,

Qui sans tüer me consomment le cueur.

Or'va, chanson, dans les mains de ma sainte,

Mon angelette, et luy racompte aussi

Que ce n'est point tromperie ny fainte

De tout cela que j'ay descrit icy.

XXXVI

Chanson

Comme la cire peu à peu,

Quand pres du foüyer on l'approche,

Se fond à la chaleur du feu:

Ou comme au feste d'une roche,

La nege, encores non foulée,

Au soleil se perd escoulée:

Quand tu tournes tes yeux ardens

Sur moy, d'une oeillade sutille,

Je sens tout mon cueur au dedans

Qui se consomme, et se distile,

Et ma pauvre ame n'a partie

Qui ne soit en feu convertie:

Comme une rose qu'un amant

Cache au sein de quelque pucelle,

Qu'ell'est tout le jour enfermant

Pres de son tetin qui pommelle,

Puis chet fanie sur la place

Au soir quand elle se delace:

Et comme un lys par trop lavé

De quelque pluye printaniere

Penche à bas son chef agravé

Dessus la terre nourriciere,

Sans que jamais il se releve

Tant l'humeur pesante le greve:

Ainsi mon chef à mes genoux

Me tombe, et mes genoux à terre,

Sur moy ne bat vene ni poux,

Tant la douleur le cueur me serre:

Je ne puis parler, et mon ame

Engourdie en mon corps se pasme.

Lors ainsi pasmé je mourrois,

Si d'un seul baiser de ta bouche

Mon ame tu ne secourois

Et mon corps froid comme une souche,

Me resouflant en chaque vene

La vie par ta douce alene:

Afin d'estre plus tormenté,

Et que plus souvent je remeure,

Comme le cueur de Promethé

Qui renaist cent fois en une heure,

Pour servir d'apast miserable

A son vautour insatiable.

XXXVII

Chanson

Hyer au soir que je pris maugré toy

Un doux baiser assis de sur ta couche,

Sans y penser, je laissay dans ta bouche

Mon âme, las! qui s'enfuit de moy.

Me voyant prest sur l'heure de mourir,

Et que mon ame amuzée à te suivre

Ne revenoit mon corps faire revivre,

Je t'envoiay mon coeur pour la querir.

Mais mon coeur pris de ton oeil blandissant

Ayma trop mieux estre chez toy, ma dame,

Que retourner: et non plus qu'à mon ame

Ne luy chaloit de mon corps perissant.

Et si je n'eusse en te baisant ravy

Du feu d'Amour quelque chaleur ardente,

Qui depuis seule (en lieu de l'ame absente

Et de mon coeur) de vie m'a servy,

Voulant hyer mon torment apaiser,

Par qui sans ame et sans coeur je demeure,

Je fusse mort entre tes bras, à l'heure

Que maugré toy je te pris un baiser.

XXXVIII

Chanson

Plus tu cognois que je brusle pour toy,

Plus tu me hais, cruelle:

Plus tu cognois que je vis en esmoy,

Et plus tu m'es rebelle.

Mais c'est tout un, car las! je suis tant tien

Que je beniray l'heure

De mon trespas: au moins s'il te plaist bien

Qu'en te servant je meure.

XXXIX

O ma belle maitresse, à tout le moins prenez

De moi vostre servant ce Roussignol en cage.

Il est mon prisonnier, et je vis en servage

De vous, qui sans mercy en prison me tenez:

Allez donq Roussignol, en sa chambre, et sonnez

Mon dueil à son oreille avec vostre ramage,

Et s'il vous est possible émouvez le courage

De ma dame à pitié, puis vous en revenez:

Non, ne revenez point! que feriez vous chez moi?

Sans aucun reconfort, vous languiriez d'esmoy:

"Un prisonnier ne peut un autre secourir.

Dittes luy que je n'ay sur vostre bien envie,

Et que tant seulement je me pleins de ma vie

Qui languist en prison, et si n'y peut mourir.

XL

Chanson

Je suis un demidieu quand assis vis à vis

De toy, mon cher soucy, j'escoute les devis,

Devis entrerompus d'un gracieux soubrire,

Soubris qui me detient le coeur emprisonné,

Car en voyant tes yeux je me pasme estonné,

Et de mes pauvres flancz un seul mot je ne tire.

Ma langue s'engourdist, un petit feu me court

Honteux de sous la peau, je suis muet et sourd,

Et une obscure nuit de sur mes yeux demeure,

Mon sang devient glacé, l'esprit fuit de mon corps,

Je tremble tout de crainte, et peu s'en faut alors

Qu'à tes pieds estendu languissant je ne meure.

XLI

Chanson

Si je t'assaus, Amour, Dieu qui m'est trop cognu!

En vain je te feray dans ton camp des alarmes,

Tu es un vieil routier, et bien apris aus armes,

Et moy jeune guerrier, mal apris et tout nu.

Si je fuis devant toy, je ne sçaurois aller

En lieu que je ne sois devancé de ton aisle.

Si je veux me cacher, l'amoureuse estincelle

Qui reluist en mon coeur me viendra déceler.

Si je veux m'embarquer, tu es fils de la mer,

Si je m'enleve au ciel, ton pouvoir y commande,

Si je tombe aux enfers, ta puissance y est grande.

Ainsi maistre de tout, force m'est de t'aymer.

Or' je t'aymerai donq, bien qu'envis de mon coeur,

Si c'est quelque amitié que d'aymer par contrainte.

Toutesfois (comme on dit) on voit souvent la creinte

S'accompaigner d'amour, et l'amour de la peur.

XLII

A son livre

Mon fils, si tu sçavois que lon dira de toy,

Tu ne voudrois jamais déloger de chez moy,

Enclos en mon poulpitre: et ne voudrois te faire

User ny fueilleter aux mains du populaire:

Quand tu seras party, sans jamais retourner,

Il te faudra bien loing de mes yeux sejourner,

Car ainsi que le vent sans retourner s'en vole,

Sans espoir de retour s'échappe la parole.

Ma parole c'est toy, à qui de nuict et jour

J'ay conté les propos que m'a tenus Amour,

Pour les mettre en ces vers qu'en lumiere tu portes,

Crochettant, maugré moy, de mon escrin les portes,

Pauvret! qui ne sçais pas que les petis enfans

De la France ont le nez plus subtil qu'Elephans.

Donc, avant que tenter le hazard du naufrage,

Voy du port la tempeste, et demeure au rivage:

On se repent trop tard quand on est embarqué

Tu seras assez tost des medisans moqué

D'yeux et de haussebecs, et d'un branler de teste:

Sage est celuy qui croit à qui bien l'admonneste.

Tu sçais (mon cher enfant) que je ne te voudrois

Ny tromper ny moquer, grandement je faudrois,

Et serois engendré d'une ingrate nature,

Si je voulois trahir ma propre geniture,

Car ainsi que tu es nagueres je te fis,

Et je ne t'ayme moins qu'un pere ayme son fils.

Quoy? tu veux donc partir, et tant plus je te cuide

Retenir au logis plus tu hausses la bride.

Va donc, puis qu'il te plaist: mais je te suppliray

De respondre à chacun ce que je te diray,

Afin que toi (mon fils) gardes bien, en l'absence,

De moy le pere tien l'honneur et l'innocence.

Si quelque dame honneste et gentille de coeur

(Qui aura l'inconstance et le change en horreur)

Me vient, en te lisant, d'un gros sourcy reprendre

Dequoy je ne devois abandonner Cassandre,

Qui la première au coeur le trait d'Amour me meist,

Et que le bon Petrarque un tel peché ne feist,

Qui fut trente et un an amoureux de sa dame,

Sans qu'une autre jamais luy peust eschaufer l'ame:

Responds luy, je te pry, que Petrarque sur moy

N'avoit authorité pour me donner sa loy,

Ny à ceux qui viendroient apres luy, pour les faire

Si long temps amoureux sans s'en pouvoir deffaire

Luy mesme ne fut tel: car à voir son escrit

Il estoit esveillé d'un trop gentil esprit

Pour estre sot trente ans, abusant sa jeunesse,

Et sa Muse, au giron d'une seule maitresse:

Ou bien il jouissoit de sa Laurette, ou bien

Il estoit un grand fat d'aymer sans avoir rien,

Ce que je ne puis croire, aussi n'est-il croiable:

Non, il en jouissoit, puis l'a faitte admirable,

"Chaste, divine, sainte: aussi tout amant doit

Loüer celle de qui jouissance il reçoit:

Car celuy qui la blasme apres la jouissance

N'est homme, mais d'un Tygre il a prins sa naissance.

Quand quelque jeune fille est au commencement

Cruelle, dure, fiere, à son premier amant,

Et bien! il faut attendre, il peut estre qu'un heure

Viendra, sans y penser, qui la rendra meilleure:

Mais quand elle devient de pis en pis tousjours,

Plus dure, et plus cruelle, et plus rude en amours,

Il la faut laisser là, sans se rompre la teste

De vouloir adoucir une si sotte beste:

Je suis de tel advis, me blasme de ce cas

Ou loue qui voudra, je ne m'en soucy pas.

Les femmes bien souvent sont causes que nous sommes

Inconstans et legers, amadouant les hommes

D'un pouvoir enchanteur, les tenant quelques fois

Par une douce ruse un an, ou deux, ou trois

Dans les liens d'Amour, sans aucune alegence:

Cependant un valet en aura jouissance,

Ou quelque autre mignon, dont on ne se doubt'ra,

Sa faux en la moisson segrettement mettra:

Et si ne laisseront, je parle des rusées

Qui ont au train d'amour leurs jeunesses usées

(C'est bien le plus grand mal qu'un homme puisse avoir

De servir quelque vieille apte à bien decevoir),

D'enjoindre des labeurs qui sont insuportables,

Des services cruels, des tâches miserables:

Car sans avoir esgard à la simple amitié,

Aux prieres, aux coeurs, cruelles, n'ont pitié

De leurs pauvres servans, tant elles font les braves,

Qu'un Turc a de pitié de ses pauvres esclaves.

Il faut vendre son bien, il faut faire presens

De chaisnes, de carquans, de diamans luisans,

Il faut donner la perle, et l'habit magnifique,

Il faut entretenir la table, et la musique,

Il faut prendre querelle, il faut les suporter:

Certes j'aymerois mieux de sur le dos porter

La hotte, pour curer les estables d'Augée,

Que d'estre serviteur d'une dame rusée.

"La mer est bien à craindre, aussi est bien le feu,

Et le ciel quand il est de tonnerres esmeu,

Mais trop plus est à craindre une femme clairgesse

D'esprit subtil et prompt quand elle est tromperesse:

Par mille inventions mille maux elle fait,

Et d'autant qu'elle est femme, et d'autant qu'elle sçait.

Quiconque fut le Dieu qui la meist en lumiere

Vrayment il fut autheur d'une grande misere:

Il failloit par presens consacrez aux autels

Achetter noz enfans des grands Dieux immortels

Et non user sa vie avec ce soing aymable,

Les femmes, passion de l'homme miserable,

Miserable et chetif, d'autant qu'il est vassal,

Vingt ou trente ans qu'il vit, d'un si fier animal.

Mais, je vous pry, voyez comment par fines ruses

Elles sçavent trouver mille faintes excuses

Apres qu'el'ont peché! voyez Helene aprés

Qu'Ilion fut brulé de la flame des Grecs,

Comme elle amadoüa d'une douce blandice

Son badin de mary qui pardonna son vice,

Et qui plus que devant de ses yeux fut espris,

Qui scintilloient encor les amours de Paris.

Ulys qui fut si caut, bien qu'il sceust qu'une troppe

De jeunes poursuyvans baizassent Penelope,

Devorans tout son bien, si esse qu'il bruloit

D'embrasser son espouse, et jamais ne vouloit

Devenir immortel avec Circe la belle,

Pour ne revoir jamais Penelope, laquelle

Pleurant luy rescrivoit de son facheux sejour,

Pendant que, luy absent, elle faisoit l'amour

(Si bien que le Dieu Pan de ses jeus print naissance,

D'elle et de ses muguets la commune semence),

Envoyant tout exprés pour sa commodité

Son fils chercher Ulysse en Sparte la cité.

Vélà comment la femme avec ses ruses donte

L'homme, de qui l'esprit toutes bestes surmonte.

Quand un jeune homme peut heureusement choisir

Une belle maitresse esleüe à son plaisir,

Soit de haut ou bas lieu, pourveu qu'elle soit fille

Humble, courtoise, honeste, amoureuse et gentille,

Sans fard, sans tromperie, et qui sans mauvaistié

Garde de tout son coeur une simple amitié,

Aymant trop mieux cent fois à la mort estre mise

Que de rompre sa foy quand elle l'a promise,

Il la faut bien aymer tant qu'on sera vivant

Comme une chose rare arrivant peu souvent.

Celuy certainement merite sur la teste

Le feu le plus ardent d'une horrible tempeste

Qui trompe une pucelle, et mesmement alors

Qu'elle se donne à nous et de coeur et de corps.

N'esse pas un grand bien quand on fait un voiage

De rencontrer quelcun qui d'un pareil courage

Veut nous acompagner, et comme nous passer

Les chemins tant soient-ils facheux à traverser?

Aussi n'esse un grand bien de trouver une amye

Qui nous ayde à passer cette chetive vie,

Qui sans estre fardée, ou pleine de rigueur

Traitte fidelement de son amy le coeur?

Dy leur, si de fortune une belle Cassandre

Vers moy se fust monstrée un peu courtoise et tendre,

Un peu douce et traitable, et songneuse à garir

Le mal dont ses beaux yeux dix ans m'ont fait mourir,

Non seulement du corps, mais sans plus d'une oeillade

Eust voulu soulager mon pauvre coeur malade,

Je ne l'eusse laissée, et m'en soit à tesmoing

Ce jeune enfant aislé qui des amours a soing.

Mais voiant que tousjours el'devenoit plus fiere,

Je delyé du tout mon amitié premiere

Pour en aymer une autre en ce pais d'Anjou,

Où maintenant Amour me detient sous le jou:

Laquelle tout soudain je quitteray, si elle

M'est, comme fut Cassandre, orgueilleuse et rebelle,

Pour en chercher une autre, afin de voir un jour

De pareille amitié recompenser m'amour,

Sentant l'affection d'un autre dans moymesme,

"Car un homme est bien sot d'aymer si on ne l'ayme.

Or', si quelqu'un aprés me vient blasmer de quoy

Je ne suis plus si grave en mes vers que j'estoy

A mon commencement, quand l'humeur Pindarique

Enfloit empoulément ma bouche magnifique,

Dy luy que les amours ne se souspirent pas

D'un vers hautement grave, ains d'un beau stille bas,

Populaire et plaisant, ainsi qu'a fait Tibulle,

L'ingenieux Ovide, et le docte Catulle:

Le fils de Venus hait ces ostentations:

Il sufist qu'on luy chante au vray ses passions,

Sans enfleure ny fard, d'un mignard et dous stille,

Coulant d'un petit bruit comme une eau qui distille.

Ceus qui font autrement ils font un mauvais tour

A la simple Venus, et à son fils Amour.

S'il advient quelque jour que d'une voix hardie

J'anime l'eschaufaut par une tragedie

Sententieuse et grave, alors je feray voir

Combien peuvent les nerfs de mon petit sçavoir:

Et si quelque Furie en mes vers je rencontre,

Hardi, j'opposeray mes Muses alencontre,

Et feray resonner d'un haut et grave son

(Pour avoir par au bouc) la tragique tansson:

Mais ores que d'Amour les passions je pousse,

Humble je veux user d'une Muse plus douce.

Non, non, je ne veux pas que pour ce livre icy

On me lise au poulpitre, ou dans l'escole aussi

D'un Regent sourcilleux: il suffist si m'amye

Le touche de la main dont elle tient ma vie:

Car je suis satisfait, si elle prend à gré

Ce labeur, que je voue à ses pieds consacré,

Et à celles qui sont de nature amiables,

Et qui jusqu'à la mort ne sont point variables.

Sonets à Sinope

I

L'an se rajeunissoit en sa verde jouvence,

Quand je m'espris de vous, ma Sinope cruelle:

Seize ans estoyent la fleur de vostre age nouvelle,

Et vos beaux yeux sentoyent encore leur enfance.

Vous aviez d'une infante encore la contenance,

La parolle, et les pas, vostre bouche estoit belle,

Vostre front, et vos mains dignes d'une immortelle,

Et vos cheveux faisoyent au Soleil un offense.

Amour, qui ce jour là si grandes beautez vit,

Dans un marbre, en mon cueur d'un trait les escrivit:

Et si pour le jourdhuy vos beautez si parfaittes

Ne sont comme autresfois, je n'en suis moins ravy:

Car je n'ay pas egard à cela que vous estes,

Mais au doux souvenir des beautez que je vy.

II

Sinope, de mon cueur vous emportez la clef,

La clef de mes pensers, et la clef de ma vie:

Et toutesfois (helas!) je ne leur porte envye,

Pourveu que vous ayez pitié de leur mechef.

Vous me laissez tout seul en un tourment si gref,

Que je mourray de dueil, d'ire et de jalousie:

Tout seul je le voudrois, mais une compagnie

Vous me donnez de pleurs, qui coulent de mon chef.

Que maudit soit le jour, que la flesche cruelle

M'engrava dans le cueur vostre face si belle,

Vos cheveux, vostre front, vos yeux, et vostre port!

Je devois mourir lors sans plus tarder d'une heure.

Le temps, que j'ai vescu depuis telle blesseure,

Aussi bien n'a servy, qu'à m'alonger la mort.

III

Avant vostre partir je vous fais un present

(Bien que sans ce present impossible est de vivre),

Sinope, c'est mon cueur, qui brule de vous suyvre.

Gettez le en vostre coche: il n'est pas si pesant.

Il vous sera fidele, humble et obeissant,

Comme un, qui de son gré à vous servir se livre.

Il est de toute amour, fors la vostre, delivre:

Mais la vostre le tue, et taist le mal qu'il sent.

Mais plus vous le tuez, et plus vostre se nomme,

Et dit que pour le moins il vaut le gentil-homme,

Qui d'amour vous enflame, et n'en est enflamé.

O merveilleux effaicts de l'inconstance humaine!

Celuy, qui ayme bien, languist tousjours en peine:

Celuy, qui n'ayme point, est tousjours bien aymé.

IV

Ma Sinope, mon cueur, ma vie, et ma lumiere,

Autant que vous passez toute jeune pucelle

En grace et en beauté, autant vous estes celle

Qui m'estes à grand tort inconstante et legere.

Pardon, si je l'ay dit: las! plus vous m'estes fiere,

Plus vous me decevez, plus vous me semblez belle:

Plus vous m'estes volage, inconstante, et rebelle,

Et plus je vous estime, et plus vous m'estes chere.

Or de vostre inconstance accuser je me doy,

Vous fournissant d'amy qui fut plus beau que moy,

Plus jeune et plus dispos, mais non d'amour si forte.

Donques je me condanne, et vous absous du fait:

Car c'est bien la raison que la peine je porte,

Sinope, et non pas vous, du peché que j'ay fait.

V

D'un sang froid, noir et lent, je sens glacer mon cueur:

Quand quelcun parle à vous, ou quand quelcun vous touche,

Une ire au tour du cueur me dresse l'escarmouche,

Jaloux contre celuy qui reçoit tant d'honneur.

Je suis (je n'en mens point) jaloux de vostre soeur,

De mon ombre, de moy, de mes yeux, de ma bouche.

Ainsi ce petit Dieu, qui la raison me bousche,

Me tient tousjours pour vous en soupson et en peur.

Je ne puis aymer ceux, à qui vous faites chere,

Fussent-ils mes cousins, mes oncles, ou mon pere,

Je ne les puis aymer, mais je les hay bienfort.

Les Roys ny les amans ne veulent point ensemble

Avoir de compagnons Helas! je leur ressemble:

Plustost que d'en avoir, je desire la mort.

VI

Quand je suis tout bessé sur vostre belle face,

Je voy dedans vos yeux je ne sçay quoy de blanc,

Je ne sçay quoy de noir, qui m'esmeut tout le sang,

Et qui jusques au cueur de vene en vene passe.

Je voy dedans Amour, qui va changeant de place,

Ores bas, ores haut, tousjours me regardant,

Et son arc contre moy coup sur coup debandant.

Las! si je faux, raison, que veux-tu que j'y face?

Tant s'en faut que je sois alors maistre de moy,

Que je vendrois mon pere, et trahirois mon Roy,

Mon païs, et ma soeur, mes freres et ma mere:

Tant je suis hors du sens, apres que j'ay taté

A longs traits amoureux de la poison amere,

Qui sort de ces beaux yeux, dont je suis enchanté.

VII

Je reçoy plus de bien à regarder vos yeux

Qu'à boire, qu'à manger, qu'à dormir, ny qu'à faire

Chose qui soit à l'ame, ou au corps necessaire:

Tant de vostre regard je suis ambicieux.

Pource ny froid hyver, ny esté chaleureux

Ne me peut empescher, que je n'alle complaire

A ce cruel plaisir, qui me rend tributaire

De vos yeux, qui me sont si doux et rigoureux.

Sinope, vous avez de vos lentes oeillades

Gasté de mes deux yeux les lumieres malades,

Et si ne vous chaut point du mal que m'avez fait:

Au moins guarissez-les, ou confessez l'offense:

Si vous la confessez, je seray satisfait,

Me donnant un baiser pour toute recompense.

VIII

Si j'estois Jupiter, Sinope, vous seriez

Mon espouse Junon: si j'estois Roy des ondes,

Vous seriez ma Thetys, Royne des eaux profondes,

Et pour vostre maison la grand mer vous auriez:

Si la terre estoit mienne, avec moy vous tiendriez

L'empire sous vos mains, dame des terres rondes,

Et de sur une coche, en belles tresses blondes,

Par le peuple en honneur, Déesse, vous iriez.

Mais je ne le suis pas, et puis vous ennuyez.

D'aymer les bonnets rons, gras troupeau de l'Eglise.

Ah! vous ne sçavez pas l'honneur que vous fuiez,

Ny les biens qui cachez dedans ce bonnet sont.

Si l'amour dans le monde a sa demeure prise,

Il ne la prit jamais que dans un bonnet rond.

IX

Il ne faut dedagner le troupeau de l'Eglise,

Pourtant s'il est gaillard, jeune, frais, et dispos,

Sejourné, gros et gras, en aise, et en repos,

En delices confit, en jeux et mignardise.

Ma Sinope, mon cueur, quand une fille prise

Par trop le mariage, elle est hors de propos:

Car un mary commande, il tence, il dit des mots

Tous remplis de fureur, d'orgueil et de maistrise.

Au contraire un amant est humble et suppliant,

Comme franc de courage, et qui ne va liant

Sa douce liberté sous une loy de creinte.

Qui veut hayr s'amie, il faut se marier:

Qui veut tousjours l'aymer, il ne faut s'y lier,

Mais vivre avecques elle en amour sans contrainte.

X

Sinope, que j'adore en trop cruel destin,

Quand d'un baiser d'amour vostre bouche me baise,

Je suis tout esperdu, tant le cueur me bat d'aise:

Entre vos doux baisers puissay-je prendre fin!

Il sort de vostre bouche un doux flair, qui le tin

Surmonte de douceur, la rose, et la framboise,

Et tout le just des fleurs dont l'avette Appuloise

Fait dedans ses vaisseaux son miel le plus divin.

Il sort de vos tetins une odoreuse haleine.

(Je meurs en y pensant) de parfum toute pleine,

Digne d'aller au ciel embasmer Jupiter.

Mais quand toute mon ame en plaisir se consomme

Mourant de sus vos yeux, lors pour me despiter

Vous fuiez de mon col, pour baiser un jeune homme.

XI

Maistresse, à tous les coups vous m'alleguez S. Pol,

Quand je vous veux baiser, vos yeux, ou vostre bouche,

Ou quand trop librement vostre beau sein je touche,

Ou quand ma dent lascive entame vostre col,

Ou quand de bon matin, contrefaisant le fol,

Passionné d'amour, je vois à vostre couche,

Ou quand ma souple main vous dresse l'escarmouche

A la breche qu'amour me defend du genol.

Je sçay que je commets envers vous une faute,

Mais la playe d'amour que je porte si haute,

Et si parfonde au cueur, m'a l'esprit empesché,

Ou bien ne soyez plus si gentille et si belle,

Ou bien je ne sçaurois (tant que vous serez telle)

M'engarder de vouloir faire un si beau peché.

XII

Sinope, baisez moy, non: ne me baisez pas,

Mais tirez moy le cueur de vostre douce halene.

Non: ne le tirez pas, mais hors de chaque vene

Sucez moy toute l'ame esparse entre vos bras.

Non: ne la sucez pas, car apres le trespas:

Que seroi-je, sinon une semblance veine,

Sans corps de sur la rive où l'amour ne demeine,

Comme il fait icy haut, qu'en feintes, ses esbas.

Pendant que nous vivons, entr'aymon nous, Sinope,

Amour ne regne point sur la debile trope

Des morts, qui sont sillez d'un long somme de fer.

C'est abus que Pluton ayt aymé Proserpine,

Si doux soing n'entre point en si dure poitrine:

Amour ne sçauroit vivre entre les morts d'enfer.

XIII

Comme d'un ennemy, je veux en toute place

M'eslongner de vos yeux, qui mon cueur ont deceu,

Petits yeux de Venus, par lesquels j'ay receu

Le coup mortel au cueur, qui d'outre en outre passe.

Je voy tousjours dans eux Amour qui me menasse,

Au moins voyant son arc je l'ay bien aperceu:

Mais remparer mon cueur contre luy je n'ay sceu,

Dont le trait fausseroit une forte cuirasse.

Or pour ne les voyr plus je veux aller bien loing

Vivre de sur le bord d'une mer solitaire:

Encore j'ay grand peur de ne perdre le soing,

Qui hoste de mon cueur y loge nuict et jour.

Lon peut bien sur la mer un long voyage faire,

Mais on ne peut changer ny de cueur, ny d'amour.

XIV

Astres qui dans le ciel rouëz vostre voiage,

D'où vient nostre destin de la Parque ordonné,

Si ma Muse autre fois vos honneurs a sonné,

Detournez (s'il vous plait) mon malheureux presage.

Ceste nuict en dormant, sans faire aucun outrage

A l'anneau que Sinope au soir m'avoit donné,

S'est rompu dans mon doy, et du cas estonné,

J'ay senti tout mon cueur bouillonner d'une rage.

Si ma dame envers moy a peu rompre sa foy,

Ainsi que cest anneau s'est rompu dans mon doy,

Astres, je veux mourir: envoyez moy le somme,

Affin d'interpreter la doute de mon sort,

Et faittes, s'il est vray, que mes yeux il assomme

Sans plus les reveiller, au dormir de la mort.

XV

Vos yeux estoient blessez d'une humeur enflammée,

Qui m'ont gasté les miens d'une semblable humeur,

Et pource que vos yeux aux miens ont fait douleur,

Je vous ay d'un nom grec Sinope surnommée.

Mais cest'humeur mauvaise au cueur est devallée:

Et là comme maistresse a pris force et vigueur,

Gastant mon pauvre sang, d'une blesme langueur,

Qui ja par tout le corps lente s'est escoulée.

Mon cueur environné de ce mortel danger,

En voulant resister au malheur estranger,

A mon sang converty en larmes et en pluye:

Affin que par les yeux auteurs de mon soucy

Mon malheur fust noyé, ou que par eux aussi

Fuiant davant le feu j'espuisasse ma vie.

XVI

C'est trop aymé, pauvre Ronsard, delaisse

D'estre plus sot, et le temps despendu

A prochasser l'amour d'une maistresse,

Comme perdu pense l'avoir perdu.

Ne pense pas, si tu as pretendu

En trop haut lieu une haute Déesse,

Que pour cela un bien te soit rendu:

Amour ne paist les siens, que de tristesse.

Je cognois bien que ta Sinope t'ayme,

Mais beaucoup mieux elle s'ayme soy-mesme,

Qui seulement amy riche desire.

Le bonnet rond, que tu prens maugré toy,

Et des puisnez la rigoreuse loy

La font changer et (peut estre) à un pire.

XVII

Chanson à Olivier de Magny

sur le chant de Saint Augustin

Qui veult sçavoir amour et sa nature,

Son arc, ses feux, ses traits et sa poincture,

Que c'est qu'il est et que c'est qu'il desire,

Lise ces vers, je m'en vois le decrire.

C'est un plaisir tout remply de tristesse,

C'est un tourment tout confit de liesse,

Un desespoir où tousjours lon espere,

Un esperer où lon se desespere.

C'est un regret de jeunesse perdue,

C'est dedans l'air une poudre espendue,

C'est peindre en l'eau, et c'est vouloir encore

Tenir le vent, et denoircir un More.

C'est une foy pleine de tromperie,

Où plus est seur celuy, qui moins s'y fie:

C'est un marché, qu'une fraude acompagne,

Où plus y perd celuy, qui plus y gagne.

C'est un feint ris, c'est une douleur vraye,

C'est sans se pleindre avoir au cueur la playe,

C'est devenir valet en lieu de maistre,

C'est mille fois le jour mourir et naistre.

C'est un fermer à ses amis la porte

De la raison, qui languist presque morte,

Pour en bailler la clef à l'ennemye,

Qui la reçoit sous ombre d'estre amye.

C'est mille maux pour une seule oeillade,

C'est estre sain, et feindre le malade,

C'est en mentant se parjurer, et faire

Profession de flatter et de plaire.

C'est une Hecube oser faire une Heleine,

D'une Cumée une autre Polyxene,

C'est se promettre aveques son amye

L'eternité d'une durable vie.

C'est un grand feu couvert d'un peu de glace,

C'est un beau jeu tout remply de fallace,

C'est un despit, une guerre, une treve,

Un long penser, une parole breve.

C'est par dehors dissimuler sa joye,

Celant un cueur au dedans, qui larmoye:

C'est un malheur si plaisant, qu'on desire

Tousjours languir en un si beau martyre.

C'est une paix, qui n'a point de durée,

C'est une guerre au combat assurée,

Où le veincu reçoit toute la gloire,

Et le veincueur a perte en sa victoire.

C'est une erreur de jeunesse, qui prise

Une prison trop plus que sa franchise:

C'est un penser, qui jamais ne repose,

Et si ne veut penser qu'en une chose.

Et bref, Magny, c'est une jalousie,

C'est une fievre en une frenaisie:

Car quel malheur plus grand nous pourroit suyvre,

Qu'en nous mourir pour en un autre vivre?

Donques à fin que ton cueur ne se mette

Sous les liens d'une loy si sujette,

Si tu m'en crois, prens y davant bien garde:

Le repentir est une chose tarde.

XVIII

Amourette

Or que l'hyver roidist la glace espesse,

Rechaufon nous, ma gentille maistresse,

Non acroupis dans le fouyer cendreux,

Mais au plaisir des combats amoureux.

Assison nous sur cette verte couche.

Sus baysez moy de vostre belle bouche.

Pressez mon col de vos bras deliez,

Et maintenant vostre mere oubliez,

Que de la dent vostre tetin je morde,

Que vos cheveux fil à fil je detorde:

Car il ne faut en si folastres jeux,

Comme au Dimanche, arrenger ses cheveux.

Approchez vous, tendez moy vostre oreille:

Ha! vous avez la couleur plus vermeille

Que paravant: avez vous point ouy

Quelque doux mot, qui vous ayt rejouy?

Je vous disois que la main j'allois mettre

Sur vos genoux: le voulez vous permettre?

Vous rougissez, maistresse, je voy bien,

A vostre front, que vous le voulez bien.

Quoy? vous faut il cognoistre à vostre mine?

Je jure Amour, que vous estes si fine,

Que pour mourir de bouche ne diriez

Qu'on vous le fist, bien que le desiriez:

Car toute fille, encor' qu'elle ait envye

Du jeu d'aymer, desire estre ravie.

Tesmoing en est Helene, qui suivit

D'un franc vouloir celuy qui la ravit.

Or je vais donc user d'une main forte

Pour vous avoir: ha, vous faittes la morte,

Sus, endurez ce doux je ne sçay quoy:

Car autrement vous moqueriez de moy

Dans vostre lit, quand vous seriez seulette.

Or, sus, c'est fait, ma gentille doucette:

Recommençon, à fin que nos beaux ans

Soyent rechaufez en combas si plaisans.

XIX

La quenoille

Quenoille, de Pallas la compagne et l'amye,

Cher present que je porte à ma chere ennemye,

Afin de soulager l'ennuy qu'elle a de moy,

Disant quelque chanson en filant de sur toy.

Faisant pirouëter (tout le jour amusée)

Ou son rond devideau, ou sa grosse fusée.

Sus, Quenoille, suy moy, je te meine servir,

Celle que je ne puis m'engarder de suivir:

Tu ne viendras es mains d'une pucelle oysive,

Qui ne fait qu'atifer sa perruque lascive,

Et qui perd tout le jour, à mirer et farder

Sa face, à celle fin qu'on l'aille regarder:

Mais bien entre les mains d'une disposte fille,

Qui devide, qui coust, qui menage, qui file,

Avecques ses deux soeurs, pour tromper ses ennuys,

L'hyver davant le feu, l'esté davant son huis:

Aussi je ne voudrois que toy, Quenoille gente,

Qui es de Vandomois, où le peuple se vente

D'estre bon menager, allasses en Anjou

Pour demeurer oysive, et te rouiller au clou.

Je te puis assurer que sa main delicate,

Peut estre, filera quelque drap d'escarlate,

Qui si fin et si souef en sa laine sera,

Que pour un jour de feste un Roy le vestira.

Suy moy donc, tu seras la plus-que bien venue,

Quenoille, des deux bouts et grellette et menue,

Un peu grosse au milieu, où la filace tient

Estreinte d'un riban, qui de Montoire vient,

Aime-laine, aime-fil, aime-estain, maisonniere,

Longue, Palladienne, enflée, chansonniere.

De Coustures desloge, et va droit à Bourgueil,

Où, Quenoille, on te doit recevoir d'un bon oeil:

Car le petit present, qu'un loyal amy donne,

Passe des puissans Roys le sceptre et la couronne.

Livre I

I

Mon des Autelz, qui avez des enfance

Puisé de l'eau qui coule sur le mont

Où les neuf Soeurs dedans un antre font

Seules apart leur saincte demeurance.

Si autrefois l'amoureuse puissance

Vous a planté le myrthe sur le front,

Enamouré de ces beaux yeux qui sont

Par vos escris l'honeur de nostre France,

Ayez pitié de ma pauvre langueur

Et de vos sons adoucissez le cueur

D'une qui tient ma franchise en contraincte.

Si quelque fois en vos cartiers je suis,

Je flechiray par mes vers, si je puis,

La cruauté de vostre belle Saincte.

II

Chanson

Je suis amoureux en deux lieux:

De l'un j'en suis desesperé,

De l'autre j'en espere mieux,

Et si n'en suis pas asseuré:

Que me sert d'avoir souspiré

Pour deux amours si longuement,

Puis qu'en lieu du bien desiré

Je n'ay que malheur et torment:

Or quant à moy je suis content

Desormais toute amour quitter,

Puis qu'on voit un menteur autant

Qu'un veritable meriter:

Je ne m'en veus plus tormenter

Ny mettre en espreuve ma foy,

Il est temps de se contenter

Et n'aymer plus autre que moy.

III

Elégie

Cherche, Cassandre, un poëte nouveau

Qui apres moy se rompe le cerveau

A te chanter: il aura bien affaire,

Fusse un Bayf, s'il peut aussi bien faire.

Si nostre empire avoit jadis esté

Par noz François aussi avant planté

Que le Rommain, tu serois autant leüe

Que si Tibull' t'avoit pour sienne esleüe:

Et neantmoins tu te dois contenter

De veoir ton nom par la France chanter,

Autant que Laure en Tuscan anoblie

Se voit chanter par la belle Italie.

Or, pour t'avoir consacré mes escris

Je n'ay gaigné sinon des cheveus gris,

La ride au front, la tristesse en la face,

Sans meriter un seul bien de ta grace:

Bien que mes vers et que ma loyauté

Eussent d'un tygre esmeu la cruauté:

Et toutefois je m'asseure, quand l'age

Aura donté l'orgueil de ton courage,

Que de mon mal tu te repentiras

Et qu'à la fin tu te convertiras:

Et ce pendant je souffriray la peine,

Toy le plaisir d'une liesse veine

De trop me veoir languir en ton amour,

Dont Nemesis te doit punir un jour.

Ceux qui amour cognoissent par espreuve

Lisant le mal dans lequel je me treuve,

Ne pardon'ront à ma simple amytié

Tant seulement, mais en auront pitié.

Or, quand à moy, je pense avoir perdue

En te servant ma jeunesse, espendue

Deça, delà dedans ce livre icy.

Je voy ma faulte et la prens à mercy,

Comme celuy qui sçait que nostre vie

N'est rien que vent, que songe, et que folye.

Livre II

I

Docte Buttet, qui as montré la voye

Aux tiens de suivre Apollon et son Choeur,

Qui le premier t'espoinçonnant le coeur,

Te fist chanter sur les mons de Savoye,

Puis que l'amour à la mort me convoye,

De sur ma tombe (apres que la douleur

M'aura tué) engrave mon malheur

De ces sept vers qu'adeullez je t'envoye:

Celuy qui gist sous cette tombe icy

Aima premiere une belle Cassandre,

Aima seconde une Marie aussy,

Tant en amour il fut facile a prendre.

De la premiere il eut le coeur transy

De la seconde il eut le coeur en cendre,

Et si des deux il n'eut oncques mercy.

II

Au seigneur L'Huillier

L'Huillier (à qui Phoebus, comme au seul de nostre age,

A donné ses beaux vers et son Lut en partage),

En ta faveur icy je chante les amours

Que Perrot et Thoinet soupirerent à Tours,

L'un espris de Francine, et l'autre de Marie.

Ce Thoinet est Baïf, qui doctement manie

Les mestiers d'Apollon: ce Perrot est Ronsard,

Que la Muse n'a fait le dernier en son art.

Si ce grand duc de Guyse, honneur de nostre France,

N'amuse point ta plume en chose d'importance,

Prestes moi ton aureille, et t'en viens lire icy

L'amour de ces pasteurs, et leur voyage aussi.

C'estoit en la saison que l'amoureuse Flore

Faisoit pour son amy les fleurettes esclore,

Par les prés bigarés d'autant d'aimail de fleurs

Que le grand arc du ciel s'emaille de couleurs:

Lors que les papillons et les blondes avettes,

Les uns chargez au bec, le autres aus cuissettes,

Errent par les jardins, et les petites oyseaus,

Volletans par les bois de rameaus en rameaus,

Amassent la bechée, et parmy la verdure

Ont souci comme nous de leur race future.

Thoinet, en ce beau tems, passant par Vandomois,

Me mena voir à Tours Marion, que j'aimois,

Qui aus nopces estoit d'une sienne cousine,

Et ce Thoinet aussi alloit voir sa Francine,

Que la grande Venus, d'un trait plein de rigueur,

Luy avoit sans mercy écrite dans le coeur.

Nous partismes tous deus du hameau de Coustures.

Nous passames Gastine et ses hautes verdures:

Nous passames Marré, et vismes à mi-jour

Du pasteur Phelipot s'eslever la grand tour

Qui de Beaumont la Ronce honore le village,

Comme un pin fait honneur aus fueilles d'un bocage.

Ce pasteur, qu'on nommoit Phelipot le gaillard,

Courtois, nous festoya jusques au soir bien tard.

De là vinsmes coucher au gué de Lengenrie,

Sous les saules plantés le long d'une praerie:

Puis, des le poinct du jour redoublant le marcher,

Nous vismes dans un bois s'eslever le clocher

De sainct-Cosme, pres Tours, où la nopce gentile

Dans un pré se faisoit au beau millieu de l'isle.

Là Francine dançoit, de Thoinet le souci,

Là Marion balloit, qui fut le mien aussi.

Puis, nous mettans tous deus en l'ordre de la dance,

Thoinet tout le premier ceste pleinte commence:

Ma Francine, mon coeur, qu'oublier je ne puis,

Bien que pour ton amour oublié je me suis,

Quand dure en cruauté tu passerois les Ourses

Et le torrens d'yver desbordez de leurs courses,

Et quand tu porterois en lieu d'humaine chair,

Au fond de l'estomac, pour un coeur un rocher,

Quand tu aurois sucé le laict d'une Lyonne,

Quand tu serois autant qu'une Tigre felonne,

Ton coeur seroit encor de mes pleurs adouci,

Et ce pauvre Thoinet tu prendrois à merci

Je suis, s'il t'en souvient, Thoinet qui, des jeunesse,

Te voyant sur le Clain, t'appella sa maitresse,

Qui musette et flageol à ses levres usa

Pour te donner plaisir: mais cela m'abusa,

Car, te pensant flechir comme une femme humaine,

Je trouvay ta poitrine et ton aureille pleine

Helas! qui l'eust pensé, de cent mille glaçons,

Lesquelz ne t'ont permis d'escouter mes chansons:

Et toutesfois le tems, qui les pretz de leurs herbes

Despouille d'an en an, et les champs de leurs gerbes,

Ne m'a point despouillé le souvenir du jour

Ny du mois où je mis en tes yeux mon amour,

Ny ne fera jamais, voire eussai-je avallée

L'onde qui court là bas sous l'obscure valée.

C'estoit au mois d'Avril, Francine, il m'en souvient,

Quand tout arbre florist, quand la terre devient

De vieillesse en jouvence, et l'estrange arondelle

Fait contre un soliveau sa maison naturelle

Quand la lymace, au dos qui porte sa maison

Laisse un trac sur les fleurs, quand la blonde toison.

Va couvrant la chenille, et quand parmy les prées

Vollent les papillons aux aesles diaprées,

Lors que fol je te vy, et depuis je n'ay peu

Rien voir apres tes yeux que tout ne m'ait dépleu.

Il y a bien six ans, et si dedans l'oreille

J'entens encor' le son de ta vois nompareille,

Qui me gaigna le coeur, et me souvient encor

De ta vermeille bouche et de tes cheveus d'or,

De ta main, de tes yeus: et si le tems qui passe

A depuis dérobé quelque peu de leur grace,

Si est-ce que de toi je ne suis moins ravy

Que je fus sur le Clain le jour que je te vy

Surpasser en beauté toutes les pastourelles

Que les jeunes pasteurs estimoient les plus belles.

Car je n'ay pas égard à cela que tu es,

Mais à ce que tu fus tant les amoureus traits.

Te graverent dans moy, voire de telle sorte

Que telle que tu fus telle au coeur je te porte.

Des l'heure que le coeur des yeus tu me persas,

Pour en scavoir la fin je fis tourner le sas

Par une Janetton, qui au bourg de Crotelles,

Soit du bien, soit du mal, disoit toutes nouvelles.

Apres qu'elle eut trois fois craché dedans son sein,

Trois fois esternué, elle prist du levain,

Le rettate en ses dois, et en fist une image

Qui te sembloit de port, de taille et de visage:

Puis tournoyant trois fois et trois fois marmonnant,

De sa gertiere alla tout mon col entournant,

Et me dist, Je ne tiens si fort de ma gertiere

Ton col, que ta vie est tenue prisonniere

Par les mains de Francine, et seulement la mort

Dénoura le lien qui te serre si fort:

Et n'espere jamais de vouloir entreprendre

D'échauffer un glaçon qui te doit mettre en cendre.

Las! je ne la creu pas, et pour vouloir adoncq

En estre plus certain, je fis couper le joncq

La veille de Sainct Jehan: mais je vis sur la place

Le mien, signe d'Amour, croistre plus d'une brasse,

Le tien demeurer court, signe que tu n'avois

Souci de ma langueur, et que tu ne m'aimois,

Et que ton amitié, qui n'est point assurée,

Ainsi que le jonc court est courte demeurée.

Je mis pour t'essaier encores d'avant-hier

Dans le creus de ma main des feuilles de coudrier:

Mais en tappant dessus nul son ne me rendirent,

Et flaques sans sonner sur la main me fanirent,

Vray signe que je suis en ton amour mocqué,

Puis qu'en frapant dessus elles n'ont point craqué,

Pour monstrer par effait, que ton coeur ne craquette,

Ainsi que fait le mien, d'une flame segrette.

O ma belle Francine! ô ma fiere! et pourquoy,

En dançant, de tes dois ne me prens tu le doy?

Pourquoy, lasse du bal, entre ces fleurs couchée,

N'ai je sur ton giron ou la teste panchée,

Ou la main sous ta cotte, ou la levre dessus

Ton tetin, par lequel ton prisonnier je fus?

Te semblai je trop vieil? encor la barbe tendre

Ne fait que commencer sur ma joue à s'estendre,

Et ta bouche qui passe en beauté le coural,

S'elle veult me baiser, ne se fera point mal:

Mais, ainsi qu'un lizard se cache sous l'herbette,

Sous ma blonde toison cacheras ta languette,

Puis, en la retirant, tu tireras à toy

Mon coeur, pour te baiser qui sortira de moy.

Helas prens donc mon coeur, avecques ceste paire

De ramiers que je t'offre, ils sont venus de l'aire

De ce gentil ramier dont je t'avois parlé.

Margot m'en a tenu plus d'une heure acollé,

Les pensant emporter pour les mettre en sa cage,

Mais ce n'est pas pour elle: et demain davantage

Je t'en raporteray, avecques un pinson

Qui desja scait par coeur une belle chanson,

Que je fis l'autre jour desous une aubespine,

Dont le commencement est Thoinet et Francine.

Ha cruelle, demeure, et tes yeus amoureus

Ne détourne de moy. Ha je suis malheureus,

Car je cognois mon mal, et si ay cognoissance

D'Amour et de sa mere, et quelle est leur puissance:

Leur puissance est cruelle, et n'ont point d'autre jeu.

Sinon que de bruler nos coeurs à petit feu,

Ou de les englacer, comme aiant pris leur estre

D'une glace ou d'un feu qu'on ne sçauroit cognoistre.

Ha! que ne suis-je abeille ou papillon! j'irois

Maugré toy te baiser, et puis je m'assirois

Sur tes tetins, à fin de sucer de ma bouche

Cette humeur qui te fait contre moy si farouche.

O belle au dous regard, Francine au beau sourci,

Baise moy, je te prie, et m'embrasses ainsi

Qu'un arbre est embrassé d'une vigne bien forte:

"Souvent un vain baiser quelque plaisir aporte.

Je meurs! tu me feras despecer ce bouquet

Que j'ai cueilli pour toi, de thin et de muguet,

Et de la rouge fleur qu'on nomme Cassandrette,

Et de la blanche fleur qu'on appelle Olivette,

A qui Bellot donna et la vie et le nom,

Et de celle qui prent de ton nom son surnom.

Las! où fuis tu de moi? Ha ma *fiere ennemie,

Je m'en vois despouiller jaquette et souquenie,

Et m'en courray tout nud au haut de ce rocher

Où tu vois ce garçon à la ligne pescher,

Afin de me lancer à corps perdu dans Loyre

Pour laver mon souci, ou à fin de tant boyre

D'escumes et de flots, que la flamme d'aimer

Par l'eau contraire au feu, se puisse consumer.

Ainsi disoit Thoinet, qui se pasma sur l'herbe,

Presque transi de voir sa dame si superbe,

Qui rioit de son mal, sans daigner seulement

D'un seul petit clin d'oeil apaiser son tourment.

J'ouvrois desja la levre apres Thoinet pour dire

De combien Marion m'estoit encores pire,

Quand j'avisé sa mere en haste gagner l'eau,

Et sa fille emmener avecq elle au bateau,

Qui se jouant sur l'onde attendoit cette charge,

Lié contre le tronc d'un saule au feste-large.

Ja les rames tiroient le bateau bien panssu,

Et la voile en enflant son grand repli bossu,

Emportoit le plaisir lequel me tient en peine,

Quand je m'assis au bord, estendu sur l'arene,

Et voiant le bateau qui s'en fuioit de moy,

Parlant à Marion, je chanté ce convoy:

Bateau qui par les flots ma chere vie emportes,

Des vents, en ta faveur, les haleines soient mortes,

Et le ban perilleus, qui se treuve parmy

Les eaux, ne t'envelope en son sable endormy:

Que l'air, le vent, et l'eau favorisent ma dame,

Et que nul flot bossu ne rencontre sa rame:

En guise d'un estang, sans vagues paresseus

Aille le cours de Loyre, et son limon crasseus

Pour ce jourd'huy se change en gravelle menue,

Pleine de meint rubi et meinte perle esleue.

Que les bords soient semez de mille belles fleurs

Representant sur l'eau mille belles couleurs,

Et le tropeau gaillard des gentiles Nayades

Alentour du vaisseau face mille gambades,

Les unes balloyant des paumes de leurs mains

Les flots devant la barque, et les autres leurs seins

Descouvrant à fleur d'eau, et d'une main ouvriere

Conduisant le bateau du long de la riviere.

L'azuré martinet puisse voler d'avant

Avecques la mouette, et le plongeon, suivant

Son malheureus destin, pour le jourd'huy ne songe

En sa belle Esperie, et dans l'eau ne se plonge:

Et le heron cryard, qui la tempeste fuit,

Haut pendu dedans l'air, ne face point de bruit:

Ains tout gentil oiseau qui va charcheant sa proye

Par les flots poissonneus, bien-heureux te convoye,

A seurement venir avecq'ta charge au port,

Où Marion voirra, peut estre, sur le bord

Un orme, des longs bras d'une vigne enlassée,

Et la voyant ainsi doucement embrassée,

De son pauvre Perrot se pourra souvenir,

Et voudra sur le bord embrassé le tenir.

On dit au temps passé que quelques uns changerent

En riviere leur forme, et eus mesmes nagerent

En l'eau qui de leur sang et de leurs yeux sailloit,

Quand leur corps ondoyant peu à peu defailloit:

Que ne puis-je muer ma resamblance humaine

En la forme de l'eau qui cette barque emmeine!

J'irois en murmurant sous le fond du vaisseau,

J'irois tout alentour, et mon amoureuse eau

Bais'roit ore sa main, ore sa bouche franche,

La suivant jusqu'au port de la Chapelle blanche:

Puis, forçant mon canal pour ensuivre mon vueil,

Par le trac de ses pas j'yrois jusqu'à Bourgueil,

Et là, dessous un pin, sous la belle verdure,

Je voudrois retenir ma premiere figure.

N'y a-t-il point quelque herbe en ce rivage icy

Qui ait le gous si fort qu'elle me puisse ainsi

Muer comme fit Glauque en aquatique monstre,

Qui, homme ny poisson, homme et poisson se montre?

Je voudrois estre Glauque, et avoir dans mon sein

Les pommes qu'Ippomane eslançoit de sa main

Pour gaigner Atalante afin de te surprendre,

Je les rurois sur l'eau, et te ferois aprendre

Que l'or n'a seulement sur la terre pouvoir,

Mais qu'il peult de sur l'eau les femmes decevoir.

Or cela ne peult estre, et ce qui se peult faire

Je le veus achever afin de te complaire:

Je veus soigneusement ce coudrier arroser,

Et des chapeaus de fleurs sur ses fueilles poser:

Et avecque un poinçon je veus de sur l'escorce

Engraver de ton nom les six lettres à force,

Afin que les passans, en lisant Marion,

Facent honneur à l'arbre entaillé de ton nom.

Je veus faire un beau lit d'une verte jonchée,

De parvanche fueillue encontre bas couchée,

De thin qui fleure bon et d'aspic porte-epy,

D'odorant poliot contre terre tapy,

De neufard tousjours verd qui les tables immite,

Et de jonc qui les bords des rivieres habite.

Je veus jusques au coude avoir l'herbe, et si veus

De rose et de lis coronner mes cheveus.

Je veus qu'on me defonce une pipe angevine,

Et en me souvenant de ma toute divine,

De toy mon dous souci, espuiser jusqu'au fond

Mille fois ce jourd'huy mon gobelet profond,

Et ne partir d'icy jusqu'à tant qu'à la lye

De ce bon vin d'Anjou la liqueur soit faillie.

Melchior champenois, et Guillaume manceau,

L'un d'un petit rebec, l'autre d'un chalumeau,

Me chanteront comment j'eu l'ame dépourveue

De sens et de raison si tost que je t'eu veue,

Puis chanteront comment, pour flechir ta rigueur,

Je t'appellay ma vie, et te nommay mon coeur,

Mon oeil, mon sang, mon tout: mais ta haute pensée

N'a voulu regarder chose tant abaissée,

Ains en me desdaignant tu aimas autre part

Un, qui son amitié chichement te départ:

Voila comme il te prent pour mespriser ma peine,

Et le rusticque son de mon tuyau d'avaine.

Ils diront que mon teint, au paravant vermeil,

De creinte en te voyant se blanchit, tout pareil

A la neige d'Auvergne, ou des monts Pyrenées,

Qui se conserve blanche en despit des années,

Et que, depuis le tems que l'amour me fist tien,

De jour en jour plus triste et plus vieil je devien.

Puis ils diront comment les garçons du village

Disent que ta beauté touche desjà sur l'age,

Et qu'au matin le coq des la pointe du jour

Ne voirra plus sortir ceus qui te font l'amour:

Bien fol est qui se fie en sa belle jeunesse,

Qui si tost se dérobbe; et si tost nous delaisse.

La rose à la parfin deveint un grate-cu,

Et tout, avecq le tems, par le tems est vaincu.

Quel passetems prens tu d'habiter la valée

De Bourgueil, où jamais la Muse n'est allée?

Quitte-moy ton Anjou, et vien en Vendomois.

Là s'eslevent au ciel le sommet de nos bois,

Là sont mille taillis et mille belles pleines,

Là gargouillent les eaus de cent mille fonteines,

Là sont mille rochers, où Echon alentour

En resonnant mes vers ne parle que d'Amour.

Ou bien si tu ne veus, il me plaist de me rendre

Angevin, pour te voir, et ton langage aprendre,

Et là, pour te flechir, les hauts vers que j'avois

En ma langue traduit du Pindare Gregeois,

Humble je rediray en un chant plus facile

Sur le dous chalumeau du pasteur de Sicille.

Là, parmy tes sablons, Angevin devenu

Je veus vivre sans nom comme un pauvre incognu,

Et des l'aube du jour avecq'toy mener paistre

Aupres du port Guiet nostre tropeau champestre:

Puis sur l'ardant midi je veus en ton giron

Me coucher sous un chesne, où l'herbe à l'environ

Un beau lit nous fera de mainte fleur diverse,

Où nous serons tournés tous deus à la renverse.

Puis au soleil couchant nous menerons nos boeufs

Boire sur le sommet des ruisselets herbeus,

Et les remenerons au son de la musette,

Puis nous endormirons de sur l'herbe molette.

Là sans ambition de plus grans biens avoir,

Contenté seulement de t'aimer et te voir,

Je passerois mon age, et sur ma sepulture

Les Angevins mettroient ceste breve écriture:

Celuy qui gist icy, touché de l'aiguillon

Qu'Amour nous laisse au coeur, garda comme Apollon

Les trouppeaus de sa dame, et en cette prerie

Mourut en bien aimant une belle Marie:

Et elle apres sa mort mourut aussi d'ennuy,

Et sous ce vert tombeau repose avecques luy.

A peine avois-je dit quand Thoinet se depame,

Et à soy revenu alloit apres sa dame:

Mais je le retiray, le menant d'autrepart

Pour chercher à loger, car il estoit bien tard.

Nous avions ja passé la sablonneuse rive,

Et le flot qui bruiant contre le pont arrive.

Et jà de sur le pont nous estions parvenus,

Et nous apparoissoit le tombeau de Turnus,

Quand le pasteur Janot, tout gaillard nous emmaine

Dedans son toict couvert de javelles d'avaine.

III

A Phoebus, mon Grevin, tu es du tout semblable

De face et de cheveus, et d'art et de scavoir.

A tous deus dans le coeur Amour a fait avoir

Pour une belle dame une playe incurable.

Ny herbe, ny unguent, ne t'est point secourable,

Car rien ne peut forcer de Venus le pouvoir:

Seulement tu peus bien par tes vers reçevoir

A ta playe amoureuse un secours profitable.

En chantant, mon Grevin, on charme le souci,

Le Cyclope Aetnean se garissoit ainsi,

Chantant sur son flageol sa belle Galatée.

La peine découverte allege nostre coeur:

Ainsi moindre devient la plaisante langueur.

Qui vient de trop aimer, quand elle est bien chantée.

IV

Elégie à Marie

Marie, à celle fin que le siecle advenir

De nos jeunes amours se puisse souvenir,

Et que vostre beauté que j'ay long tems aimée

Ne se perde au tumbeau par les ans consumée,

Sans laisser quelque merque apres elle de soi,

Je vous consacre icy le plus gaillard de moi,

L'esprit de mon esprit, qui vous fera revivre

Ou long tems, ou jamais, par l'aage de ce livre.

Ceus qui liront les vers que j'ay chantez pour vous

D'un stile varié entre l'aigre et le dous,

Selon les passions que vous m'avez données

Vous tiendront pour deesse: et tant plus les années

En vollant s'en fuiront, et plus vostre beauté

Contre l'aage croistra, vielle en sa nouveauté.

O ma belle angevine, ô ma douce Marie,

Mon' oeil, mon coeur, mon sang, mon esprit et ma vie,

Dont la vertu me monstre un beau chemin aus cieus:

Je reçoy tant de bien quand je baise vos yeus,

Quand je languis dessus, et quand je les regarde,

Que, sans une frayeur qui la main me retarde,

Je me serois occis de dueil, que je ne peux

Vous monstrer par effaict le bien que je vous veus.

Or cela que je puis, pour vous je le veus faire:

Je veus en vous chantant vos louanges parfaire,

Et ne sentir jamais mon labeur engourdi

Que tout l'ouvrage entier pour vous ne soit ourdi.

Si j'estois un grand Roy, pour eternel exemple

De fidelle amitié, je bastirois un temple

De sur le bord de Loire, et ce temple auroit nom

Le temple de Ronsard et de sa Marion.

De marbre parien seroit vostre effigie,

Vostre robbe seroit à plain fons elargie

De plis recamez d'or, et vos cheveus tressez

Seroient de filetz d'or par ondes enlassez.

D'un crespe canellé seroit la couverture

De vostre chef divin, et la rare ouverture

D'un ret de soye et d'or, fait de l'ouvriere main

D'Arachne ou de Pallas, couvriroit vostre sain:

Vostre bouche seroit de roses toute plaine,

Respandant par le temple une amoureuse aleine:

Vous auriez d'une Hebé le maintien gracieux,

Et un essain d'amours sortiroit de vos yeus:

Vous tiendriez le haut bout de ce temple honorable,

Droicte sur le sommet d'un pillier venerable.

Et moi d'autre costé, assiz au plus bas lieu,

Je serois remerquable en la forme d'un Dieu:

J'aurois en me courbant dedans la main senestre

Un arc demi vouté, tel que lon void renaistre,

Aus premiers jours du mois, le repli d'un croissant,

Et j'aurois sur la corde un beau trait menassant,

Non le serpent Python, mais ce sot de jeune homme

Qui maintenant sa vie et son ame vous nomme,

Et qui seul me fraudant est roy de vostre coeur,

Qu'en fin en vostre amour, vous trouverez mocqueur.

Quiconque soit celui, qu'en vivant il languisse,

Et de chascun hay lui mesme se haysse,

Qu'il se ronge le coeur, et voye ses dessains

Tousjours lui eschapper comme vent de ses mains,

Soupçonneux, et resveur, arrogant, solitaire,

Et lui mesme se puisse à lui mesme desplaire.

J'aurois de sur le chef un rameau de laurier,

J'aurois de sur le flanc un beau pongnard guerrier,

La lame seroit d'or, et la belle pongnée

Ressembleroit à l'or de ma tresse peignée,

J'aurois un cystre d'or et j'aurois tout aupres

Un carquois tout chargé de flammes et de traits.

Ce temple, frequeté de festes solennelles,

Passeroit en honneur celuy des immortelles,

Et par voeux nous serions invocquez tous les jours

Comme les nouveaus dieus des fidelles amours.

D'age en age suivant, retour de l'année,

Nous aurions pres le temple une feste ordonnée,

Non pour faire courir comme les anciens

Des chariots couplez aus jeus olympiens,

Pour saulter, pour luitter, ou de jambe venteuse

Franchir en halettant la carriere poudreuse:

Mais tous les jouvenceaux en païs d'alentour,

Touchez au fond du coeur de la fleche d'Amour,

Aiant d'un gentil feu les ames allumées,

S'assembleroient au temple avecques leurs aimées,

Et là, celui qui mieus la bouche poseroit

Sur la bouche amoureuse, et qui mieus baiseroit,

Ou soit d'un baiser sec, ou d'un baiser humide,

D'un baiser court ou long, ou d'un baiser qui guide

L'ame de sur la levre, et laisse trespasser

Le baiseur, qui ne vit sinon que du penser,

Ou d'un baiser donné comme les colombelles,

Lors qu'ils se font l'amour de la bouche et des aisles

Celui qui mieus seroit en ses baisers apris.

Sur tous les jouvenceaus emporteroit le pris,

Seroit dit le veinqueur des baisers de Cythere

Et tout chargé de fleurs s'en iroit à sa mere.

O ma belle maitresse, et que je voudrois bien

Qu'Amour nous eust conjoinct d'un semblable lien,

Et qu'apres nos trespas dans nos fosses ombreuses

Nous fussions la chanson des bouches amoureuses,

Que ceus de Vandomois disent tous d'un accord,

Visitant le tombeau auquel je serois mort:

Nostre Ronsard, quittant cette terre voisine,

Fut jadis amoureus d'une belle Angevine,

Et que ceus là d'Anjou disent tous d'une voix:

Nostre belle Marie aima un Vandomois,

Tous les deus n'estoient qu'un, et l'amour mutuelle,

Qu'on ne voit plus ici, leur fut perpetuelle.

Leur siecle estoit vraiment un siecle bien heureus,

Où tousjours se voyoit contraimé l'amoureus.

Puisse arriver, apres l'espace d'un long age,

Qu'un esprit vienne à bas, sous l'amoureus ombrage

Des Myrthes, me conter que les ages n'ont peu

Effacer la clarté qui luist de nostre feu,

Mais que de voix en voix, de parolle en parolle,

Nostre gentile amour par la jeunesse volle,

Et qu'on aprent par coeur les vers et les chansons

Que j'ay tissu pour vous en diverses façons,

Et qu'on pense amoureus celui qui rememore

Vostre nom et le mien, et nos tumbes honore.

Or les Dieus en feront cela qu'il leur plaira,

Si est-ce que ce livre apres mille ans dira

Aux hommes, et aus tems, et à la renommée

Que je vous ay six ans plus que mon coeur aimée.

I

Chanson

Douce Maistresse, touche

Pour soulager mon mal

Mes levres de ta bouche

Plus rouge que coral:

D'un doux lien pressé

Tiens mon col embrassé.

Puis face dessus face,

Regarde moy les yeux,

Afin que ton trait passe

En mon coeur soucieux

Lequel ne vit si non

D'amour et de ton nom.

Je l'ay veu fier et brave,

Avant que ta beauté

Pour estre son esclave

Doucement l'eust donté,

Mais son mal luy plaist bien

Pourveu qu'il meure tien.

Belle, par qui je donne

A mes yeux tant d'esmoy,

Baise moy, ma mignonne,

Cent fois rebaise moy.

Et quoy faut-il en vain

Languir dessus mon sein?

Maistresse, je n'ay garde

De vouloir t'esveiller,

Heureux quand je regarde

Tes beaux yeux sommeiller,

Heureux quand je les voy

Endormis dessus moy.

Veux tu que je les baise

Afin de les ouvrir?

Hà tu fais la mauvaise

Pour me faire mourir.

Je meurs entre tes bras,

Et s'il ne t'en chaut pas!

Hà, ma chere ennemie,

Si tu veux m'apaiser,

Redonne moy la vie

Par l'esprit d'un baiser,

Hà! j'en ay la douceur

Senty jusques au coeur.

C'est une douce rage,

Qui nous poingt doucement,

Quand d'un mesme courage

On s'ayme incessamment:

Heureux sera le jour

Que je mourray d'amour.

II

Chanson en faveur de Madamoiselle de Limeuil

Quand ce beau Printemps je voy,

J'appercoy

Rajeunir la terre et l'onde,

Et me semble que le jour,

Et l'amour

Comme enfans naissent au monde.

Le jour qui plus beau se fait

Nous refait

Plus belle et verde la terre,

Et Amour armé de traiz,

Et d'atraiz,

Dans nos cueurs nous fait la guerre.

Il respand de toutes pars

Feux et dards,

Et dompte soubs sa puissance

Hommes, Bestes et Oyseaux,

Et les eaux

Lui rendent obeissance.

Venus avec son enfant

Triomphant,

Au haut de sa coche assise,

Laisse ses Cygnes voler

Parmy l'air

Pour aller voir son Anchise.

Quelque part que ses beaux yeux

Par les cieux

Tournent leurs lumieres belles,

L'air qui se montre serain

Est tout plain

D'amoureuses estincelles.

Puis en descendant à bas

Soubs ses pas:

Croissent mille fleurs descloses:

Les beaux lys et les oeillets

Vermeillets

Y naissent aveq' les roses.

Celuy vrayement est de fer

Qu'echaufer

Ne peut sa beauté divine;

Et en lieu d'humaine cher

Un rocher

Il porte dans sa poitrine.

Je sens en ce moys si beau

Le flambeau

D'amour qui m'echaufe l'ame,

Y voyant de tous costés

Les beautés

Qu'il emprunte de ma Dame.

Quand je voy tant de couleurs

Et de fleurs

Qui emaillent un rivage,

Je pense voir le beau teint

Qui est peint

Si vermeil en son visage.

Quand je voy les grands rameaux

Des ormeaux

Qui sont serrés de lierre,

Je pense estre pris aux lacs

De ses bras,

Quand sa belle main me serre.

Quand j'entends la douce voix

Par les bois

Du beau Rossignol qui chante,

D'elle je pense jouir

Et oyr

Sa douce voix qui m'enchante.

Quand Zephyre meine un bruit

Qui se suit

Au travers d'une ramée,

Des propos il me souvient,

Que me tient

Seule à seul ma bien aymée.

Quand je voy en quelque endroit

Un Pin droit,

Ou quelque arbre qui s'esleve,

Je me laisse decevoir,

Pensant voir

Sa belle taille et sa greve.

Quand je voy dans un jardin

Au matin

S'éclorre une fleur nouvelle,

J'accompare le bouton

Au teton

De son beau sein qui pommelle.

Quand le Soleil tout riant

D'Orient

Nous monstre sa blonde tresse,

Il me semble que je voy

Pres de moy

Lever ma belle maitresse.

Quand je sens parmy les prez

Diaprez

Les fleurs dont la terre est pleine,

Lors je fais croire à mes sens,

Que je sens

La douceur de son haleine.

Bref je fais comparaison

Par raison

Du Printemps et de ma mie:

Il donne aux fleurs la vigueur,

Et mon cueur

D'elle prend vigueur et vie.

Je voudrois au bruit de l'eau

D'un ruisseau

Desplier ses tresses blondes,

Frizant en autant de neuds

Ses cheveux

Que je verrois frizer d'ondes.

Je voudrois pour la tenir

Devenir

Dieu de ces forests desertes,

La baisant autant de fois

Qu'en un bois

Il y a de feuilles vertes.

Hà maitresse mon soucy

Vien icy

Vien contempler la verdure:

Les fleurs, de mon amitié

Ont pitié,

Et seule tu n'en as cure.

Au moins leve un peu tes yeux

Gracieux,

Et voy ces deux collombelles,

Qui font naturellement

Doucement

L'amour du bec et des aisles.

Et nous, soubs ombre d'honneur,

Le bon heur

Trahissons par une creinte:

Les oyseaux sont plus heureux

Amoureux,

Qui font l'amour sans contrainte.

Toutefois ne perdons pas

Nos esbats

Pour ces loix tant rigoureuses,

Mais si tu m'en crois, vivons,

Et suivons

Les collombes amoureuses.

Pour effacer mon esmoy

Baise moy,

Rebaise moy ma Déesse,

Ne laissons passer en vain

Si soudain

Les ans de nostre jeunesse.

III

Sonet

Las, je ne veux ny ne me puis desfaire

De ce beau reth, où Amour me tient pris:

Et, puis que j'ay tel voyage entrepris,

Je veux mourir, ou je le veux parfaire.

J'oy la raison qui me dit le contraire,

Et qui retient la bride à mes espris,

Mais j'ay le coeur de vos yeux si épris

Que d'un tel mal je ne me puis distraire.

Tay toy, raison: on dit communement,

Belle fin fait qui meurt en bien aymant:

De telle mort je veux suyvre la trace:

Ma foy ressemble au rocher endurcy

Qui, sans avoir de l'orage soucy,

Plus est batu et moins change de place.

IV

Sonet

Certes mon oeil fut trop avantureux

De regarder une chose si belle,

Une vertu digne d'une immortelle,

Et dont Amour est mesmes amoureux.

Depuis ce jour je devins langoureux

Pour aymer trop ceste beauté cruelle:

Cruelle non, mais doucement rebelle

A ce desir qui me rend malheureux:

Malheureux, non, heureux je me confesse,

Tant vaut l'amour d'une telle maitresse,

Pour qui je vy, et à qui je veux plaire.

Je l'ayme tant qu'aymer je ne me puis,

Je suis tant sien que plus mien je ne suis,

Bien que pour elle Amour me desespere.

V

Sonet

Je meurs, Paschal, quand je la voy si belle,

Le front si beau, et la bouche et les yeux,

Yeux le sejour d'Amour victorieux,

Qui m'a blessé d'une fleche nouvelle.

Je n'ay ny sang, ny veine, ny moüelle

Qui ne se change: et me semble qu'aux cieux

Je suis ravy, assis entre les Dieux,

Quand le bon heur me conduist aupres d'elle.

Ha! que ne suis-je en ce monde un grand Roy!

Elle seroit toujours aupres de moy:

Mais n'estant rien, il faut que je m'abstente

De sa beauté, dont je n'ose aprocher,

Que d'un regard transformer je ne sente

Mes yeux en fleuve, et mon cueur en roche.

I

Si jamais homme en ayamant fut heureux,

Je suis heureux, icy je le confesse,

Fait serviteur d'une belle maîtresse

Dont les beaux yeux ne me font malheureux.

D'un autre bien je ne suis desireux:

Honneur, beauté, vertus, et gentillesse

Ainsi que fleurs honorent sa jeunesse,

De qui je suis saintement amoureux.

Donc si quelcun veut dire que sa grace

Et sa beauté toutes beautés n'efface,

Et qu'en amour je ne vive contant,

Le desfiant au combat je l'appelle,

Pour luy prouver que mon coeur est constant,

Autant qu'elle est sur toutes la plus belle.

II

Las! sans espoir je languis à grand tort,

Pour la rigueur d'une beauté si fiere,

Qui sans ouyr mes pleurs ny ma priere

Rid de mon mal si violent et fort.

De la beauté dont j'esperois support,

Pour mon service et longue foy premiere,

Je ne reçoy que tourment et misere,

Et pour secours je n'attens que la mort.

Mais telle dame est si sage et si belle

Que si quelqu'un la veut nommer cruelle

En me voyant traitté cruellement,

Vienne au combat, icy je le deffie,

Il cognoistra qu'un si dur traittement

Pour ses vertus m'est une douce vie.

III

Sonet à Mlle De Limeuil

Douce beauté à qui je doy la vie,

Le coeur, le corps, et le sang, et l'esprit,

Voyant tes yeux Amour mesme m'aprit

Toute vertu que depuis j'ay suivie:

Mon coeur, ardant d'une amoureuse envie,

Si vivement de tes graces s'éprit

Que d'un regard de tes yeux il comprit

Que peut honneur, amour et courtoisie.

L'homme est du plomb ou bien il n'a point d'yeux,

Si te voyant il ne voit tous les cieux

En ta beauté qui n'a point de seconde.

Ta bonne grace un rocher retiendroit,

Et quand sans jour le monde deviendroit

Ton oei si beau seroit le jour du monde.

IV

Sonet à une Damoyselle

Douce beauté qui me tenez le coeur

Et qui avez durant toute l'année

Dedans vos yeux mon ame emprisonnée

La faisant vivre en si belle langueur,

Ha, que ne puis-je atteindre à la hauteur

Du ciel tyran de nostre destinée!

Je changerois sa course retournée,

Et mon malheur je muerois en bon heur.

Mais estant homme il faut qu'homme j'endure

Du ciel cruel la violence dure

Qui me commande à mourir pour vos yeux:

Doncques je viens vous presenter, Madame,

Ce nouvel an pour obeyr aux cieux,

Le coeur, l'esprit, le corps, le sang et l'ame.

V

Sonet a Rhodenthe

Le premier jour du mois de May, Madame,

Dedans le coeur je senty vos beaux yeux,

Bruns, doux, courtois, rians, delicieux,

Qui d'un glaçon feroient naistre une flame.

De leur beau jour le souvenir m'enflame

Et par penser j'en deviens amoureux:

O de mon coeur les meurtriers bienheureux,

Vostre vertu je sens jusques en l'ame.